വോട്ടർ ഐഡി ഡിജിറ്റലാകും

ഡൽഹി : വോട്ടർമാർക്ക് ഡിജിറ്റലൈസ്ഡ് ഫോട്ടോ ഐഡി കാർഡ് എന്ന ആശയവുമായി തിരഞ്ഞെടുപ്പ് കമ്മിഷൻ.വോട്ടർ ഐഡി കാർഡുകൾ അച്ചടിച്ചു വിതരണം ചെയ്യുന്ന ശ്രമകരമായ ജോലികാലതാമസമുണ്ടാക്കുന്ന സാഹചര്യത്തിലാണ് വോട്ടർ ഐഡി കാർഡും ഡിജിറ്റലാക്കാൻ ഒരുങ്ങുന്നത്.

മൊബൈൽ ഫോണിൽ സൂക്ഷിക്കാവുന്നതും വെബ്സൈറ്റ്, ഇമെയിൽ എന്നിവ മുഖേന കൈകാര്യം ചെയ്യാവുന്നതുമായ തരത്തിലായിരിക്കും ഡിജിറ്റൽ ഐഡിയുടെ ഘടന തന്നെ.

വോട്ടർപട്ടികയിൽ പേരു വന്നാലുടൻ വോട്ടർക്ക് ഇമെയിൽ, എസ്എംഎസ് വഴി അറിയിപ്പും ഐഡി കാർഡ് ഡൗൺലോഡ് ചെയ്യാനുള്ള ലിങ്കും ലഭിക്കും. ലിങ്കിൽ പ്രവേശിച്ചു ഡൗൺലോഡ് ചെയ്യുന്ന കാർഡ് വോട്ടെടുപ്പ് ഉൾപ്പെടെയുള്ള ഘട്ടങ്ങളിൽ ഉപയോഗിക്കാനാകും

പദ്ധതിക്ക് അന്തിമരൂപമായിട്ടില്ലെന്നും ഇതു സംബന്ധിച്ചു വിവിധ മേഖലകളിൽ നിന്ന് നിർദേശം സ്വീകരിച്ചുവരുന്നതായും മുതിർന്ന ഉദ്യോഗസ്ഥ വൃത്തങ്ങൾ പറഞ്ഞു.

ടി.എൻ.ശേഷൻ മുഖ്യ തിരഞ്ഞെടുപ്പ് കമ്മിഷണറായിരിക്കെ 1993 ലാണു രാജ്യത്ത് വോട്ടർ ഐഡി കാർഡ് നിലവിൽവന്നത്.