മരണ നിരക്ക് കുറഞ്ഞത് ആസൂത്രിതമായ പ്രവര്‍ത്തനം കൊണ്ട്

കോവിഡ് രോഗികളുടെ എണ്ണത്തില്‍ വര്‍ധനവുണ്ടായിട്ടും മരണ നിരക്ക് നമുക്ക് പിടിച്ച് നിര്‍ത്താനായത് ആസൂത്രിതമായ പ്രവര്‍ത്തനം കൊണ്ടാണെന്ന് ആരോഗ്യ മന്ത്രി കെ.കെ ശൈലജ. രോഗികളുടെ നിരക്കില്‍ വന്‍ രീതിയിലുള്ള വര്‍ധനവ് ഉണ്ടാവുമെന്നായിരുന്നു കണക്ക് കൂട്ടിയിരുന്നത്. എന്നാല്‍ പ്രതീക്ഷിച്ച അത്ര വന്നിട്ടില്ല, ഇത് ആശ്വാസമാണ്. ജാഗ്രത കൈവിടരുതെന്നും കെ.കെ ശൈലജ മാധ്യമങ്ങളോട് പ്രതികരിച്ചു. മറ്റ് സംസ്ഥാനങ്ങളില്‍ രോഗികളുടെ എണ്ണം വര്‍ധിക്കുന്നതിനൊപ്പം മരണ നിരക്കും വര്‍ധിച്ചിരുന്നു. ജീവിത ശൈലീ രോഗികള്‍ ഏറ്റവും കൂടുതലുള്ള കേരളത്തില്‍ കോവിഡിനെ സംബന്ധിച്ച് മരണ നിരക്ക് വര്‍ധിക്കാനുള്ള സാഹചര്യവുമുണ്ടായിരുന്നു. പക്ഷെ സര്‍ക്കാരിന്റേയും ആരോഗ്യ വകുപ്പിന്റേയും തദ്ദേശ സ്വയംഭരണ സ്ഥാപനങ്ങളുടേയെല്ലാം കൂട്ടായ പരിശ്രമം കൊണ്ട് മരണ നിരക്ക് കുറക്കാന്‍ സാധിച്ചുവെന്നും മന്ത്രി പറഞ്ഞു. ചിട്ടയായ പരിശ്രമത്തിന് എല്ലാവരും പിന്തുണ നല്‍കണം. നല്ല ആരോഗ്യമുള്ള മനുഷ്യരാണ് കേരളത്തിലുള്ളതെങ്കിലും ജീവിത ശൈലീ രോഗങ്ങളാണ് ഏറ്റവും വലിയ ഭീഷണി. ജാഗ്രത ഇനിയും തുടരേണ്ടതുണ്ടെന്നും കെ.കെ ശൈലജ പറഞ്ഞു.