സ്വര്‍ണകടത്ത് അന്വേഷണത്തില്‍ മെല്ലപോക്ക്

സി പി എമ്മിനെ കുടുക്കാന്‍ കേരള ബിജെപിയും , ചെന്നിത്തയും പ്‌ളാന്‍ ചെയ്ത് വിവാദമാക്കിയ സ്വര്‍ണകടത്ത് കേസ് അന്വേഷണത്തില്‍ നിന്ന് കേന്ദ്രസര്‍ക്കാര്‍ പിന്നോട്ടു നീങ്ങുന്നുവോ. കേസ് അന്വേഷണം ഒരുഘട്ടം പിന്നിട്ടപ്പോള്‍ തങ്ങള്‍ക്ക് വേണ്ടപ്പെട്ടവര്‍ കുടുങ്ങുമെന്ന ബോധ്യമായതോടെയാണ് അന്വേഷണത്തില്‍ നിന്നുള്ള മെല്ലപോക്ക്. കേസിലെ പ്രധാനപ്രതിയെ വിട്ടുകിട്ടനുള്ള നടപടികള്‍ പോലും ഇതുവരെ കേന്ദ്രസര്‍ക്കാര്‍ ചെയ്തിട്ടില്ല. ദുബായ് പൊലീസിന്റെ പിടിയിലായ ഫൈസല്‍ ഫരീദിനെ എന്‍ഐഎയ്ക്ക് വിട്ടുകിട്ടുന്നതിലും നടപടിയില്ല. കുറ്റവാളികളെ കൈമാറാന്‍ യുഎഇയുമായി കരാറുണ്ടെങ്കിലും കേന്ദ്ര ആഭ്യന്തര മന്ത്രാലയം ഇതുവരെ അനങ്ങിയിട്ടില്ല. അതിനിടെ ഫൈസല്‍ ഫരീദിനെയും മൂവാറ്റുപുഴ സ്വദേശി കെ ടി റമീസിനെയും ചോദ്യം ചെയ്യാന്‍ ദുബായില്‍ പോയ എന്‍ഐഎ സംഘം തിരിച്ചെത്തി. കോണ്‍സുലേറ്റ് ജനറലിന്റെയും അറ്റാഷെയുടെയും അടുത്തുനിന്ന് വിവരങ്ങളറിയാന്‍ എന്‍ഐഎ പദ്ധതിയിട്ടെങ്കിലും ഇതിനായി വിദേശകാര്യമന്ത്രാലയം കത്തയക്കാത്തതിനാല്‍ അതും നടന്നിട്ടില്ല. കസ്റ്റംസ് ഉദ്യോഗസ്ഥരുടെ സഹായം കിട്ടിയിരുന്നതായി പ്രതികളായ സ്വപ്നയും സന്ദീപും സരിത്തും മൊഴി നല്‍കിയിരുന്നുവെന്ന് വാര്‍ത്തകള്‍ പുറത്തുവന്നിരുന്നു. എന്നാല്‍, ആ വഴിക്കും അന്വേഷണം നടന്നിട്ടില്ല. കസ്റ്റംസ് ഉദ്യോഗസ്ഥരെ ചോദ്യം ചെയ്താല്‍ അന്വേഷണം നിര്‍ണായക വഴിത്തിരിവിലാകും. സ്വര്‍ണക്കടത്ത് ശൃംഖലയുമായുള്ള ബിജെപി ബന്ധം പുറത്താകുമെന്ന ഭയം കേന്ദ്രത്തിനുണ്ട് . കേസിലെ തീവ്രവാദ ബന്ധത്തിലേക്കും അന്വേഷണം വ്യാപിപ്പിച്ചിട്ടില്ല. സ്വപ്ന സുരേഷ് അടക്കം ഇതുവരെ പിടികൂടിയ പ്രതികളെ കേന്ദ്രീകരിച്ചാണ് ഇപ്പോഴും എന്‍ഐഎയുടെയും എന്‍ഫോഴ്സ്മെന്റ് ഡയറക്ടറേറ്റിന്റെയും (ഇഡി)അന്വേഷണം തുടരുന്നത്. അതിനും പഴയ വേഗതയില്ലന്ന് ആരോപണം ഉയര്‍ന്നു കഴിഞ്ഞു.