കമറുദ്ദീന്റെ , ബിസിനസ് പൊളിഞ്ഞതാണ്: ന്യായീകരിച്ച് ചെന്നിത്തല

ഫാഷന്‍ ഗോള്‍ഡ് നിക്ഷേപ തട്ടിപ്പു കേസില്‍ മഞ്ചേശ്വരത്തെ മുസ്ലിം ലീഗ് എംഎല്‍എ എം.സി. കമറുദ്ദീനെ ന്യായീകരിച്ച് ജ്ഞേശ് ചെന്നിത്തല രംഗത്തു വന്നു. കെ പി സി സി പ്രസിഡന്റ് നിയമത്തിന്റെ വഴി എന്ന പ്രതികരണം നടത്തിയത് ലീഗിന്റെ എതിര്‍പ്പിന് കാരണമായിരുന്നു.
അതിനാല്‍ കുഞ്ഞാലിക്കുട്ടിയുടെ പ്രീതി പിടിച്ചു പറ്റാനാണ് പുതിയ നീക്കം. കമറുദീന്‍ അഴിമതി നടത്തിയില്ലെന്നു കമറുദീന്റെ ബിസിനസ് പൊളിഞ്ഞുപോയതാണന്നുമാണ് ചെന്നിത്തലയുടെ വാദം. നാട്ടുകാരുടെ പണം നഷ്ടമായതിനെക്കുറിച്ച് ഒരു മറുപടിയും ചെന്നിത്തല നല്‍കിയില്ല.

അറസ്റ്റിലൂടെ സര്‍ക്കാര്‍ സ്വന്തം തെറ്റ് മറച്ചുവയ്ക്കാന്‍ തന്നെ ബലിയാടാക്കിയെന്ന് കമറുദ്ദീന്‍ എംഎല്‍എയും ആരോപിച്ചിരുന്നു. തിരഞ്ഞെടുപ്പ് മുന്നില്‍ കണ്ട് രാഷ്ട്രീയ പ്രേരിതമായ നീക്കമാണ് നടക്കുന്നത്. തിങ്കളാഴ്ച കേസ് ഹൈക്കോടതിയില്‍ വരുന്നുണ്ട്. എന്നാല്‍ അതിനുപോലും സര്‍ക്കാര്‍ കാത്തുനിന്നില്ല. അറസ്റ്റിന് മുന്‍പ് നോട്ടിസ് നല്‍കിയില്ല. തന്നെ തകര്‍ക്കാന്‍ കഴിയില്ലെന്നും വൈകാരികമായി എംഎല്‍എ പ്രതികരിച്ചു. കമറുദ്ദീനെ മെഡിക്കല്‍ പരിശോധനയ്ക്ക് കൊണ്ടു പോകുന്നതിനിടെയായിരുന്നു പ്രതികരണം.

ഏഴുവര്‍ഷം വരെ തടവുശിക്ഷ ലഭിക്കാവുന്ന കുറ്റങ്ങളാണ് കമറുദ്ദീനെതിരെ ചുമത്തിയത്. ഗൂഢാലോചന, സംഘം ചേര്‍ന്നുള്ള കുറ്റകൃത്യം എന്നീ കുറ്റങ്ങള്‍ ചുമത്തി. അറസ്റ്റ് രേഖപ്പെടുത്തിയത് ചന്ദേര പൊലീസ് റജിസ്റ്റര്‍ ചെയ്ത കേസുകളിലാണ്. കേസുമായി ബന്ധപ്പെട്ട് എംഎല്‍എയുടെ വീട്ടില്‍ നേരത്തേ റെയ്ഡ് നടത്തിയിരുന്നു. കാസര്‍കോട് പടന്നയിലെ വീട്ടിലാണ് റെയ്ഡ് നടത്തിയത്. അന്ന് വീട്ടില്‍നിന്നു കുറച്ചു രേഖകള്‍ കസ്റ്റഡിയില്‍ എടുക്കുകയും ചെയ്തിരുന്നു.