ജിഎസ്ടി നഷ്ടപരിഹാര വിഷയത്തിൽ  കേന്ദ്ര സർക്കാർ നിലപാട്‌ കേരളം അംഗീകരിക്കുന്നില്ലെന്ന്‌ ധനമന്ത്രി തോമസ്‌ ഐസക്‌. കേന്ദ്രത്തിന്റെ രണ്ടു നിർദേശവും‌ സ്വീകാര്യമല്ലെന്ന്‌ കേരളം അറിയിക്കും. നഷ്ടപരിഹാരം പൂർണമായും കിട്ടിയേപറ്റൂ. അതു ഭരണഘടനാപരമായ അവകാശമാണ്. അതിനായി കേന്ദ്രം വായ്‌പ എടുത്ത്‌ ജിഎസ്‌ടി കൗൺസിലിന്‌ പണം ലഭ്യമാക്കണം. തിരിച്ചടവിനുള്ള തുക ഉറപ്പാകുന്നതുവരെ നഷ്ടപരിഹാര സെസ്‌ പിരിവിന്റെ കാലാവധി നീട്ടണം.  പ്രശ്‌നത്തിൽ സംസ്ഥാനങ്ങളുടെ പൊതുസമീപന രൂപീകരണത്തിനായി ശ്രമിക്കും. ഇതര സംസ്ഥാനങ്ങളിലെ ധനമന്ത്രിമാരുമായി വീഡിയോ കോൺഫറൻസിങ്‌വഴി ആശയവിനിമയം നടത്തും. മറ്റു ധനമന്ത്രിമാരുമായി കഴിയുന്നത്ര ഏകോപിത നിലപാടുണ്ടാക്കാന്‍‌ ശ്രമിക്കും. കേരളം തനിച്ചാണെങ്കിലും കേന്ദ്ര നിലപാടിനെ ജിഎസ്ടി കൗൺസിലിൽ ചെറുക്കുമെന്നും മന്ത്രി പറഞ്ഞു. നഷ്ടപരിഹാരത്തിനായി വായ്പ എടുക്കാനുള്ള ചുമതല സംസ്ഥാനങ്ങളുടെമേൽ അടിച്ചേൽപ്പിക്കരുത്. ഈ സാമ്പത്തിക വർഷത്തെ നഷ്ടപരിഹാരതുക പൂർണമായും സംസ്ഥാനം കടമെടുക്കണമെന്നതാണ്‌ കേന്ദ്ര ധനമന്ത്രി ഊന്നൽ നൽകുന്നപ്രധാന നിര്‍ദേശം. കോവിഡുമൂലമുളള വരുമാന നഷ്ടവും ജിഎസ്ടി മൂലമുള്ള വരുമാന നഷ്ടവും രണ്ടായിക്കണ്ടുള്ള നഷ്ടപരിഹാര നിർദേശമാണ്‌ മറ്റൊന്ന്‌. ജിഎസ്ടി നടപ്പാക്കിയതുകൊണ്ടുള്ള വരുമാന നഷ്ടത്തെ നികത്താൻ കേന്ദ്രം കടമെടുത്തുതരും. കോവിഡുമൂലമുണ്ടായ വരുമാന നഷ്ടം നികത്താൻ സംസ്ഥാനങ്ങൾക്ക് കടമെടുക്കാൻ വായ്‌പാ പരിധി അരശതമാനം ഉയർത്തും. ഉയർന്ന നഷ്ടപരിഹാര തുകയ്‌ക്ക്‌ അർഹതയുള്ള കേരളത്തിന്‌  രണ്ടു നിർദേശവും വലിയ നഷ്ടംവരുത്തും‌. പൂർണമായും സംസ്ഥാനങ്ങൾ വായ്‌പ എടുക്കുകയാണെങ്കിൽ, വായ്പാപരിധി കേന്ദ്രസർക്കാർ എത്ര ശതമാനം ഉയർത്തുമെന്നത് അനിശ്ചിതത്വത്തിലാണ്‌. നഷ്ടപരിഹാരത്തിന് എടുക്കുന്ന വായ്‌പ പൂർണമായും ഉൾക്കൊള്ളാവുന്നവിധം വായ്‌പാ പരിധി ഉയർത്തിയില്ലെങ്കിൽ, സംസ്ഥാനങ്ങൾക്ക്‌ അത്രയും തുക നഷ്ടപ്പെടും.  സംസ്ഥാനങ്ങൾ എടുക്കുന്ന വായ്‌പയ്ക്ക് കേന്ദ്രസർക്കാരിനേക്കാൾ രണ്ടുശതമാനംവരെ അധിക പലിശ നൽകേണ്ടിവരും. ഈവർഷം കേരളം ഉൾപ്പെടെ എടുത്ത വായ്‌പയിൽ ഇത്‌ പ്രകടമായതാണ്‌. ജിഎസ്ടി നഷ്ടപരിഹാര തുകയെ കോവിഡുമൂലമുള്ളത്, സാധാരണഗതിയിലുള്ളത് എന്നിങ്ങനെ വേർതിരിക്കുന്നത്‌ ഭരണഘടനാ വിരുദ്ധമാണ്. അറ്റോർണി ജനറൽ കേന്ദ്ര സർക്കാരിന്‌ നൽകിയ നിയമോപദേശത്തിലും ഇത്തരമൊരു വേർതിരിവിനെക്കുറിച്ച് പരാമർശിക്കുന്നില്ല. ഈ വേർതിരിവിനെ കേരളം അംഗീകരിക്കുന്നില്ല. കരടു നിർദേശങ്ങളിന്മേൽ ഒരാഴ്ചയ്ക്കകം നിലപാട് അറിയിക്കുമെന്നും മന്ത്രി അറിയിച്ചു.