പൂക്കോയ തങ്ങള്‍ മുങ്ങിയിട്ട് ഒരുമാസം; ഇരുട്ടില്‍ തപ്പി അന്വേഷണ സംഘം

ഫാഷന്‍ ഗോള്‍ഡ് ജ്വല്ലറി നിക്ഷേപത്തട്ടിപ്പു കേസിലെ ഒന്നാം പ്രതിയും ജ്വല്ലറി മാനേജിങ് ഡയറക്ടറുമായ ചന്തേര ടി.കെ. പൂക്കോയ തങ്ങള്‍ മുങ്ങിയിട്ട് ഒരുമാസം. മകനും കേസിലെ പ്രതിയുമായ എ.പി. ഹിഷാം, മറ്റൊരു പ്രതി ജ്വല്ലറി ജനറല്‍ മാനേജര്‍ സൈനുല്‍ ആബിദീന്‍ തുടങ്ങിയവര്‍ ഇപ്പോഴും ഒളിവില്‍. കഴിഞ്ഞ നവംബര്‍ ഏഴിനാണ് പൂക്കോയ ഒളിവില്‍ പോയത്. അതേസമയം കേസിലെ പ്രധാന പ്രതികളെ പിടികൂടാതെ എം.സി. കമറുദ്ദീന്‍ എംഎല്‍എയെ മാത്രം തിരക്കിട്ട് അറസ്റ്റ് ചെയ്തതിനു പിന്നില്‍ രാഷ്ട്രീയ മുതലെടുപ്പാണെന്ന് മുസ്ലീം ലീഗ് ആരോപിക്കുന്നു.
കമറുദീനെ അറസ്റ്റ് ചെയ്തിട്ട് ഇന്നേയ്ക്ക് ഒരു മാസം തികയുകയാണ്. എംഎല്‍എ എം.സി. കമറുദ്ദീനിന്റെ അറസ്റ്റിനു പിന്നാലെയാണ് ടി.കെ. പൂക്കോയ തങ്ങള്‍ ഒളിവില്‍ പോയത്. എസ്പി ഓഫിസില്‍ ഹാജരാകാന്‍ ആവശ്യപ്പെട്ടെങ്കിലും എം.സി. കമറുദ്ദീന്‍ പിടിയിലായതോടെ അപകടം മണത്ത തങ്ങള്‍ ഒളിവില്‍ പോകുകയായിരുന്നു. മകന്‍ ഹിഷാമും ജനറല്‍ മാനേജര്‍ സൈനുല്‍ ആബിദീനും നേരത്തെ തന്നെ ഒളിവില്‍ പോയിരുന്നു. ഇതേ തുടര്‍ന്ന് കേസില്‍ പൂക്കോയ തങ്ങളും മകന്‍ ഹിഷാമും അടക്കം മൂന്ന് പേര്‍ക്കെതിരെ അന്വേഷണസംഘം ലുക്കൗട്ട് നോട്ടീസ് പുറത്തിറക്കിയിരുന്നു.
കേസ് തെരഞ്ഞെടുപ്പ് പ്രചാരണ വിഷയമാവുമ്പോഴും നിക്ഷേപകര്‍ക്ക് പണം തിരികെ ലഭിക്കുമെന്ന പ്രതീക്ഷയില്ല. 749 നിക്ഷേപകര്‍ക്ക് 110 കോടി രൂപ കൊടുക്കാനുണ്ടെന്നാണു പറയപ്പെടുന്നത്. നാലു പോലീസ് സ്റ്റേഷനുകളില്‍ ലഭിച്ച 141 പരാതികളില്‍ 97 കേസുകളിലാണ് കമറുദ്ദീന്‍ പ്രതി ചേര്‍ക്കപ്പെട്ടത്. ഈ കേസുകളില്‍ മാത്രമായി 15 കോടി രൂപ നിക്ഷേപകര്‍ക്ക് നല്‍കാനുണ്ട്. കമറുദ്ദീന്‍ അറസ്റ്റിലായ ശേഷം അന്വേഷണം നിലച്ചത് ആഭ്യന്തര വകുപ്പിന്റെ രാഷ്ട്രീയ ഇടപെടലിന്റെ തെളിവാണെന്ന് ബന്ധുക്കളും ആരോപിക്കുന്നുണ്ട്.