സ്വര്‍ണകടത്ത് കേസ് അട്ടിമറിക്കാന്‍ പുതിയ നീക്കം

---

കാര്‍ഗോ കോംപ്ലക്‌സില്‍ നയതന്ത്ര പാഴ്‌സലില്‍ നിന്നു 30 കിലോഗ്രാം സ്വര്‍ണം പിടികൂടിയ കേസ് അന്വേഷിക്കുന്ന കസ്റ്റംസ് പ്രിവന്റീവ് സംഘത്തില്‍ നിന്ന് അസി. കമ്മിഷണര്‍ എന്‍. എസ്.ദേവിനെ മാറ്റി. അന്വേഷണ സംഘത്തിനു തിരിച്ചടിയാണ് ദേവിന്റെ മാറ്റം. ഇനി പല കാര്യങ്ങളും പുതിയതായി എത്തുന്ന ഉദ്യോഗസ്ഥനില്‍ നിന്നായിരിക്കും. അന്വേഷണ സംഘത്തില്‍ നിന്നു മാറ്റപ്പെടുന്ന രണ്ടാമത്തെ ഉന്നത ഉദ്യോഗസ്ഥനാണു ദേവ്. നേരത്തെ, ജോയിന്റ് കമ്മിഷണര്‍ അനീഷ് രാജനെ നാഗ്പുരിലേക്കു സ്ഥലം മാറ്റിയിരുന്നു. ദേവിനെ സ്ഥലം മാറ്റിയതായ പ്രചാരണങ്ങള്‍ ശരിയല്ലെന്നു പ്രിവന്റീവ് കമ്മിഷണര്‍ സുമിത്കുമാര്‍ പറഞ്ഞു. 'കോഴിക്കോട് കസ്റ്റംസ് പ്രിവന്റീവ് ഡിവിഷനിലടക്കം ദേവിനുണ്ടായിരുന്ന അധിക ചുമതലകള്‍ ഒഴിവാക്കുകയാണു ചെയ്തത്. കൊച്ചി കസ്റ്റംസ് പ്രിവന്റീവ് കമ്മിഷണറേറ്റില്‍ ലീഗല്‍ വിഭാഗത്തിന്റെ ചുമതലയാണു ദേവിനുണ്ടായിരുന്നത്. തിരുവനന്തപുരം നയതന്ത്ര പാഴ്‌സല്‍ സ്വര്‍ണക്കടത്ത് കേസിന്റെ നിയമപരമായ ഭാഗം അദ്ദേഹം തന്നെയാണു കൈകാര്യം ചെയ്തിരുന്നത്. ഈ ചുമതലയില്‍ അദ്ദേഹം തുടരുമെന്നതിനാല്‍ കേസ് അന്വേഷണത്തില്‍ അദ്ദേഹത്തിന്റെ േസവനം തുടര്‍ന്നും ഉപയോഗിക്കാന്‍ കഴിയും.' എന്ന് പറയുന്നുണ്ടെങ്കിലും അത് പ്രായോഗികമാവില്ല. കോഴിക്കോട്, മലപ്പുറം ജില്ലകളില്‍ ഒട്ടേറെ പരിശോധനകള്‍ക്കു നേതൃത്വം നല്‍കിയതു ദേവ് ആയിരുന്നു. കേസ് റജിസ്റ്റര്‍ ചെയ്ത ശേഷം ദിവസങ്ങള്‍ക്കകം കെ.ടി.റമീസും ഫൈസല്‍ ഫരീദും അടക്കമുള്ള പ്രധാന കണ്ണികളിലേക്കെത്താനും ഹവാല സംഘങ്ങളുമായുള്ള ബന്ധം കണ്ടെത്താനും ദേവിന്റെ അന്വേഷണ മികവ് സഹായിച്ചിരുന്നു. അന്വേഷണം ഏതാണ്ട് പൂര്‍ത്തിയായതിനാല്‍, തുടര്‍ജോലികള്‍ പ്രധാനമായും വരുന്നതു ലീഗല്‍ വിഭാഗത്തിലാണ്.