ജോസഫ് ഗ്രൂപ്പ് , കാര്യങ്ങള്‍ ഉമ്മന്‍ചാണ്ടി തീരുമാനിക്കും

കേരള കോണ്‍ഗ്രസ് മാണി വിഭാഗം മത്സരിച്ചതടക്കം മുഴുവന്‍ നിയമസഭ സീറ്റുകളും വിട്ടുതരണമെന്ന പി.ജെ. ജോസഫിന്റെ ആവശ്യം മുളയിലെ നുള്ളി കോണ്‍ഗ്രസ്. 15 സീറ്റാണ് ജോസഫ് പക്ഷം ആവശ്യപ്പെട്ടുന്നത്.

തദ്ദേശ-നിയമസഭ സീറ്റ് നിര്‍ണയവുമായി ബന്ധപ്പെട്ട് കോണ്‍ഗ്രസും കേരള കോണ്‍ഗ്രസ് ജോസഫ് വിഭാഗവും കോട്ടയത്ത് നടത്തിയ ഉഭയകക്ഷി ചര്‍ച്ചയിലാണ് വിജയസാധ്യത കണക്കിലെടുത്ത് ജോസ് വിഭാഗം മത്സരിച്ച മുഴുവന്‍ സീറ്റും വിട്ടുതരണമെന്ന നിര്‍ദേശം ജോസഫ് മുന്നോട്ടുവെച്ചത്.

ജില്ല പഞ്ചായത്തിലും മാണിവിഭാഗം മത്സരിച്ച സീറ്റുകളും ആവശ്യപ്പെട്ടിട്ടുണ്ട്. ഇടതുമുന്നണി പ്രവേശനത്തോടെ മാണി പക്ഷം മധ്യകേരളത്തില്‍ ദുര്‍ബലമായി. അണികള്‍ തങ്ങള്‍ക്കൊപ്പമാണ്. പ്രമുഖരടക്കം നേതാക്കള്‍ എത്തിക്കൊണ്ടിരിക്കുകയാണ്. അതിനാല്‍ വിജയസാധ്യത തങ്ങള്‍ക്കാണെന്നും ജോസഫ് ചൂണ്ടിക്കാട്ടി. ഇതിനോട് യോജിക്കാന്‍ കോണ്‍ഗ്രസ് നേതൃത്വം തയാറായില്ല. ഐ എ ഗ്രൂപ്പുകള്‍ ഒരുപോലെയാണ് ഇതിനെ എതിര്‍ത്തത്.

കോട്ടയത്ത് ജോസഫ് വിഭാഗത്തിനുള്ള ജയസാധ്യത കണക്കുകള്‍ സഹിതം കോണ്‍ഗ്രസ് നേതൃത്വം ചൂണ്ടിക്കാട്ടി. നിലവില്‍ മത്സരിച്ചതടക്കം എത്രസീറ്റുകള്‍ എന്നത് സംബന്ധിച്ച് വ്യക്തമായ തീരുമാനത്തിലെത്താന്‍ ചര്‍ച്ചയില്‍ ധാരണയാകാത്തതിനാല്‍ ഈമാസം 28ന് ഉമ്മന്‍ ചാണ്ടിയുടെ സാന്നിധ്യത്തില്‍ ജോസഫുമായി ചര്‍ച്ച നടത്താനും ധാരണയായി.