ഇന്ത്യയില്‍15ൽ ഒരാൾ രോഗി സെറോ സർവേഫലം

രാജ്യത്ത്‌ പത്തുവയസ്സിനു മുകളിൽ 15ൽ ഒരാൾക്ക്‌ ഇതിനോടകം കോവിഡ്‌ ബാധിച്ചെന്ന്‌ ഐസിഎംആറിന്റെ രണ്ടാം സെറോ സർവേ. 10 വയസ്സ്‌ കഴിഞ്ഞവരില്‍ 6.6 ശതമാനത്തിനും രോ​ഗമുണ്ടെന്നാണ്‌ ആഗസ്‌ത്‌ 17 മുതൽ സെപ്‌തംബർ 22 വരെയുള്ള രണ്ടാം സെറോ സർവേ  തെളിയിക്കുന്നത്‌. 18 വയസ്സിനു മുകളിലുള്ളവരില്‍ 7.1 ശതമാനം രോഗികള്‍‌. നഗരങ്ങളിലെ ചേരികളിലൽ 15.6 ശതമാനവും രോ​ഗികളായി. മറ്റ്‌ നഗരമേഖലകളിൽ 8.2 ശതമാനം രോ​ഗികള്‍. ഗ്രാമീണമേഖലകളിൽ 4.4 ശതമാനം പേരാണ്‌ രോഗബാധിതർ. 21 സംസ്ഥാനത്തെ 70 ജില്ലയിലെ 700 വാർഡിലാണ്‌ സർവേ നടത്തിയത്‌. മരണം 97,000 കടന്നു രാജ്യത്തെ കോവിഡ്‌ മരണം 97,000 കടന്നു. 24 മണിക്കൂറില്‍ 776 മരണം. ഇതിൽ 23 ശതമാനവും മഹാരാഷ്ട്രയില്‍. രോ​ഗികളുടെ എണ്ണം 62 ലക്ഷം കടന്നു. 24 മണിക്കൂറിൽ 70,589 രോ​ഗികള്‍. പുതിയ കേസുകളിൽ 73 ശതമാനവും കേരളം ഉൾപ്പെടെ പത്ത് സംസ്ഥാനത്ത്‌.  കോവിഡ്‌ രോഗമുക്തിനിരക്ക് 83 ശതമാനം പിന്നിട്ടു. കേരളത്തിൽ രോഗികളുടെ എണ്ണം വർധിക്കുന്നതിൽ കേന്ദ്രം ആശങ്ക പ്രകടിപ്പിച്ചു. തമിഴ്നാട്ടിൽ പ്രതിദിന രോഗികളുടെ എണ്ണത്തിൽ സ്ഥിരത വന്നു‌. ആന്ധ്ര, കർണാടകം, യുപി, അസം എന്നിവിടങ്ങളിലും സ്ഥിതി സമാനം‌. എന്നാൽ, കേരളത്തിൽ ഭിന്നസാഹചര്യമാണെന്ന് ആരോഗ്യസെക്രട്ടറി രാജേഷ് ഭൂഷൺ പറഞ്ഞു.