140 നീതുമാര്‍ വരുന്നു അനില്‍ അക്കരെയെ കാണാന്‍

രാഷ്ട്രീയ പോരിന്റെ പേരില്‍ തങ്ങളെ വഴിയാധാരമാക്കിയ എം എല്‍ എ യ്‌ക്കെതിരെ ഭവന രഹിതരുടെ പ്രക്ഷോഭം ശക്തമാവുന്നു. ഇല്ലാത്ത ഉപയോക്താവിനെ സൃഷ്ടിച്ച് മാധ്യമങ്ങളില്‍ നിറഞ്ഞു നിന്ന തങ്ങളുടെ ജനനേതാവിനെ കണ്ട് അവര്‍ പരാതി ഉന്നയിക്കും.
മുടങ്ങിപ്പോയ ഭവന പദ്ധതിക്ക് പകരം താമസിക്കാന്‍ ഒരു വീടാന്‍ അവരുടെ ആവശ്യം. ഗുണഭോക്താക്കളുടെ സമരത്തിന് കഴിഞ്ഞ ദിവസം തുടക്കം കുറിച്ചിരുന്നു.
ഭൂമിയും വീടുമില്ലാത്ത 140 കുടുംബങ്ങളുടെ പ്രതീക്ഷ തല്ലിക്കെടുത്തിയവര്‍ക്ക് മാപ്പില്ലെന്ന മുദ്രാവാക്യവുമായി ഭവനരഹിതരുടെ സത്യഗ്രഹമാണ് നടന്നത്. വടക്കാഞ്ചേരിയില്‍ വീടും ഭൂമിയുമില്ലാത്തവര്‍ ഇല്ലെന്ന എംഎല്‍എയുടെ പ്രചാരണത്തിനെതിരെയും പ്രതിഷേധം അലയടിച്ചു.

അനില്‍ അക്കര എംഎല്‍എയുടെ വീടിനടുത്ത് പുറനാട്ടുകര വിളക്കുംകാല്‍ ജങ്ഷനിലും വടക്കാഞ്ചേരി മങ്കരയിലുമായിരുന്നു ഗാന്ധിജയന്തി ദിനത്തില്‍ സത്യഗ്രഹം. ലൈഫില്‍ ഭൂമിക്കും വീടിനുമായി അപേക്ഷിച്ച് കാത്തിരിക്കുന്ന കുടുംബങ്ങളും സിപിഐ എം പ്രവര്‍ത്തകരും പങ്കാളികളായി.

വിളക്കുംകാല്‍ ജങ്ഷനിലും മങ്കരയിലും നടന്ന സത്യഗ്രഹം സിപിഐ എം ജില്ലാ സെക്രട്ടറിയറ്റംഗം സേവ്യര്‍ ചിറ്റിലപ്പിള്ളി ഉദ്ഘാടനംചെയ്തു. അടാട്ട് പഞ്ചായത്ത് മെമ്പര്‍ പുഷ്പലത രാധാകൃഷ്ണന്‍ അധ്യക്ഷയായി. മങ്കരയില്‍ എന്‍ അനില്‍കുമാര്‍ അധ്യക്ഷനായി.