ഇറാനെതിരെ വീണ്ടും ഉപരോധം , യുഎൻ പിന്തുണയില്ല

അമേരിക്ക ആവശ്യപ്പെടുന്നതുപോലെ ഇറാനെതിരെ വീണ്ടും ഉപരോധം അടിച്ചേൽപ്പിക്കുന്നതിന്‌ ഐക്യരാഷ്‌ട്ര സംഘടനയുടെ പിന്തുണയില്ലെന്ന്‌ സെക്രട്ടറി ജനറൽ അന്തോണിയോ ഗുട്ടെറസ്‌ വ്യക്തമാക്കി. യുഎൻ രക്ഷാസമിതിയുടെ അനുമതിയില്ലാതെ ഉപരോധത്തെ പിന്തുണയ്‌ക്കില്ലെന്നും രക്ഷാസമിതിയുടെ അധ്യക്ഷന്‌ അയച്ച കത്തിൽ ഗുട്ടെറസ്‌ അറിയിച്ചു. ഇറാനും വൻശക്തികളും തമ്മിലുണ്ടാക്കിയ കരാറിൽനിന്ന്‌ ഏകപക്ഷീയമായി പിൻവാങ്ങിയ അമേരിക്ക, കരാർ അംഗീകരിച്ച യുഎൻ പ്രമേയത്തിലെ ‘സ്‌നാപ്‌ബാക്‌’ അധികാരം ഉപയോഗിച്ചിട്ടുണ്ടോ എന്ന കാര്യത്തിൽ അനിശ്ചിതത്വമുള്ളതായാണ്‌ കാണുന്നതെന്ന്‌ ഗുട്ടെറസ്‌ പറഞ്ഞു. സ്‌നാപ്‌ബാക്‌ അധികാരം ഉപയോഗിച്ച്‌ ഉപരോധം പുനഃസ്ഥാപിച്ചതായി അമേരിക്ക അവകാശപ്പെടുമ്പോൾ കരാറിൽനിന്ന്‌ പിൻവാങ്ങിയ അമേരിക്കയ്‌ക്ക്‌ സ്‌നാപ്‌ബാക്‌ അധികാരമില്ലെന്ന നിലപാടിലാണ്‌ മറ്റ്‌ വൻശക്തികൾ. അതേസമയം, ഇറാനുമായുള്ള ആണവകരാർ സംരക്ഷിക്കുന്നതിൽ യൂറോപ്യൻ യുണിയന്റെ പ്രതിബദ്ധത വിദേശനയകാര്യത്തിൽ ഇയുവിന്റെ ഉന്നതപ്രതിനിധിയായ ജോസിപ്‌ ബോറെൽ വ്യക്തമാക്കി. അമേരിക്ക യുഎന്നിന്റെ പേരിൽ സംസാരിക്കേണ്ട എന്ന്‌ റഷ്യ പറഞ്ഞു. അമേരിക്ക സ്വയം ഒറ്റപ്പെട്ടിരിക്കുകയാണെന്നും മഹത്തായ ഒരു രാജ്യം ഇങ്ങനെ സ്വയം അവഹേളിക്കുന്നത്‌ ദുഃഖകരമാണെന്നും യുഎന്നിലെ റഷ്യൻ ഉപസ്ഥാനപതി ദിമിത്രി പോളിയാൻസ്‌കി ട്വീറ്റിൽ പറഞ്ഞു. അമേരിക്ക യുഎന്നിൽ രാഷ്‌ട്രീയ നാടകം അവസാനിപ്പിക്കേണ്ട സമയമായെന്ന്‌ ചൈന പ്രതികരിച്ചു.