മലബാര്‍ രാഷ്ട്രീയത്തില്‍ പിടിമുറുക്കാന്‍ കാന്തപുരം

ബിജെപിക്കൊപ്പം ഖുറാന്‍ വിതരണവിരുദ്ധ സമരത്തില്‍ ചേര്‍ന്ന ലീഗിനെ വെട്ടിലാക്കി മലബാര്‍ മേഖലയില്‍ പുതിയ രാഷ്ട്രീയ നീക്കം. ഇതുവരെ സജീവരാഷ്ട്രീയത്തില്‍ വലിയ ഇടപെടലുകള്‍ നടത്താതിരുന്ന കാന്തപുരം സുന്നിവിഭാഗം ലീഗിനെയും ബി ജെ പി യെയും തുറന്ന് എതിര്‍ത്തുകൊണ്ട് രംഗത്തുവന്നിരിക്കുകയാണ്. ഡല്‍ഹിയില്‍ നിന്ന് തിരികെ എത്തി പി കെ ഫിറോസിനെകൊണ്ട് ചുടു ചോറു വാരിപ്പിക്കുന്ന കുഞ്ഞാലിക്കുട്ടിക്ക് പാര്‍ട്ടിക്കകത്തുനിന്നും പുറത്തുനിന്നും ഒരുപോലെ എതിര്‍പ്പ് നേരിടേണ്ടി വന്നിരിക്കുകയാണ്. എം കെ മുനീറിന്റെ നേതൃത്വത്തിലുള്ള വിഭാഗവും, സമസ്ത പോലുള്ള സംഘടനകളും പരിശുദ്ധ ഖുറാന്‍നെ കള്ളക്കടത്ത് കേസില്‍ വലിച്ചിഴയ്ക്കുന്ന സമരരീതിക്കെതിരെ ശക്ത വിയോജിപ്പ് കഴിഞ്ഞ ദിവസം പാണക്കാട്ട് എത്തി അറിയിച്ചിരുന്നു. അതിനു പിന്നാലെയാണ് കാന്തപുരത്തിന്റെ പരസ്യനീക്കം. സംസ്ഥാന സര്‍ക്കാരിനെതിരായ സമരനിരയില്‍ കോലീബി സഖ്യം ഒന്നിച്ച് അവതരിച്ചിരിക്കയാണെന്ന് കാന്തപുരം വിഭാഗം. കോണ്‍ഗ്രസിനും മുസ്ലിംലീഗിനും ബിജെപിക്കും ഒരേ ഭാഷയും സ്വരവും അജന്‍ഡയുമാണ്. ഭരണത്തുടര്‍ച്ചാ ഭീതിയാണിപ്പോഴത്തെ കോലാഹലങ്ങള്‍ക്ക് കാരണം. സ്വര്‍ണക്കടത്തോ ഖുര്‍ആന്‍ കടത്തോ ലൈഫ് മിഷനോ ഒന്നുമല്ല വിഷയമെന്നും കാന്തപുരം വിഭാഗം സുന്നികള്‍ വ്യക്തമാക്കുന്നു. മുഖപത്രമായ 'സിറാജി'ല്‍ ഒ എം തരുവണ- എഴുതിയ 'രാഷ്ട്രീയ ലാഭത്തിനുള്ള തീക്കളികള്‍' എന്ന ലേഖനത്തിലാണ് പ്രതിപക്ഷത്തിന്റെയും ബിജെപിയുടെയും രാഷ്ട്രീയ നീക്കത്തെ വിമര്‍ശിച്ചിരിക്കുന്നത്. ശ്രദ്ധിച്ചില്ലെങ്കില്‍ ചെന്നിത്തലയെയും സുരേന്ദ്രനെയും കുഞ്ഞാപ്പയെയും വച്ചുമാറിപ്പോകും. ചില്ലിക്കാശിന്റെ ചെലവില്ലാതെ മനോഹരമായി ബിജെപി അജന്‍ഡകള്‍ കേരളത്തില്‍ കോണ്‍ഗ്രസ് നടപ്പാക്കുകയാണ്. ലീഗ് ഉള്‍പ്പെടെയുള്ള യുഡിഎഫ് എന്ന വിശാല പ്ലാറ്റ്ഫോം, ഇടപാടില്‍ ബിജെപിക്ക് കിട്ടിയ അധിക ലാഭമാണ്. അതു തിരിച്ചറിഞ്ഞല്ലങ്കില്‍ കേരളത്തിനാണ് നാശമെന്ന് അവര്‍ പറയുന്നു. ജലീലിനെ രണ്ടര മണിക്കൂര്‍ ചോദ്യംചെയ്തത് പ്രശ്നമാകുന്നതും ചിദംബരത്തെ 70 മണിക്കൂര്‍ ചോദ്യം ചെയ്തത് വിഷയമല്ലാതാകുന്നതും വലതുമുന്നണി എത്തിയ സ്ഥലജലവിഭ്രമത്തിന്റെ അടയാളമാണ്. മന്ത്രി ജലീലിനെതിരായ ഈ പടപ്പുറപ്പാട് ആപത്ക്കരമാണ്. യുഎഇയുമായുള്ള സൗഹൃദത്തെയും കരുതലിനെയും സംശയത്തിന്റെയും അവിശ്വാസത്തിന്റെയും നിഴലില്‍ നിര്‍ത്തുന്ന നടപടികള്‍ ആത്മഹത്യാപരമായിരിക്കും. വച്ചത് ജലീലിനാണെങ്കിലും കൊളളുന്നത് ഒരു സമുദായത്തിന് ഒന്നാകെയാണ്. ചില്ലറ രാഷ്ട്രീയ ലാഭത്തിനുവേണ്ടി ഈ തീക്കളി കളിക്കരുതെന്നും ലേഖനം ഓര്‍മിപ്പിക്കുന്നു.