ഇപ്പോഴും വിദേശത്തേക്ക് ഒഴുകുന്നു കള്ളപ്പണം

ഇന്ത്യക്കാര്‍ വിദേശ ബാങ്കുകളില്‍ നടത്തിയ സംശയകരമായ ആയിരക്കണക്കിന് ഇടപാടുകളുടെ വിവരം അമേരിക്കന്‍ ഏജന്‍സി പുറത്തുവിട്ടു. വിദേശത്ത് ഇന്ത്യക്കാര്‍ നിക്ഷേപിച്ച കള്ളപ്പണം തിരികെക്കൊണ്ടുവരുമെന്ന് പ്രഖ്യാപിച്ച് 2014ല്‍ അധികാരത്തിലെത്തിയ നരേന്ദ്രമോഡി സര്‍ക്കാരിന്റെ വിശ്വാസ്യത പാടെ തകര്‍ക്കുന്നതാണ് അമേരിക്കന്‍ ധനവ്യയവകുപ്പ് ഏജന്‍സി ഫിനാന്‍ഷ്യല്‍ ക്രൈംസ് എന്‍ഫോഴ്സ്മെന്റ് നെറ്റ്വര്‍ക്ക്(ഫിന്‍സെന്‍) പുറത്തുവിട്ട രേഖകള്‍. 1999--2017 കാലത്തെ ഇടപാടുകളുടെ രേഖകളാണ് പുറത്തു വന്നത്. വിവാദ വജ്രവ്യാപാരി, പാപ്പരായി പ്രഖ്യാപിച്ച ഉരുക്കുകമ്പനി, ആഡംബര കാര്‍ ഡീലര്‍, ഐപിഎല്‍ ടീമിന്റെ സ്പോണ്‍സര്‍ എന്നിവരുടെ അടക്കം 3,201 സംശയകരമായ ഇടപാടുകള്‍ രേഖകളിലുണ്ട്. മൊത്തം 153 കോടി ഡോളറിന്റെ(11,000ല്‍പരം കോടി രൂപ) ഇടപാടുകളില്‍ അയച്ച വ്യക്തിയുടെയും ബാങ്കുകളുടെയും ഗുണഭോക്താവിന്റെയും ഇന്ത്യയിലെ മേല്‍വിലാസവുമുണ്ട്. പുറത്തുള്ള വിലാസങ്ങളിലൂടെയും ആയിരക്കണക്കിന് ഇടപാടുകള്‍ നടന്നു. സ്വിസ് ലീക്ക്സ്(2015), പനാമ പേപ്പേഴ്സ്(2016), പാരഡൈസ് പേപ്പേഴ്സ്(2017) എന്നീ അന്വേഷണ പരമ്പരകള്‍ വഴി കള്ളപ്പണ നിക്ഷേപകരുടെ വിവരങ്ങള്‍ പുറത്തുവന്നിട്ടും സര്‍ക്കാര്‍ അനങ്ങിയിരുന്നില്ല. 2ജി കുംഭകോണവുമായി ബന്ധപ്പെട്ട കമ്പനികള്‍, എയര്‍സെല്‍--മാക്സിസ് അഴിമതിയുമായി ബന്ധപ്പെട്ടവര്‍, അഗസ്തവെസ്റ്റ്ലാന്‍ഡ് കേസിലെ ഇടപാടുകാര്‍ എന്നിവരും രേഖകളില്‍ പരാമര്‍ശിക്കപ്പെടുന്നു.