ശോഭാസുരേന്ദ്രന്‍ രാജ്‌നാഥ്‌സിങ്ങിന് നല്‍കിയ പരാതി എന്ത്

ബിജെപിയില്‍ കേന്ദ്രമന്ത്രി വി മുരളീധരനും സംസ്ഥാന പ്രസിഡന്റ് കെ സുരേന്ദ്രനും ഒന്നിച്ചു നിന്ന് ശോഭാ സുരേന്ദ്രനെ എതിര്‍ക്കുന്നതിന് പിന്നില്‍ പഴയ പരാതിയുടെ പ്രതികാരമോ.
കേരളകൗമുദി മുന്‍ സ്‌പെഷ്യല്‍ കറസ്‌പോണ്ടന്റ് എസ് ജഗദീശ് ബാബുവിന്റെ ഫേസ്ബുക്ക് കുറിപ്പ് ബിജെപി യിലെ ഗ്രൂപ്പ്‌വഴക്കിന്റെ ആരും അറിയാത്ത കഥകള്‍ പുറത്തുകൊണ്ടുവരുന്നു.
മാധ്യമങ്ങളോട് പല കാര്യങ്ങളും പറയാനുണ്ടെന്നും സമയമാകുമ്പോള്‍ എല്ലാം തുറന്നുപറയുമെന്നും താന്‍ ജനങ്ങള്‍ക്കിടയിലുള്ള നേതാവാണെന്നും പറയാനുള്ള കാര്യങ്ങള്‍ ഒളിച്ചുവെയ്ക്കാതെ എല്ലാം മാധ്യമങ്ങളോട് ഉചിതമായ സമയത്ത് വെളിപ്പെടുത്തുമെന്നും കഴിഞ്ഞ ദിവസം ശോഭ സുരേന്ദ്രന്‍ പറഞ്ഞതിന് പിന്നാലെയാണ് ജഗദീശ് ബാബുവിന്റെ കുറിപ്പ് വന്നിരിക്കുന്നത്.
രാജ്‌നാഥ് സിങ് ദേശീയ പ്രസിഡന്റായിരുന്ന സമയത്ത് ശോഭ സുരേന്ദ്രന്‍ ഇപ്പോഴത്തെ മന്ത്രി വി.മുരളീധരനെതിരെ അതീവ ഗുരുതരമായ ഒരു പരാതി നല്‍കിയിരുന്നു. ദേശീയ നേതൃത്വം ഇടപെട്ടാണ് ആ പരാതി തല്‍ക്കാലം പുറത്തുവരാതെ ഒതുക്കിത്തീര്‍ത്തതെന്നും ജഗദീശ് ബാബു പറയുന്നു.

ഒരു പഞ്ചായത്ത് മെമ്പര്‍ പോലും ബിജെപിക്ക് ഇല്ലാതിരുന്ന കാലത്താണ് താന്‍ പാര്‍ട്ടിയിലേക്ക് വന്നത്. 33 കൊല്ലമായി പാര്‍ട്ടിയുടെ വിവിധ പ്രവര്‍ത്തനങ്ങളില്‍ നിര്‍ണ്ണായക പങ്ക് വഹിച്ചിട്ടുണ്ട്. അങ്ങനെയുള്ള തന്നെ സ്ഥാനമോഹി എന്നുവിളിക്കുന്നതിനോട് എന്ത് മറുപടിയാണ് പറയേണ്ടതെന്ന് കഴിഞ്ഞ ദിവസം ശോഭ സുരേന്ദ്രന്‍ മാധ്യമങ്ങളോട് പറഞ്ഞിരുന്നു.

വി.മുരളീധരനും സംസ്ഥാന പ്രസിഡന്റ് സുരേന്ദ്രനും ചേര്‍ന്ന് തന്നെ രാഷ്ട്രീയമായി ഇല്ലാതാക്കാന്‍ ശ്രമിക്കുന്നുവെന്നാണ് ശോഭ സുരേന്ദ്രന്റെ പരാതി.