ആര്‍ക്കും പരിശോധിക്കാം രേഖകള്‍ നല്‍കാം : ഉരാളുങ്കല്‍

സൊസൈറ്റിയുടെ ഇടപാടുകള്‍ നിയമാനുസൃതവും സുതാര്യവുമാണെന്ന് ഊരാളുങ്കല്‍ ലേബര്‍ കോണ്‍ട്രാക്ട് കോ- ഓപ്പറേറ്റീവ് സൊസൈറ്റി. സമീപകാല വിവാദങ്ങള്‍ സൊസൈറ്റിയെ ബാധിക്കുന്നവയല്ലെന്നും ഊരാളുങ്കല്‍ വ്യക്തമാക്കി.

ഒരേസമയം ധാരാളം പണികള്‍ ചെയ്യേണ്ടിവരുമ്പോള്‍ അപ്പോഴത്തെ അധിക ആവശ്യത്തിനനുസരിച്ച് യന്ത്രങ്ങളും വാഹനങ്ങളും വാടകയ്ക്ക് എടുക്കാറുണ്ട്. പ്രവര്‍ത്തനമേഖല കേരളം മുഴുവനായി വ്യാപിപ്പിച്ചശേഷം എടുക്കേണ്ട യന്ത്രങ്ങളുടെയും വാഹനങ്ങളുടെയും എണ്ണം ഗണ്യമായി ഉയര്‍ന്നു. ഒരേസമയം മുന്നൂറും നാനൂറും നിര്‍മാണ പ്രോജക്ടുകള്‍ സൊസൈറ്റി ചെയ്യുന്നുണ്ട്.

വാടക വാഹനങ്ങള്‍ 387
നിലവില്‍ 387 വാഹനങ്ങളും നിര്‍മാണയന്ത്രങ്ങളും വാടകയ്ക്ക് ഉപയോഗിച്ചുവരികയാണ്. ഇതെല്ലാം കൃത്യമായ നടപടിക്രമങ്ങളിലൂടെയാണ് എടുത്തിട്ടുള്ളത്. എല്ലാറ്റിന്റെയും വാടക നല്‍കുന്നതും നികുതിനിയമങ്ങള്‍ അടക്കമുള്ള എല്ലാ നിയമങ്ങളും പാലിച്ച് ബാങ്ക് അക്കൗണ്ടുകള്‍വഴി മാത്രമാണ്. വളരെ സുതാര്യവുമാണ്. ഇക്കാര്യത്തില്‍ ഒരുതരം ആശങ്കയുടെയും കാര്യമില്ല. വസ്തുത ഇതായിരിക്കെ ഒരു വ്യക്തിയുടെ വാഹനം മാത്രം വാടകയ്‌ക്കെടുത്ത് വന്‍തുക നല്‍കുന്നു എന്നമട്ടില്‍ ചിലര്‍ നടത്തുന്ന പ്രചാരണം ചില പ്രത്യേക രാഷ്ട്രീയലക്ഷ്യം വച്ചുള്ളതാണ്.

പരിശോധിക്കാം
ഏത് അന്വേഷണ ഏജന്‍സി എന്തു വിവരം ആവശ്യപ്പെട്ടാലും സൊസൈറ്റി സസന്തോഷം നല്‍കും. എല്ലാ വാര്‍ഷിക പൊതുയോഗത്തിലും സമ്പൂര്‍ണ കണക്ക് അവതരിപ്പിച്ച് വിശദമായിത്തന്നെ ചര്‍ച്ചചെയ്ത് പാസാക്കാറുണ്ട്. സഹകരണനിയമപ്രകാരമുള്ള എല്ലാ ഓഡിറ്റും നടക്കുന്നുണ്ട്. എല്ലാവര്‍ഷവും കൃത്യമായി ഇന്‍കം ടാക്‌സ് രേഖകളും ഫയല്‍ ചെയ്യുന്നു. പ്രവര്‍ത്തനമേഖല വിപുലമായപ്പോള്‍ സ്വന്തമായി ഇന്റേണല്‍ വിജിലന്‍സ് വരെ രൂപവത്കരിച്ച സ്ഥാപനമാണ് ഊരാളുങ്കല്‍ സൊസൈറ്റി.

