സംസ്ഥാനത്ത് നാളെ നടക്കാനിരുന്ന ഹയര്‍ സെക്കന്‍ഡറി അക്കൗണ്ടന്‍സി എ.എഫ്.എസ് പരീക്ഷ മാറ്റിവച്ചു

മലപ്പുറം കുഴിമണ്ണ ഗവ: ഹയര്‍ സെക്കന്‍ഡറി സ്‌കൂളിലെ ചോദ്യപേപ്പര്‍ മോഷണം പോയി. ഇതിനെ തുടര്‍ന്ന് സംസ്ഥാനത്ത് നാളെ രാവിലെ നടക്കാന്‍ ഇരുന്ന ഹയര്‍ സെക്കന്‍ഡറി അക്കൗണ്ടന്‍സി എ.എഫ്.എസ് പരീക്ഷ മാറ്റിവച്ചു. ഉച്ചക്കുള്ള പരീക്ഷ കൃത്യ സമയത്ത് ആരംഭിക്കും. സംഭവത്തില്‍ കൊണ്ടോട്ടി പൊലീസ് അന്വേഷണം ആരംഭിച്ചു.ഇന്ന് രാവിലെയാണ് സംഭവം ശ്രദ്ധയില്‍പ്പെട്ടത്. തുടര്‍ന്ന് സ്‌കൂള്‍ അധികൃതര്‍ പൊലീസിലെ വിവരം അറിയിക്കുകയായിരുന്നു. ചോദ്യപേപ്പര്‍ സൂക്ഷിച്ച റൂമിനടുത്തെ സ്റ്റാഫ് റൂമിന്റെ എയര്‍ ഹോളിലൂടെ കള്ളന്‍ കടന്നതായാണ് സൂചന. സംഭവ സ്ഥലത്ത് ജില്ലാ വിദ്യാഭ്യാസ വകുപ്പ് പരിശോധന നടത്തി നല്‍കിയ റിപ്പോട്ടിന്റെ അടിസ്ഥാനത്തിലാണ് പരീക്ഷ മാറ്റിവച്ചത്. മൂന്ന് മണിക്കൂറില്‍ അധികമാണ് മോഷ്ടാവ് ഈ ക്ലാസ് മുറിയില്‍ ചിലവഴിച്ചത്. മുറിയില്‍ ഉണ്ടായിരുന്ന പേപ്പറുകള്‍ എല്ലാം വാരിവലിച്ചിട്ട നിലയിലായിരുന്നു. മറ്റ് സാധനങ്ങള്‍ ഒന്നും മോഷണം പോയിട്ടില്ല. സി.സി.ടി.വിയില്‍ മോഷ്ടാവിന്റെ ചിത്രം പതിഞ്ഞിട്ടുണ്ട്. സ്ഥലത്ത് ഡോഗ് സ്‌ക്വാഡും വിരലടയാള വിദഗ്ധരും പരിശോധന നടത്തി.