മറഞ്ഞിരിക്കുന്ന നാട്

ജീവിതത്തിലെ തിരക്കുകളില്‍ നിന്നും രക്ഷപെട്ട് കുറച്ച് ദിവസങ്ങള്‍ പ്രക‍ൃതിയോ‌ട് ചേര്‍ന്നു ചെലവഴിക്കാൻ പറ്റിയ ഒരിടം. മൂന്നാറില്‍ നിന്നും ഒരു മണിക്കൂര്‍ ഡ്രൈവ് ചെയ്തെത്താവുന്ന ദൂരത്തിലുള്ള മറയൂരിനെ വിസ്മയിപ്പിക്കുന്ന കഥകള്‍ ഒരുപാടുണ്ട്. മറയൂര്‍ എന്നാല്‍ മറഞ്ഞിരിക്കുന്ന നാട് എന്നാണ് അര്‍ഥം. എങ്ങനെ ഈ ഇടത്തിന് ഈ പേരു കിട്ടിയെന്നുള്ളത് തികച്ചും വിസ്മയിപ്പിക്കുന്ന ഒന്നാണ്. പാണ്ഡ്യരാജാക്കന്‍മാരുടെ സേനയിലെ മറവര്‍ വിഭാഗത്തില്‍പ്പെട്ടവര്‍ കാടുകളില്‍ മറഞ്ഞിരുന്ന വഴിപോക്കരെ കൊള്ളയടിക്കുമായിരുന്നു. അവരുടെ ആധിപത്യ പ്രദേശമായിരുന്നുവത്രെ ഇവിടം. അങ്ങനെ മറവരുടെ ഊരില്‍ നിന്നോ മറഞ്ഞിരിക്കുന്നവരുടെ ഊരില്‍ നിന്നോ ആണ് മറയൂരിന് ഈ പേരു ലഭിക്കുന്നത് എന്നാണ് ഒരു കഥ. അങ്ങനെയല്ല, പാണ്ഡവരുമായി ബന്ധപ്പെട്ടതാണ് ഇവി‌ടുത്തെ കഥ എന്നു വിശ്വസിക്കുന്നവരും ഉണ്ട്. പാണ്ഡവര്‍ വനവാസക്കാലത്ത് ഇവിടെ ഒളിവില്‍ കഴിഞ്ഞിരുന്നു എന്നും അങ്ങനെയാണ് മറയൂരിന് ഈ പേര് ലഭിച്ചതെന്നും പറയുന്നുണ്ട്. മൂന്നാര്‍ പോലെ   മൂന്നാറില്‍ നിന്നും 42 കിലോമീറ്റര്‍ അകലെയാണെങ്കിലും ഇവിടുത്തെ കാലാവസ്ഥ മൂന്നാറുമായി ഏറെ ചേര്‍ന്നു നില്‍ക്കുന്ന ഒന്നാണ്. മൂന്നാറിന്‍റെ അതേ കുളിര്‍മയും പച്ചപ്പും മഞ്ഞുമെല്ലാം അനുഭവിക്കുവാന്‍ എന്തുകൊണ്ടും അനുയോജ്യമായ ഇടമാണിത്. അഞ്ചു നാട് ചരിത്രത്തില്‍ ഇന്നും മറയൂര്‍ അറിയപ്പെടുന്നത് അ‍ഞ്ചു നാട് എന്നാണ്. ടിപ്പു സുല്‍ത്താനും മധുരയിലെ രാജാവായ തിരുമല നായ്ക്കരുമായി ബന്ധപ്പെട്ട ചരിത്രമാണ് ഇതിനുള്ളത്. പതിനെട്ടാം നൂറ്റാണ്ടില്‍ മതിരുമലനായ്ക്കരെ ടിപ്പു സുല്‍ത്താന്‍ ആക്രമിച്ചതിന് പിന്നാലെ തമിഴ്നാട്ടില്‍ നിന്ന് ധാരാളംപേര്‍ ഇവിടേക്ക് കുടിയേറിയത്രെ. ഇവിടെ കുടിയേറിയ ഇവര്‍ നിർമിച്ച ഗ്രാമങ്ങളാണ് കാന്തല്ലൂര്‍, കീഴാന്തൂര്‍, കരയൂര്‍, മറയൂര്‍, കൊട്ടകുടി എന്നിവ. ഈ അഞ്ച് ഗ്രാമങ്ങളെ ചേര്‍ത്ത് അഞ്ചു നാട് എന്നാണ് വിളിക്കുന്നത്. തികച്ചും വ്യത്യസ്തമായ ആചാരങ്ങളും വിശ്വാസങ്ങളും പിന്തു‌‌ടരുന്നവരാണ് ഈ അഞ്ച് ഗ്രാമക്കാരും. മലകള്‍ക്കു നടുവില്‍ 'മലകളാല്‍ ചുറ്റപ്പെട്ടു കിടക്കുന്ന ഇടമെന്ന പ്രത്യേകതയും മറയൂരിനുണ്ട്. കാന്തല്ലൂര്‍ മലയാണ് ഇവിടുത്തെ പ്രധാന മലകളിലൊന്ന്. ഇവിടുത്തെ മലകളോട് ചേര്‍ന്നും അതിന്‍റെ താഴ്വാരങ്ങളിലുമായാണ് മുകളില്‍ പറഞ്ഞ അഞ്ച് ഗ്രാമങ്ങളും സ്ഥിതി ചെയ്യുന്നത്. മറയൂര്‍ ചന്ദനക്കാട്   മറയൂരെന്നു കേട്ടാല്‍ ഏതൊരാള്‍ക്കും ആദ്യം ഓര്‍മ്മ വരിക ചന്ദനക്കാടുകള്‍ തന്നെയായിരിക്കും. വഴിയുടെ ഇരുവശവും നിറഞ്ഞ് നില്‍ക്കുന്ന ചന്ദന തോട്ടങ്ങള്‍ നൽകുന്ന തണലും കുളിര്‍മയും തീര്‍ത്തും വ്യത്യസ്തമായ അനുഭവം തന്നെയാണ്. മറ്റി‌ടങ്ങളില്‍ നിന്നും വ്യത്യസ്തമായി ഉയര്‍ന്ന നിലവാരത്തിലുള്ള ചന്ദന തടികള്‍ തന്നെയാണ് മറയൂരിന്‍റെ ഏറ്റവും വലിയ പ്രത്യേകത. സര്‍ക്കാരിന്‍റെ നിയന്ത്രണത്തിലാണ് ഇവിടുത്തെ പ്രവര്‍ത്തനങ്ങള്‍ നടക്കുന്നത്. ഹെക്ടർ കണക്കിന് സ്ഥലത്തായി കിടക്കുന്ന മറയൂരിലെ ചന്ദനക്കാടുകള്‍ പ്രത്യേക കാഴ്ച തന്നെയാണ്. ഇവിടെ ആകെ 65,000ത്തിലധികം ചന്ദന മരങ്ങള്‍ ഉണ്ടെന്നാണ് കണക്കാക്കപ്പെടുന്നത്. സന്ദര്‍ശകര്‍ക്ക് ഇവിടെയത്തി കാണാനും ചന്ദനത്തോട്ടത്തിലെ പ്രവര്‍ത്തനങ്ങള്‍ നേരിട്ട് കണ്ടു പരിചയപ്പെടാനുമുള്ള അവസരം ഇവിടെയുണ്ട്. മറയൂര്‍ ശര്‍ക്കര   മറയൂരെന്ന് കേള്‍ക്കുമ്പോള്‍ തന്നെ അതിനോട് ചേര്‍ന്നു നില്‍ക്കുന്ന മണം മറയൂര്‍ ശര്‍ക്കരയുടേതാണ്. മറയൂര്‍ ശര്‍ക്കരയുടെ പ്രത്യേകതകളും രുചിയും എടുത്തു പറയേണ്ടതു തന്നെയാണ്. ഇവി‌‌ടെ നടത്തുന്ന 150 ഏക്കറോളം കരിമ്പ് കൃഷിയില്‍ നിന്നുമാണ് മറയൂര്‍ ശര്‍ക്കരയ്ക്കു വേണ്ടുന്ന കരിമ്പ് ഉപയോഗിക്കുന്നത്. കരിമ്പ് കൃഷിയ്ക്ക് ഏറ്റവും അനുയോജ്യമായ മണ്ണാണ് മറയൂരിലേത്. ഇവിടെ എത്തിയാല്‍ പ്രാദേശികമായി ഈ ശര്‍ക്കര ഉണ്ടാക്കുന്ന നിരവധി ആളുകളെ കാണാം. കരിമ്പ് വെട്ടിയെടുത്ത് ചതച്ച് നീരാക്കുന്നു. തെളിഞ്ഞ നീര് അതിൽനിന്ന് മാറ്റിയെടുത്ത് തിളപ്പിക്കുന്നു, 1000 ലിറ്റർ വരെ തിളപ്പിക്കാൻ കഴിയുന്ന പാത്രങ്ങൾ ഇവിടെ കാണാം. ചൂടായി വരുമ്പോൾ കുമ്മായം ചേർക്കുന്നു, തിളച്ച് വെള്ളത്തിന്‍റെ അംശം മാറുമ്പോൾ ഇവ മറ്റൊരു പാത്രത്തിലേക്ക് മാറ്റുന്നു. ചൂടാറുമ്പോൾ കൈകൊണ്ട് ഉരുട്ടിയെടുക്കുന്നു. ഇങ്ങനെയാണ് ശർക്കര നിർമാണം. കടുത്ത തവിട്ട് നിറത്തില്‍ നല്ല മധുരത്തോട് കൂടിയതാണ് മറയൂർ ശർക്കര. മൊട്ടക്കുന്നിലെ മുനിയറകള്‍   എഡി 200നും ബിസി ആയിരത്തിനും മധ്യേ മറയൂരിലെ താഴ്‌വരയില്‍ നിലനിന്ന മനുഷ്യസംസ്‌ക്കാരത്തിന്‍റെ അവശേഷിപ്പാണ് മുനിയറകളും ഗുഹാചിത്രങ്ങളും. ചരിത്രപ്രേമികളെ മറയൂരിലേക്ക് ആകര്‍ഷിക്കുന്ന പ്രധാന കാരണം കൂടിയാണ് ചരിത്രാതീത കാലത്തെ മുനിയറകള്‍. മറയൂരിലെ മൊട്ടക്കുന്നുകളുടെ മുകളില്‍ കാണപ്പെടുന്ന മുനിയറകള്‍ ശവക്കല്ലറകള്‍ ആയിരുന്നു എന്നും ഇവിടെ മുനിമാര്‍ തപസ് ചെയ്തിരുന്ന ഇടം ആയിരുന്നു എന്നും പറയപ്പെടുന്നു. വനം വകുപ്പാണ് ഇവ സംരക്ഷിക്കുന്നത്. അഞ്ച് മുനിയറകൾ കേടുകൂടാതെ ഇപ്പോഴും അവശേഷിക്കുന്നുണ്ട്.