പാലാരിവട്ടം പാലം കരാറുകാരില്‍ നിന്ന് പണം ഈടാക്കണം : ഇബ്രാഹിം കുഞ്ഞ്

പാലാരിവട്ടം പാലത്തില്‍ തകരാര്‍ കണ്ടെത്തിയതിനാല്‍ പുതുക്കിപ്പണിയുന്നതാണ് ശരിയെന്ന് മുന്‍ പൊതുമരാമത്ത്് മന്ത്രി ഇബ്രാഹിം കുഞ്ഞ്. പാലം പുതുക്കിപ്പണിയുന്നതുമൂലം സര്‍ക്കാരിന് നഷ്ടമില്ല. സുപ്രീം കോടതി വിധി അംഗീകരിക്കുന്നു. ആവശ്യമെങ്കില്‍ നിയമനടപടിയിലൂടെ നിര്‍മാണക്കമ്പനിയില്‍നിന്ന് നഷ്ടപരിഹാരം ഈടാക്കാം. തന്നെ കുരുക്കാന്‍ പലതവണ ശ്രമം നടന്നെന്നും ഇബ്രാഹിം കുഞ്ഞ് പറഞ്ഞു. പാലാരിവട്ടം പാലം പൊളിച്ചു പണിയാന്‍ സംസ്ഥാന സര്‍ക്കാരിന് ഇന്നലെ സുപ്രീം കോടതി അനുമതി നല്‍കിയിരുന്നു. ഭാരപരിശോധന വേണമെന്ന ഹൈക്കോടതിയുടെ ഉത്തരവ് സുപ്രീം കോടതി റദ്ദാക്കുകയും ചെയ്തു. ജസ്റ്റിസ് ആര്‍.എഫ്.നരിമാന്‍ അധ്യക്ഷനായ ബെഞ്ചിന്റേതാണു ഉത്തരവ്. ഇതിനിടെ പാലാരിവട്ടത്ത് പുതിയ മേല്‍പ്പാലം നിര്‍മിക്കേണ്ടതിന്റെ ചെലവ് മുന്‍മന്ത്രി വി കെ ഇബ്രാഹിംകുഞ്ഞില്‍നിന്നും നിര്‍മാണക്കമ്പനിയില്‍നിന്നും ഈടാക്കണമെന്ന് സിപിഐ എം ജില്ലാ സെക്രട്ടറിയറ്റ് ആവശ്യപ്പെട്ടു. ഇബ്രാഹിംകുഞ്ഞിന്റെ സ്വത്ത് കണ്ടുകെട്ടുന്നതിനുള്ള നടപടി സ്വീകരിക്കണം. പാലാരിവട്ടം പാലം പൊളിച്ചുപണിയണമെന്ന സര്‍ക്കാര്‍വാദം പൂര്‍ണമായും അംഗീകരിക്കുന്നതാണ് സുപ്രീംകോടതി വിധി. സിപിഐ എമ്മും ജില്ലയിലെ ഇടതുപക്ഷ ജനാധിപത്യ മുന്നണിയും തുടര്‍ച്ചയായി നടത്തിയ പ്രക്ഷോഭങ്ങളുടെ ഫലമായാണ് സര്‍ക്കാരും മുഖ്യമന്ത്രിയും പ്രശ്നത്തില്‍ ഇടപെട്ടത്. വിവിധ പഠനങ്ങളില്‍ പാലം പൊളിക്കണമെന്ന് നിര്‍ദേശിച്ചെങ്കിലും ഒരുവിഭാഗം മാധ്യമങ്ങളും യുഡിഎഫ് നേതൃത്വവും കരാര്‍ കമ്പനിയും കിറ്റ്‌കോയും ഇതിനെതിരെ നിലപാടെടുത്തു. തുടര്‍ന്ന്, സര്‍ക്കാര്‍ ഇ ശ്രീധരനെ ചുമതലപ്പെടുത്തി. അദ്ദേഹവും പാലം അടിയന്തരമായി പൊളിച്ചുമാറ്റണമെന്ന റിപ്പോര്‍ട്ടാണ് നല്‍കിയത്. പാലത്തില്‍ ഭാര പരിശോധന നടത്തണമെന്ന ഹൈക്കോടതി ഉത്തരവ് റദ്ദാക്കിയാണ് സുപ്രീംകോടതി വിധി. അന്നത്തെ പൊതുമരാമത്തുമന്ത്രി വി കെ ഇബ്രാഹിംകുഞ്ഞും അഴിമതിക്കാരായ ഉദ്യോഗസ്ഥകൂട്ടാളികളും ചേര്‍ന്ന് നടത്തിയ ഭയാനകമായ അഴിമതിയുടെ ഉല്‍പ്പന്നമാണ് അഴിമതിപ്പാലം. ഇബ്രാഹിംകുഞ്ഞിനെതിരായ വിജിലന്‍സ് അന്വേഷണം വേഗത്തില്‍ പൂര്‍ത്തീകരിച്ച് ശിക്ഷാ നടപടി സ്വീകരിക്കണമെന്നും ജില്ലാ സെക്രട്ടറിയറ്റ് വാര്‍ത്താക്കുറിപ്പില്‍ ആവശ്യപ്പെട്ടു.