പുതിയ കേസുകളിലും മരണസംഖ്യയിലും യാതൊരു കുറവുമില്ലാതെ കൊവിഡ് വ്യാപന ഭീതി വർധിപ്പിക്കുകയാണ് മഹാരാഷ്ട്ര. രാജ്യത്ത് ഒരു ദിവസം കണ്ടെത്തുന്ന കേസുകളിൽ നാലിലൊന്നിലേറെയും ഈ സംസ്ഥാനത്തു നിന്നാവുന്നത് ആരോഗ്യ വകുപ്പിനെ വലിയ സമ്മർദത്തിലേക്കു തള്ളിവിടുന്നുണ്ട്. അവസാന 24 മണിക്കൂറിൽ സംസ്ഥാനത്തു കണ്ടെത്തിയത് 23,350 കേസുകളാണ്. രാജ്യത്തു മൊത്തം 90,802 കേസുകൾ സ്ഥിരീകരിച്ചപ്പോഴാണിത്. അതായത് ഒരു ദിവസത്തെ മൊത്തം കേസുകളുടെ 25.71 ശതമാനവും മഹാരാഷ്ട്രയിൽ! സംസ്ഥാനത്തെ ഇതുവരെയുള്ള വൈറസ്ബാധിതരുടെ എണ്ണം 9,07,212ൽ എത്തിയിട്ടുണ്ട്. 328 പേർ കൂടി മരിച്ചതോടെ മൊത്തം മരണസംഖ്യ 26,604. ഇതുവരെ രോഗമുക്തരായത് 6.44 ലക്ഷത്തിലേറെ പേരാണ്. ഇപ്പോൾ ചികിത്സയിലുള്ളത് 2,35,857 പേർ. ആക്റ്റിവ് കേസുകളിൽ രണ്ടും മൂന്നും സ്ഥാനത്തുള്ള ആന്ധ്രപ്രദേശിലും കർണാടകയിലും ഏതാണ്ട് ഒരു ലക്ഷത്തിനടുത്താണ് ഇപ്പോൾ അസുഖമുള്ളവരുടെ സംഖ്യ. കൊവിഡ് മരണങ്ങളിൽ രണ്ടാം സ്ഥാനത്തുള്ള തമിഴ്നാട്ടിൽ ഇതുവരെ മരിച്ചത് 7836 പേരാണ്. മറ്റു സംസ്ഥാനങ്ങളെക്കാൾ എത്ര മോശമായ അവസ്ഥയിലാണ് മഹാരാഷ്ട്ര എന്നതിന്‍റെ വ്യക്തമായ ചിത്രമാണ് ഇതെല്ലാം കാണിക്കുന്നത്. റിക്കവറി നിരക്ക് ദേശീയ ശരാശരിയെക്കാൾ കുറവാണ് മഹാരാഷ്ട്രയിൽ. 71.03 ശതമാനം പേരാണ് സംസ്ഥാനത്ത് ഇതുവരെ രോഗമുക്തി നേടിയത്. അതേസമയം, മരണനിരക്ക് ദേശീയ ശരാശരിയെക്കാൾ ഉയർന്നതുമാണ്. 2.93 ശതമാനം മരണനിരക്കാണ് സംസ്ഥാനത്ത്. 1,910 പുതിയ രോഗികളെ കൂടി കണ്ടെത്തിയ മുംബൈ നഗരത്തിൽ 1.55 ലക്ഷത്തിലേറെയാണ് മൊത്തം കൊവിഡ് ബാധിതർ. 7,869 പേർ മുംബൈയിൽ മാത്രം മരിച്ചിട്ടുണ്ട്. നഗരം അടങ്ങുന്ന മുംബൈ മെട്രൊപൊളിറ്റൻ റീജിയണിൽ 5,407 പുതിയ കേസുകൾ കണ്ടെത്തി. ഇവിടെ മൊത്തം രോഗബാധിതർ 3.61 ലക്ഷമാണ്. 13,309 പേർ റീജിയണിൽ ഇതുവരെ മരിച്ചു. പൂനെ നഗരത്തിൽ പുതുതായി രോഗം സ്ഥിരീകരിച്ചത് 2,638 പേർക്കാണ്.