പ്രതികൂല കാലാവസ്ഥയിൽ വൈമാനികർക്ക് റൺവേ കാണാൻ സഹായകമാകുന്ന സംവിധാനമാണ് ഐഎൽഎസ്. 2 ഐഎൽഎസ് ആണു കരിപ്പൂരിൽ ഉള്ളത്. ഒന്ന് കഴിഞ്ഞ മാസം 7നു വിമാനാപകടത്തെത്തുടർന്നു കേടായിരുന്നു. മറ്റൊന്നു കഴിഞ്ഞ ദിവസവും കേടായി. ഇതോടെ ശക്തമായ മഴയിൽ വിമാനം ഇറങ്ങാനാകാതെ തിരിച്ചുവിടേണ്ടി വന്നിരുന്നു. കഴിഞ്ഞ ദിവസം കേടായ ഐഎൽഎസ് ആണു നന്നാക്കിയത്. ഫ്ലൈറ്റ് ഇൻസ്പെക്ടർ നവീൻ ഡോഡിയുടെ നേതൃത്വത്തിൽ കാലിബ്രേഷൻ വിമാനത്തിൽനിന്നു നിർദേശങ്ങൾ നൽകി.‍ കമ്യൂണിക്കേഷൻ മേധാവി മുനീർ മാടമ്പാട്ട്, ഉദ്യോഗസ്ഥരായ കെ.അനിൽകുമാർ, എൻ.നന്ദകുമാർ, മുജീബ് അലി, വിപിൻ ദാസ് എന്നിവരുടെ നേതൃത്വത്തിൽ കൃത്യത വരുത്തി. അപകടത്തിൽപ്പെട്ട വിമാനം തട്ടി കേടായ ഐഎൽഎസിന്റെ ആന്റിന, ലോക്കലൈസർ എന്നിവ നന്നാക്കുന്ന ജോലി പുരോഗമിക്കുകയാണ്.   കരിപ്പൂർ∙ വിമാനാപകടവും മൺസൂൺ സീസണും കണക്കിലെടുത്ത് കോഴിക്കോട് വിമാനത്താവളത്തിൽ വലിയ വിമാനങ്ങൾക്കു താൽക്കാലിക നിയന്ത്രണമുണ്ടെന്ന് ഡിജിസിഎ രേഖാമൂലം സൗദി എയർലൈൻസ് അധികൃതരെ അറിയിച്ചു. കഴിഞ്ഞ മാസം 7ന് കരിപ്പൂരിലുണ്ടായ വിമാനാപകടത്തിന്റെ പശ്ചാത്തലത്തിൽ വലിയ വിമാനങ്ങൾക്കു നിയന്ത്രണം ഏർപ്പെടുത്തിയിരുന്നു. എന്നാൽ, രേഖാമൂലമുള്ള അറിയിപ്പ് വിമാനക്കമ്പനിക്കോ കോഴിക്കോട് വിമാനത്താവളം അധികൃതർക്കോ ഇതുവരെ ലഭിച്ചിരുന്നില്ല. ഈ സാഹചര്യത്തിൽ ഇന്നു ജിദ്ദയിൽനിന്നു വലിയ വിമാനം കോഴിക്കോട്ടേക്കും തിരിച്ചും സർവീസ് നടത്തുന്നതിനു സൗദി എയർലൈൻസ് രേഖാമൂലം ഡിജിസിഎയോട് അനുമതി തേടിയിരുന്നു. ഇതിനു ഡിജിസിഎ ഡപ്യൂട്ടി ഡയറക്ടർ ജനറൽ രേഖാമൂലം നൽകിയ മറുപടിയിലാണ്, വിമാനാപകടവും മൺസൂൺ സീസണും കണക്കിലെടുത്ത്, ബന്ധപ്പെട്ട അതോറിറ്റി വലിയ വിമാന സർവീസ് താൽക്കാലികമായി വിലക്കിയിട്ടുണ്ടെന്നു ചൂണ്ടിക്കാട്ടിയത്. അതേസമയം, വലിയ വിമാനങ്ങൾക്കുള്ള നിയന്ത്രണത്തിനെതിരെ പ്രതിഷേധം ശക്തമായിട്ടുണ്ട്.