ചുവരുകളില്‍ ചിഹ്നങ്ങള്‍ വരച്ച് എട്ടാം ക്ലാസുകാരി

രാഷ്ട്രീയ പാര്‍ട്ടികള്‍ക്കിടയില്‍ എട്ടാം ക്ലാസുകാരി ഹര്‍ഷ മുസ്തഫ ഇപ്പോള്‍ ഏറെ ശ്രദ്ധേയയാണ്. തദ്ദേശ തെരഞ്ഞെടുപ്പില്‍ മത്സരിക്കുന്ന സ്ഥാനാര്‍ഥികളുടെ ചിഹ്നങ്ങള്‍ ചുവരുകളില്‍ വരച്ച് മനോഹരമാക്കിയാണ് ഹര്‍ഷ എന്ന കൊച്ചുമിടുക്കി ശ്രദ്ധ നേടുന്നത്. കുഞ്ഞുവിരലുകളാല്‍ ചുവരുകളില്‍ തീര്‍ത്തത് അനേകം ചിത്രങ്ങളാണ്. പാലക്കാട് ജില്ലയിലെ വിളയൂര്‍ പഞ്ചായത്തില്‍ മത്സരിക്കുന്ന എല്‍ഡിഎഫ് സാരഥികള്‍ക്ക് വേണ്ടിയാണ് ഹര്‍ഷ ഇപ്പോള്‍ ചുവരെഴുതുന്നത്.
ഇടതുമുന്നണിയുടെ തെരഞ്ഞെടുപ്പ് ചിഹ്നമായ ചുറ്റിക അരിവാള്‍ നക്ഷത്രം മനോഹരമായി വരച്ച് ശ്രദ്ധിക്കപ്പെട്ടതോടെ രാഷ്ട്രീയക്കാര്‍ തേടി എത്താന്‍ തുടങ്ങി. കൂരാച്ചിപ്പടിയിലെ തന്റെ വീടിന് മുന്നിലെ ചുവരില്‍ വരച്ച ചിത്രം ആരോ ഫെയ്സ്ബുക്കിലിട്ടു. ഇതോടെ ഷെയറും ലൈക്കുമായി ഹര്‍ഷയിലെ കലാകാരിയെ നാടറിഞ്ഞു. ഇപ്പോള്‍ ഹര്‍ഷയ്ക്ക് തിരക്കോട് തിരക്കാണ്.
പരസ്യകല പരമ്പരാഗത കുലത്തൊഴിലായി സ്വീകരിച്ച തൊഴിലാളികളെക്കാള്‍ ഹര്‍ഷയ്ക്കാണ് ഇപ്പോള്‍ ഡിമാന്‍ഡ്. കുഞ്ഞു കലാകാരി വരയ്ക്കുന്ന ചിത്രം മാത്രമല്ല എഴുത്തും മനോഹരമാണ്. സ്ഥാനാര്‍ഥിയുടെ പേരും മുദ്രാവാക്യങ്ങളുമൊക്കെ വേറിട്ടു നില്‍ക്കുന്നു. അക്ഷരങ്ങള്‍ക്കും ഫോണ്ടുകള്‍ക്കും ഒരു ഡിജിറ്റല്‍ സ്പര്‍ശമാണ്. വിളയൂര്‍ ഗവ. ഹൈസ്‌കൂളിലെ എട്ടാം ക്ലാസ് വിദ്യാര്‍ഥിനിയാണ് ഹര്‍ഷ. സ്‌കൂള്‍ കലോത്സവങ്ങളില്‍ ഏറെ അംഗീകാരങ്ങളും സ്വന്തമാക്കിയിട്ടുണ്ട്. പിതാവ് വിളയൂര്‍ കൂരാച്ചിപ്പടി മലവട്ടത്ത് മുസ്തഫ സാമുഹിക പ്രവര്‍ത്തകനാണ്.