ഒരു നൂറ്റാണ്ട് തികയാന്‍പോകുന്ന സൊസൈറ്റിയില്‍ ഒരിക്കല്‍പ്പോലും ഒറ്റയാളെപ്പോലും സാമ്പത്തികാരോപണത്തിലോ അഴിമതിയിലോ ശിക്ഷിക്കേണ്ടിവന്നിട്ടില്ല. ഒരു പൈസയുടെ അഴിമതി ഉണ്ടായിട്ടില്ല എന്ന് ഉറപ്പിച്ചുപറയാന്‍ കഴിയുന്ന സ്ഥാപനമാണിത്.

ലാഭേച്ഛയില്ല
മികച്ച ഗുണമേന്മയോടെ നിര്‍മാണം നടത്തുകയും അതിന്റെ മിച്ചം മുഴുവന്‍ തൊഴിലാളികള്‍ക്കു ലഭിക്കുകയും ചെയ്യുന്ന, 95 വര്‍ഷത്തെ മഹത്തായ പാരമ്പര്യമുള്ള സ്ഥാപനം ലാഭേച്ഛയോടെ പ്രവര്‍ത്തിക്കുന്നതല്ല. തൊഴിലാളികള്‍ മാത്രം ഗുണഭോക്താക്കളായ സഹകരണപ്രസ്ഥാനമാണ്. സൊസൈറ്റി നടപ്പാക്കിയ ഒരൊറ്റ നിര്‍മാണത്തെപ്പറ്റിയും ഗുണമേന്മയുടെ കാര്യത്തിലടക്കം ഒരു ആക്ഷേപവും അഴിമതിയാരോപണവും നാളിതുവരെ ഉണ്ടായിട്ടില്ല. നിര്‍മാണങ്ങളില്‍ പണം മിച്ചം വന്നാല്‍ തിരികെ നല്‍കുന്ന അത്യപൂര്‍വ മാതൃക പല പ്രവൃത്തികളിലും പിന്തുടരുന്ന സ്ഥാപനമാണിത്.

അതതു കാലത്ത് നിലവിലുള്ള നിയമങ്ങളും ചട്ടങ്ങളും സര്‍ക്കാരുത്തരവുകളും അനുസരിച്ചും അവയിലെ പരിധികള്‍ പാലിച്ചും മാത്രമാണ് സൊസൈറ്റിക്ക് സര്‍ക്കാര്‍ കരാറുകള്‍ നല്‍കുന്നത്.മഹാഭൂരിപക്ഷം നിര്‍മാണങ്ങളും സൊസൈറ്റി ഏറ്റെടുക്കുന്നത് മത്സര ടെന്‍ഡറിലൂടെത്തന്നെയാണ്. അപൂര്‍വമായി പ്രവൃത്തികള്‍ നേരിട്ട് ഏറ്റെടുക്കുന്നതാകട്ടെ എസ്റ്റിമേറ്റിലും 10 ശതമാനം കുറച്ചാണ്.

സൊസൈറ്റിക്ക് കരാര്‍ നല്‍കുന്നതിനെ സ്വകാര്യ കരാര്‍സ്ഥാപനങ്ങള്‍ക്ക് കരാര്‍ നല്‍കുന്നതിന് തുല്യമായി കാണുന്ന ചിലര്‍ മാത്രമാണ് അതിനൊക്കെ എതിരെ പ്രചാരണങ്ങള്‍ നടത്തുന്നത്. ഈ മാതൃകാസ്ഥാപനത്തെ അനാവശ്യ വിവാദങ്ങളില്‍ പെടുത്തി അപകീര്‍ത്തിപ്പെടുത്തരുത്.