കൊച്ചിയില്‍ കോണ്‍ഗ്രസ് വെട്ടില്‍, കോടികള്‍ മുടക്കിയിട്ടും ഫ്‌ളാറ്റ് ആയില്ല

ലൈഫ് പദ്ധതിക്കെതിരെ അഴിമതി ആരോപണം ഉന്നയിക്കുന്ന കോണ്‍ഗ്രസ് കൊച്ചി കോര്‍പ്പറേഷന്‍ ഭവന പദ്ധതിയില്‍ കോടികളുടെ തട്ടിപ്പ് നടത്തിയെന്ന് ആരോപണം. രാജീവ് ആവാസ് യോജന പദ്ധതി (റേ) പദ്ധതി മേയറുടെ നേതൃത്വത്തില്‍ അട്ടിമറിച്ചെന്ന പെര്‍ഫോമന്‍സ് ഓഡിറ്റ് റിപ്പോര്‍ട്ട് കഴിഞ്ഞദിവസം പുറത്തുവന്നതോടെയാണ് വിവാദമായിരിക്കുന്നത്. കൊച്ചിയിലെ 398 കുടുംബങ്ങള്‍ക്കായി തുരുത്തി കോളനിയില്‍ 12 നിലകളുള്ള രണ്ടു ഭവനസമുച്ചയങ്ങളാണ് റേ പദ്ധതിയില്‍ ഉള്‍പ്പെടുത്തിയിരുന്നത്. ആദ്യം 198 കുടുംബങ്ങള്‍ക്കായി 300 ചതുരശ്രയടി വീതമുള്ള ഒരു ഭവനസമുച്ചയ നിര്‍മാണത്തിനായി 14.75 കോടി രൂപയുടെ എസ്റ്റിമേറ്റ് തയ്യാറാക്കി. ആദ്യ ടെന്‍ഡറില്‍ പങ്കെടുത്ത രണ്ടു കമ്പനികളെയും സാങ്കേതികജ്ഞാനമില്ലെന്ന കാരണത്താല്‍ ഒഴിവാക്കി. തുടര്‍ന്ന് നടന്ന ടെന്‍ഡറില്‍ ആദ്യം അയോഗ്യരെന്നു കണ്ടെത്തിയ സിറ്റ്കോ അസോസിയറ്റ്സ് എന്ന കമ്പനിമാത്രം പങ്കെടുത്ത് എസ്റ്റിമേറ്റ് തുകയേക്കാള്‍ 23.7 ശതമാനം അധികതുക ക്വാട്ട് ചെയ്തു. ഏക ടെന്‍ഡര്‍മാത്രമായതിനാലും എസ്റ്റിമേറ്റ് തുകയേക്കാള്‍ 3.84 കോടി രൂപ അധികം ക്വാട്ട് ചെയ്തതിനാലും സിറ്റ്കോയെ ഒഴിവാക്കേണ്ടതായിരുന്നു. എന്നാല്‍, ആദ്യം അയോഗ്യരെന്നു കണ്ടെത്തിയ സിറ്റ്കോയെത്തന്നെ കരാര്‍ ഏല്‍പ്പിച്ചു. 2017 ഫെബ്രുവരിയില്‍ ആരംഭിച്ച് രണ്ടുവര്‍ഷംകൊണ്ട് ഫ്‌ലാറ്റിന്റെ നിര്‍മാണം പൂര്‍ത്തീകരിക്കുമെന്നാണ് കോര്‍പറേഷനുമായി ഉണ്ടാക്കിയ കരാര്‍. സമയം കഴിഞ്ഞിട്ടും 12 നിലകളുള്ള ഫ്‌ലാറ്റിന്റെ ഒന്നാംനിലയുടെ കോളത്തിന്റെ നിര്‍മാണം ആരംഭിക്കുന്നതുവരെയേ കരാര്‍ കമ്പനി ചെയ്തുള്ളൂ. സമയബന്ധിതമായി പൂര്‍ത്തീകരിക്കാത്ത കരാറുകാരനെതിരെ നിയമ നടപടി സ്വീകരിക്കുന്നതിനുപകരം ഇവരുടെ സെക്യൂരിറ്റി ഡിപ്പോസിറ്റ് തുകയായ 91,22,875 രൂപ കൗണ്‍സിലിന്റെ അനുവാദമില്ലാതെ മേയര്‍ തിരിച്ചുനല്‍കി. ഇതിനെതിരെ എല്‍ഡിഎഫ് കൗണ്‍സിലര്‍മാര്‍ മന്ത്രിക്ക് പരാതി നല്‍കിയിരുന്നു. തുടര്‍ന്ന് സംസ്ഥാന പെര്‍ഫോമന്‍സ് ഓഡിറ്റ് വിഭാഗം മേയറുടെയും ഉദ്യോഗസ്ഥരുടെയും പരാതിക്കാരുടെയും മൊഴിയെടുത്തു. ആവശ്യമായ ഫയലുകള്‍ പരിശോധിക്കുകയും നിര്‍മാണസ്ഥലം നേരില്‍ സന്ദര്‍ശിക്കുകയും ചെയ്ത് തയ്യാറാക്കിയ വിശദമായ റിപ്പോര്‍ട്ടില്‍ ഗുരുതരമായ വീഴ്ചയാണ് ചൂണ്ടിക്കാണിച്ചിട്ടുള്ളത്. എന്നാല്‍, റേ പദ്ധതിയിലെ ഗുരുതരമായ അഴിമതി രാഷ്ട്രീയപ്രേരിതമാണെന്നു പറഞ്ഞ് തടിയൂരാനാണ് മേയര്‍ ശ്രമിക്കുന്നത്. പെര്‍ഫോമന്‍സ് ഓഡിറ്റ് റിപ്പോര്‍ട്ടിന്റെ അടിസ്ഥാനത്തില്‍ മേയര്‍ക്കെതിരെ വിജിലന്‍സ് കേസ് എടുത്ത് അറസ്റ്റ് ചെയ്യണമെന്ന് പ്രതിപക്ഷനേതാവ് കെ ജെ ആന്റണിയും എല്‍ഡിഎഫ് പാര്‍ലമെന്ററി പാര്‍ടി സെക്രട്ടറി വി പി ചന്ദ്രനും ആവശ്യപ്പെട്ടു. മേയറെ അറസ്റ്റ് ചെയ്യണമെന്ന് ആവശ്യപ്പെട്ട് നാളെ നഗരസഭാ കവാടത്തിനുമുന്നില്‍ എല്‍ഡിഎഫ് കൗണ്‍സിലര്‍മാര്‍ സമരം നടത്തുകയാണ്.