തലവേദനയാകുന്നു ജനതാദള്ളിലെ തര്‍ക്കം

ജോസ് കെ മാണി ഇടത്തേക്ക് വരുന്ന ഘട്ടത്തില്‍ ജനതാദള്ളില്‍ പിളര്‍പ്പുണ്ടായി ഒരു വിഭാഗം മുന്നണിവിടുമോ എന്ന് ആശങ്ക . കേന്ദ്ര നേതൃത്വത്തെ പോലും തള്ളി ഒരു കൂട്ടര്‍ സ്വന്തം തീരുമാനങ്ങളുമായി മുന്നോട്ടു പോകുന്നതാണ് പ്രശകനങ്ങള്‍ക്ക് കാരണം.

പാര്‍ട്ടിയിലെ ചേരിപ്പോരു ശക്തമായതിനെ തുടര്‍ന്നായിരുന്നു കേന്ദ്ര നേതൃത്വത്തിന്റെ ഇടപെടല്‍. അതാണ് ജനതാദള്‍ (എസ്) സംസ്ഥാന നേതൃത്വം തള്ളിയിരിക്കുന്നത്.
കോര്‍ കമ്മിറ്റി അംഗങ്ങളായ സി.കെ.നാണു, കെ.കൃഷ്ണന്‍കുട്ടി, മാത്യു ടി.തോമസ്, എ.നീലലോഹിതദാസ് എന്നിവരെ കേന്ദ്രീകരിച്ചുള്ള ചേരിതിരിവാണു ദളിനെ ആഭ്യന്തരക്കുഴപ്പത്തിലാക്കിയത്. ഇവര്‍ക്കിടയിലെ തര്‍ക്കം രൂക്ഷമായപ്പോള്‍ ഇടപെട്ട ദേശീയ അധ്യക്ഷന്‍ എച്ച്.ഡി.ദേവെഗൗഡ, നാണു എടുത്ത ചില പാര്‍ട്ടി നിയമനങ്ങള്‍ റദ്ദാക്കി.
ഇതു വ്യക്തമാക്കി ദള്‍ വര്‍ക്കിങ് പ്രസിഡന്റ് ബി.എം.ഫാറുഖ് നല്‍കിയ സര്‍ക്കുലര്‍ അംഗീകരിക്കാനാവില്ലെന്ന്, പക്ഷേ നാണു മറുപടി നല്‍കി. മന്ത്രി കൃഷ്ണന്‍കുട്ടിയും നീലനും ഉന്നയിച്ച പരാതികളുടെ അടിസ്ഥാനത്തിലായിരുന്നു ഗൗഡയുടെ ഇടപെടല്‍.
സംസ്ഥാന നിര്‍വാഹക സമിതി എടുത്ത തീരുമാനങ്ങള്‍ മാറ്റണമെങ്കില്‍ അതേ ഘടകം ചര്‍ച്ച ചെയ്‌തേ പറ്റൂവെന്നു പ്രസിഡന്റ് സി.കെ.നാണു കേന്ദ്ര നേതൃത്വത്തെ അറിയിച്ചു.

കോട്ടയം ജില്ലാ പ്രസിഡന്റായി മാത്യു ജേക്കബിനെ നിയമിച്ചതു റദ്ദാക്കണമെന്നു കേന്ദ്ര നേതൃത്വം ആവശ്യപ്പെട്ടതിന്റെ തൊട്ടടുത്ത ദിവസം മാത്യുവിന്റെ അധ്യക്ഷതയില്‍ ജില്ലാ നേതൃയോഗത്തില്‍ പങ്കെടുത്താണു നാണു ആ നിര്‍ദേശം നിരാകരിച്ചത്.

സംസ്ഥാന ജനറല്‍ സെക്രട്ടറിയായുള്ള ചന്ദ്രകുമാറിന്റെ നിയമനം ഉപേക്ഷിക്കണമെന്ന കേന്ദ്ര നിര്‍ദേശവും നാണു തള്ളി. സംസ്ഥാന നിര്‍വാഹക സമിതിയുടെ അംഗീകാരത്തോടെയാണ് ഈ രണ്ടു നിയമനങ്ങളുമെന്നും കേന്ദ്ര നിര്‍ദേശത്തിന്റെ പേരില്‍ അതു റദ്ദാക്കാന്‍ കഴിയില്ലെന്നും അദ്ദേഹം അറിയിച്ചു. നാണുവിനൊപ്പം നില്‍ക്കുന്ന ജോര്‍ജ് തോമസ് അദ്ദേഹം വഹിക്കുന്ന വനം വികസന കോര്‍പറേഷന്‍ അധ്യക്ഷ പദവി കേന്ദ്ര നിര്‍ദേശപ്രകാരം രാജിവച്ചെങ്കിലും കത്ത് നാണു കേന്ദ്രത്തിനു കൈമാറിയില്ല. രണ്ടു പദവികള്‍ വഹിക്കുന്നതിനാല്‍ അതിലൊന്ന് ഉപേക്ഷിക്കണമെന്നായിരുന്നു ഗൗഡയുടെ നിര്‍ദേശം.

മന്ത്രി കൃഷ്ണന്‍കുട്ടിയും നീലനും നാണുവിനെതിരെ ഗൗഡയ്ക്കു വീണ്ടും പരാതി നല്‍കി. പ്രശ്‌നം ചര്‍ച്ച ചെയ്യാന്‍ ഇന്നലെ സംസ്ഥാന നേതൃയോഗം വിളിച്ചെങ്കിലും കോവിഡ് വ്യാപനം ചൂണ്ടിക്കാട്ടി മാറ്റിവച്ചു.