ഖേൽരത്നയിൽ നിന്നു രാജീവ്ഗാന്ധിയുടെ പേര് മാറ്റണം

രാജ്യത്തെ കായികതാരങ്ങൾക്കു നൽകുന്ന പരമോന്നത ബഹുമതിയായ രാജീവ് ഗാന്ധി ഖേൽരത്നയുടെ പേര് മാറ്റണമെന്ന് ഗുസ്തി താരം ബബിത ഫോഗട്ട്. കായിക പുരസ്കാരമായ ഖേൽ രത്നയ്ക്ക് കായിക താരങ്ങളുടെ പേര് നൽകുന്നതാണ് ഉചിതമെന്ന് അവർ പറഞ്ഞു. മുൻപ്രധാനമന്ത്രിയുടെ പേരിനെക്കാൾ രാജ്യത്തിന്‍റെ യശസ്സുയർത്തിയ കായിക താരങ്ങളിൽ ഒരാളുടെ പേരാണ് പുരസ്കാരത്തിനു യോജിക്കുന്നത്. ഒരു അത്‌ലറ്റിന്‍റെ പേരാണ് ഖേൽരത്നയ്ക്ക് എങ്കിൽ വാങ്ങുന്നയാൾക്കു കൂടുതൽ അഭിമാനം തോന്നും. നമുക്ക് നിരവധി ഒളിംപിക്, ലോകചാംപ്യൻ ഷിപ്പ് ജേതാക്കളുള്ളപ്പോൾ അവരിലൊരാളുടെ പേര് നൽകുന്നതാണ് ഉചിതമെന്നും ബബിത. 1991ലാണ് രാജ്യത്തെ കായിക താരങ്ങൾക്കുള്ള പരമോന്നത ബഹുമതിയായി മുൻ പ്രധാനമന്ത്രി രാജീവ് ഗാന്ധിയുടെ പേരിൽ ഖേൽരത്ന പുരസ്കാരങ്ങൾ ഏർപ്പെടുത്തിയത്. കോമണ്‍വെല്‍ത്ത് ഗെയിംസില്‍ സ്വര്‍ണവും വെള്ളിയും നേടിയ ബബിത ഒട്ടേറെ അന്താരാഷ്ട്ര വേദികളില്‍ ഇന്ത്യയുടെ അഭിമാനമായിരുന്നു. ബബിതയുടെയും സഹോദരി ഗീതയുടെയും അച്ഛൻ മഹാവീർ ഫോഗട്ടിന്‍റെയും വിജയകഥ പറഞ്ഞ സിനിമയായിരുന്നുആമിര്‍ ഖാന്‍ നായകനായ ദംഗല്‍. മഹാവീർ ഫോഗട്ടും ബബിതയും കഴിഞ്ഞ ലോക്സഭാ തെരഞ്ഞെടുപ്പിനു മുൻപ് ബിജെപിയിൽ ചേർന്നിരുന്നു.