ഒടുവില്‍ പറവൂരിന് മന്ത്രിസ്ഥാനം ഇവിടെയല്ല അങ്ങ് ന്യൂസിലാന്റില്‍

ന്യൂസിലാന്‍ഡില്‍ ജസിന്‍ഡ ആര്‍ഡേന്‍ രണ്ടാമതും മന്ത്രിസഭ രൂപീകരിച്ചപ്പോള്‍ നോട്ടം പറവൂര്‍ നിവാസികള്‍ക്ക്. അവരുടെ നുാട്ടുകാരിയായ പ്രിയങ്ക രാധാകൃഷ്ണനും ജസിന്‍ഡയുടെ മന്ത്രിസഭയില്‍ അംഗമായി ഉണ്ട്. മന്ത്രിസഭയില്‍ യുവജനക്ഷേമം, സാമൂഹികം, സന്നദ്ധ മേഖലകളുടെ ചുമതലയാണ് പ്രിയങ്കയ്ക്ക് നല്‍കിയിരിക്കുന്നത്.
കുട്ടിക്കാലത്തു കുടുംബത്തോടൊപ്പം സിംഗപ്പുരിലെത്തിയ പ്രിയങ്ക പിന്നീട് ഉന്നതപഠനത്തിനായാണ് ന്യൂസിലാന്‍ഡിലേക്കു വന്നത്. എറണാകുളം ജില്ലയിലെ പറവൂര്‍ മാടവനപ്പറമ്പ് രാമന്‍ രാധാകൃഷ്ണന്‍-ഉഷ ദമ്പതികളുടെ മകളാണ് പ്രിയങ്ക രാധാകൃഷ്ണന്‍. ക്രൈസ്റ്റ് ചര്‍ച്ച സ്വദേശിയും ഐടി ജീവനക്കാരനുമായ റിച്ചാര്‍ഡ്‌സാണ് പ്രിയങ്കയുടെ ഭര്‍ത്താവ്. 14 വര്‍ഷമായി ജസിന്‍ഡയുടെ ലേബര്‍ പാര്‍ട്ടിയുടെ പ്രാദേശിക നേതാവാണ് പ്രിയങ്ക. പാര്‍ട്ടിയുടെ യുവജനവിഭാഗത്തില്‍ ശ്രദ്ധേയമായ പ്രവര്‍ത്തനം കാഴ്ചവെച്ചതു പരിഗണിച്ചാണ് ജസിന്‍ഡ, പ്രിയങ്കയെ മന്ത്രിസഭയില്‍ ഉള്‍പ്പെടുത്തിയത്.

വെല്ലിങ്ടണ്‍ സര്‍വകലാശാലയില്‍നിന്നാണ് പ്രിയങ്ക ബിരുദാനന്തര ബിരുദം നേടിയത്. ഡെവലപ്‌മെന്റ് സ്റ്റഡീസ് ആയിരുന്നു വിഷയം. പഠനശേഷം റിച്ചാര്‍ഡ്‌സിനെ വിവാഹം കഴിക്കുകയും ക്രൈസ്റ്റ് ചര്‍ച്ചില്‍ സ്ഥിരതാമസമാക്കുകയുമായിരുന്നു.