കുന്നംകുളം പോക്സോ കോടതിയുടെ ആദ്യ വിധി: പ്രതിയെ വെറുതെ വിട്ടു

വിവാഹ വാഗ്ദാനം നല്‍കി പെണ്‍കുട്ടിയെ പീഡിപ്പിച്ച കേസില്‍ പ്രതിയായ യുവാവിനെ കുന്നംകുളം പോക്സോ കോടതി വെറുതെ വിട്ടു. പുന്നയൂര്‍ക്കുളം അണ്ടത്തോട് ഐനിക്കല്‍ വീട്ടില്‍ സലിം (45) നെയാണ് കുന്നംകുളം പോക്സോ കോടതി ജഡ്ജി എം.പി. ഷിബു കുറ്റക്കാരനല്ലന്ന് കണ്ട് വെറുതെ വിട്ടത്. കുന്നംകുളം പോക്സോ കോടതിയിലെ ആദ്യ വിധിയായിരുന്നു ഇന്നലെയുണ്ടായത്. പുന്നയൂര്‍ക്കുളം അണ്ടത്തോട് മുസ്ലിം പള്ളിക്ക് സമീപം താമസിക്കുന്ന പെണ്‍കുട്ടിയെ സലിം വിവാഹ വാഗ്ദാനം നല്‍കി പീഡിപ്പിച്ചുവെന്നാണ് കേസ്. 2012 ജനുവരി 19ന് ചാവക്കാട് സി.ഐയായിരുന്ന സുദര്‍ശനനാണ് കേസ് രജിസ്ട്രര്‍ ചെയ്ത് സലിമിനെ അറസ്റ്റ് ചെയ്തത്.
വിവാഹവാഗ്ദാനം നല്‍കി പെണ്‍കുട്ടിയെ ഗുരുവായൂര്‍, പട്ടാമ്പി,എറണാകുളം തുടങ്ങിയ സ്ഥലങ്ങളിലെ ലോഡ്ജില്‍ കൊണ്ടുപോയി പീഡിപ്പിച്ചുവെന്നാണ് പരാതി. പ്രതിയായിരുന്ന സലീമിന് ഭാര്യയും രണ്ടു കുട്ടികളുമുണ്ട്. സലിം വിവാഹിതനാകുന്നതിനുമുമ്പ് പെണ്‍കുട്ടിയുമായി പ്രണയം നടിക്കുകയും വിവാഹ വാഗ്ദാനം നല്‍കുകയും ചെയ്തിരുന്നു. ലോഡ്ജുകളില്‍ കൊണ്ടുപോയി പെണ്‍കുട്ടിയെ പീഡിപ്പിച്ചുവെന്ന പരാതിയില്‍ മതിയായ രേഖകള്‍ ഹാജരാക്കാന്‍ പൊലീസിന് കഴിഞ്ഞില്ലന്ന പ്രതിഭാഗം അഭിഭാഷകരായ എ. ഹരിദാസന്‍, പി.എ. പ്രദീപ് എന്നിവരുടെ വാദത്തിന്റെ അടിസ്ഥാനത്തിലാണ് കോടതി പ്രതിയായ സലീമിനെ വിട്ടയച്ചത്.