സംസ്ഥാനത്ത് ഷിഗെല്ല രോഗം സ്ഥിരീകരിച്ചു; കനത്ത ജാഗ്രതാ നിര്‍ദേശം

കോഴിക്കോട് ജില്ലയില്‍ ഷിഗെല്ല ബാക്റ്റീരിയയുടെ സാന്നിധ്യം സ്ഥിരീകരിച്ചു, കഴിഞ്ഞ ദിവസം പതിനൊന്ന് വയസുള്ള ബാലന്‍ ഷിഗെല്ല മൂലം മരണപ്പെട്ടിരുന്നു. സമാന രോഗം കണ്ടെത്തിയ അഞ്ച് പേര്‍ നിലവില്‍ ചികിത്സയിലാണ്. നേരത്തെ മലപ്പുറം ജില്ലയില്‍ ഈ ബാക്ടീരിയയുടെ സാന്നിധ്യം കണ്ടെത്തിയിരുന്നു. വയറിളക്കമാണ് പ്രധാന രോഗ ലക്ഷണം, എന്നാല്‍ സാധാരണ വയറിളക്കത്തെക്കാള്‍ ഭീകരമായതിനാല്‍ മരണം വരെ സംഭവിക്കാറുണ്ട്.
ഈ ബാക്ടീരിയ മൂലമുള്ള മാരകമായ വയറിളക്കത്തിന് കാരണം മലിനജലത്തിന്റെ ഉപയോഗമാണ്. വ്യക്തി തലത്തില്‍ ശുചിത്വം പാലിച്ചാല്‍ ഒരു പരിധി വരെ രോഗം പകരുന്നതു തടയാം.തുടക്കത്തില്‍ തന്നെ വൈദ്യസഹായം തേടിയാല്‍ രോഗം അപകടകരമാകുന്നതും തടയാം. ഫലപ്രദമായ ചികിത്സ കൃത്യസമയത്തു നല്‍കിയില്ലെങ്കില്‍ രോഗം തലച്ചോറിനേയും വൃക്കയേയും ബാധിക്കുന്നത് മരണത്തിന് ഇടയാക്കും. കുട്ടികളിലാണ് രോഗസാധ്യത കൂടുതല്‍. വയറിളക്കം, പനി, വയറുവേദന, എന്നിവയാണ് ഷിഗെല്ലയുടെ പ്രധാന ലക്ഷണങ്ങള്‍.