ലൈഫ് സി ബി ഐ അന്വേഷണം യു എ ഇ കോണ്‍സിലിലേറ്റിലേക്ക്

രാഷ്ട്രീയ വിവാദമായിമാറിയ ലൈഫ് പദ്ധതിയിലെ കമ്മീഷന്‍ ഇടപാടിലും അന്വേഷണം നീങ്ങുന്നത് യു എ ഇ കോണ്‍സിലേറ്റിലെ ഉദ്യോഗസ്ഥരിലേക്ക്. ഇക്കാര്യം പുറത്തുകൊണ്ടുവന്ന എന്‍ എ ഐ യും പ്രശ്‌നത്തില്‍ കോണ്‍സിലേറ്റിലെ ഉദ്യോഗസ്ഥരെ ചോദ്യം ചെയ്യണമെന്ന് ആവശ്യപ്പെട്ടിരുന്നു. പണം നല്‍കിയതായി പറയുന്ന കമ്പനി ഉടമയുടെ മൊഴിയെ തുടര്‍ന്നാണ് അന്വേഷണം വീണ്ടും അവരിലേക്ക് എത്തുന്നത്. ലൈഫ് മിഷനുള്ള കരാര്‍ എന്ന നിലയിലല്ല 20 കോടി രൂപയുടെ വിദേശധനസഹായം ലഭിച്ച വടക്കാഞ്ചേരിയിലെ ലൈഫ് മിഷന്‍ ഭവനസമുച്ചയത്തിന്റെ നിര്‍മാണക്കരാര്‍ ഒരു തുടക്കം മാത്രമെന്നു സിബിഐ കേസിലെ ഒന്നാം പ്രതി യൂണിടാക് മാനേജിങ് ഡയറക്ടര്‍ സന്തോഷ് ഈപ്പന്‍ മൊഴി നല്‍കി. നിര്‍മാണം മികച്ച രീതിയില്‍ പൂര്‍ത്തിയാക്കിയാല്‍ വിദേശഫണ്ട് ഇനിയും ലഭിക്കുമെന്ന് ഉറപ്പു നല്‍കിയതു തിരുവനന്തപുരം യുഎഇ കോണ്‍സുലേറ്റിലെ അക്കൗണ്ടന്റായിരുന്ന ഈജിപ്ഷ്യന്‍ പൗരന്‍ ഖാലിദാണെന്നും സന്തോഷ് മൊഴി നല്‍കി. നിര്‍മാണക്കരാര്‍ ലഭിച്ചതിന്റെ കമ്മിഷന്‍ തുകയില്‍ 3.50 കോടി രൂപ കൈമാറിയതിന്റെ തെളിവുകള്‍ യൂണിടാക്ക് സിബിഐക്ക് നല്‍കി. സ്വപ്ന നിര്‍ദേശിച്ചതനുസരിച്ചു 75 ലക്ഷം രൂപയാണു സ്വര്‍ണക്കടത്തു കേസിലെ കൂട്ടുപ്രതികളായ സന്ദീപ് നായര്‍, പി.എസ്.സരിത്ത് എന്നിവരുടെ സ്ഥാപനമായ ഐസോമോങ്കിന്റെ അക്കൗണ്ടില്‍ സന്തോഷ് ഈപ്പന്‍ നിക്ഷേപിച്ചത്. ഖാലിദിനു കൈമാറിയ തുക വിദേശകറന്‍സിയായാണു നല്‍കിയത്. പ്രളയദുരിതാശ്വാസ പ്രവര്‍ത്തനങ്ങളുടെ മറവില്‍ കമ്മിഷന്‍ വ്യവസ്ഥയില്‍ കേരളത്തിലേക്കു വിദേശഫണ്ട് എത്തുന്നതിന്റെ വിശദാംശങ്ങള്‍ അറിയാവുന്നത് ഖാലിദിനും സ്വപ്ന സുരേഷിനുമാണ്. ഖാലിദിനെ ഇന്ത്യയിലെത്തിച്ചു ചോദ്യം ചെയ്യാന്‍ കഴിയുമെന്ന് ഉറപ്പില്ലാത്തതിനാല്‍ സ്വപ്ന സുരേഷിന്റെ കസ്റ്റഡിയില്‍ വാങ്ങി ചോദ്യം ചെയ്യാന്‍ സിബിഐ കോടതിയെ സമീപിക്കും.