ഉപതിരഞ്ഞെടുപ്പ് വിജയാവേശത്തില്‍ എല്‍ ഡി എഫ്

നിനച്ചിരിക്കാതെ പ്രഖ്യാപിച്ച ചവറ, കുട്ടനാട് മണ്ഡലങ്ങളിലെ ഉപതിരഞ്ഞെടുപ്പിന് ഇടതു മുന്നണി ഒരുങ്ങുന്നത് കഴിഞ്ഞ തിരഞ്ഞെടുപ്പിലെ ആവേശത്തില്‍. എല്‍ഡിഎഫ് സര്‍ക്കാര്‍ അധികാരത്തില്‍ വന്നശേഷം നടന്ന ഉപതെരഞ്ഞെടുപ്പില്‍ നേട്ടം കൊയ്തത് എല്‍ഡിഎഫാണ്. എട്ടു മണ്ഡലത്തിലാണ് ഉപതെരഞ്ഞെടുപ്പ് നടന്നത്. ഇതില്‍ നാല് സീറ്റില്‍വീതം എല്‍ഡിഎഫും യുഡിഎഫും വിജയിച്ചു. എന്നാല്‍, എല്‍ഡിഎഫ് ജയിച്ച മൂന്ന് സീറ്റും യുഡിഎഫില്‍നിന്ന് പിടിച്ചെടുത്തതാണ്. നഷ്ടമായത് ഒരു സീറ്റ് മാത്രമായിരുന്നു. യുഡിഎഫിനാകട്ടെ, മൂന്ന് സീറ്റും കൈയില്‍നിന്ന് പോയി. പാലാ, കോന്നി, വട്ടിയൂര്‍ക്കാവ് എന്നീ കുത്തക മണ്ഡലങ്ങളാണ് യുഡിഎഫിന് നഷ്ടമായത്. അരൂരില്‍ ജയിച്ചതാകട്ടെ കഷ്ടിച്ചും. എല്‍ഡിഎഫ് സര്‍ക്കാര്‍ വന്നശേഷം ആദ്യ ഉപതെരഞ്ഞെടുപ്പ് 2017 ഒക്ടോബറില്‍ വേങ്ങരയിലായിരുന്നു. ലോക്സഭാ ഉപതെരഞ്ഞെടുപ്പില്‍ മത്സരിക്കാന്‍ മുസ്ലിംലീഗ് നേതാവ് പി കെ കുഞ്ഞാലിക്കുടി രാജിവച്ചതിനെ തുടര്‍ന്നായിരുന്നു ഒഴിവ്. ഉപതെരഞ്ഞെടുപ്പില്‍ സീറ്റ് ലീഗിലെ കെ എന്‍ എ ഖാദര്‍ നിലനിര്‍ത്തി. എല്‍ഡിഎഫ് അംഗം കെ കെ രാമചന്ദ്രന്‍നായരുടെ മരണത്തെ തുടര്‍ന്ന് 2018 മേയില്‍ ചെങ്ങന്നൂരില്‍ ഉപതെരഞ്ഞെടുപ്പ്. എല്‍ഡിഎഫ് സ്ഥാനാര്‍ഥി സിപിഐ എമ്മിലെ സജി ചെറിയാന്‍ റെക്കോഡ് ഭൂരിപക്ഷത്തിനാണ് വിജയിച്ചത്. കേരള കോണ്‍ഗ്രസ് നേതാവ് കെ എം മാണിയുടെ നിര്യാണത്തെ തുടര്‍ന്ന് 2019 സെപ്തംബറിലായിരുന്നു പാലാ ഉപതെരഞ്ഞെടുപ്പ്. പതിറ്റാണ്ടുകളായി യുഡിഎഫ്മാത്രം ജയിച്ച പാലാ മണ്ഡലത്തില്‍ എല്‍ഡിഎഫ് സ്ഥാനാര്‍ഥി എന്‍സിപിയിലെ മാണി സി കാപ്പന്‍ അട്ടിമറി വിജയം നേടി. 2019 ഒക്ടോബറില്‍ അഞ്ച് മണ്ഡലത്തിലേക്ക് ഒരുമിച്ചായിരുന്നു ഉപതെരഞ്ഞെടുപ്പ്. ഇതില്‍ വട്ടിയൂര്‍ക്കാവും കോന്നിയും എല്‍ഡിഎഫ് പിടിച്ചെടുത്തപ്പോള്‍ അരൂര്‍ നഷ്ടമായി. മഞ്ചേശ്വരവും എറണാകുളവും യുഡിഎഫ് നിലനിര്‍ത്തി.