പെരുമാറ്റച്ചട്ടലംഘനം : കോഴിക്കോട് ജില്ലയിൽ വ്യാപക പരാതികൾ

കോഴിക്കോട് : തിരഞ്ഞെടുപ്പ് പ്രഖ്യാപനം വന്നതുമുതലുള്ള വ്യത്യസ്തമായ പരാതികളാണ്‌ കോഴിക്കോട്ടുനിന്നും ഉയർന്നു കേൾക്കുന്നത്.

വ്യക്തികൾക്കെതിരേയുള്ള സ്വഭാവഹത്യ, പൊതുസ്ഥലങ്ങളിൽ ബാനറുകളും പോസ്റ്ററുകളും പതിക്കൽ, അനുമതിയില്ലാതെ സ്വകാര്യവ്യക്തികളുടെ കെട്ടിടങ്ങളിലും മറ്റും പ്രചാരണ ബാനറുകളും പോസ്റ്ററുകളും പതിക്കൽ, അനുമതിയില്ലാതെ വാഹനം ഉപയോഗിച്ചത് തുടങ്ങിയ പരാതികളാണ് കിട്ടിയത്.

ജില്ലയിൽ പലയിടത്തും വൈദ്യുത തൂണുകളിൽ വ്യാപകമായി സ്ഥാപിച്ച ബോർഡുകൾ എടുത്തുമാറ്റി.തിരഞ്ഞെടുപ്പു ദിവസം സമയപരിധി കഴിയുംവരെയുള്ള എല്ലാ പെരുമാറ്റച്ചട്ടലംഘനങ്ങൾക്കെതിരേയും നടപടി സ്വീകരിക്കുമെന്ന് ആൻഡി ഡിഫേയിസ്‌മെന്റ് സ്ക്വാഡിന്റെ ജില്ലാ നോഡൽ ഓഫീസർ കൂടിയായ അസിസ്റ്റന്റ് കളക്ടർ ശ്രീധന്യാ സുരേഷ് വ്യക്തമാക്കി.

സ്വകാര്യവ്യക്തികളുടെ സ്ഥലത്ത് അനുമതിയില്ലാതെ കൊടിമരം നാട്ടൽ, ബാനറുകൾ കെട്ടൽ, മുദ്രാവാക്യങ്ങൾ എഴുതൽ എന്നീ പരാതികളുണ്ടായി. നോട്ടീസ് നൽകിയിട്ടും നീക്കം ചെയ്തില്ലെങ്കിൽ ഇവ നീക്കംചെയ്യാനുള്ള ചെലവ് സ്ഥാനാർഥികളിൽനിന്ന് ഈടാക്കും.

പൊതുജനങ്ങൾക്ക് അസൗകര്യമോ ശല്യമോ ഉണ്ടാക്കുന്ന പ്രചാരണ സാമഗ്രികൾ, കൊടി, ബാനർ, പോസ്റ്റർ, കട്ടൗട്ട് എന്നിവ സ്ഥാപിച്ചതിനും പ്ലാസ്റ്റിക്ക്, ഫ്ളക്സ് എന്നിവ ഉപയോഗിച്ചതിനും പരാതിയുണ്ട്.