കോവിഡ് കാസര്‍ക്കോട് വന്‍ വര്‍ധനവ്

കാസര്‍ക്കോട് മൂന്നാം ഘട്ടത്തില്‍ കോവിഡ് രോഗികളുടെ എണ്ണത്തില്‍ വന്‍ വര്‍ധനവ്. 1618 പേര്‍ക്കാണ് പുതിതായി രോഗം സ്ഥിരീകരിച്ചത്. സമ്പര്‍ക്കത്തിലൂടെ രോഗികളുടെ എണ്ണം കൂടുന്നതും ജില്ലയില്‍ മരണനിരക്കുകള്‍ വര്‍ധിക്കുന്നതും ആശങ്ക ഉയര്‍ത്തുകയാണ്. ആദ്യ ഘട്ടത്തില്‍ ജില്ലയില്‍ 178 രോഗികളായിരുന്നു ഉണ്ടായിരുന്നത്. ഇവര്‍ രോഗമുക്തി നേടിയിരുന്നു. എന്നാല്‍ രണ്ടാം ഘട്ടത്തില്‍ ഒരു രോഗികള്‍ പോലും ജില്ലയില്‍ റിപ്പോര്‍ട്ട് ചെയ്തിരുന്നില്ല. മൂന്നാം ഘട്ടത്തില്‍ സ്ഥിതി മാറുകയായിരുന്നു. പതിനഞ്ച് ദിവസത്തിനിടയില്‍ ഒമ്പത് മരണമാണ് ജില്ലയില്‍ റിപ്പോര്‍ട്ട് ചെയ്തത്. പ്രതിദിനം രോഗികളുടെ എണ്ണം നൂറ് കടക്കുകയും ചെയ്തു. ഇന്നലെ 153 പേരില്‍ 151 പേര്‍ക്കും സമ്പര്‍ക്കത്തിലൂടെയാണ് രോഗം ബാധിച്ചത്. കോവിഡ് മാനദണ്ഡങ്ങള്‍ ആളുകള്‍ ലംഘിക്കുന്നതും രോഗവ്യാപനത്തിന്റെ തോത് വര്‍ധിപ്പിക്കുകയാണ്. നിലവില്‍ നഗരസഭ ഉള്‍പ്പെടെ ആറ് പൊലീസ് സ്റ്റേഷന്‍ പരിധികളില്‍ കളക്ടര്‍ പ്രഖ്യാപിച്ച നിരോധനാജ്ഞ തുടരുകയാണ്. കുമ്പള, ചെങ്കള, ചെമ്മനാട്, മഞ്ചേശ്വരം, മധൂര്‍ പഞ്ചായത്തുകള്‍, കാസര്‍കോട് നഗരസഭ എന്നിവിടങ്ങളിലാണ് രോഗബാധിതരുടെ എണ്ണത്തില്‍ വര്‍ധനവുള്ളത്. കര്‍ശന നിയന്ത്രണങ്ങള്‍ നിലനില്‍ക്കെ ജില്ലയില്‍ ആളുകള്‍ കൂട്ടം കൂടുകയും നിയന്ത്രണങ്ങള്‍ പാലിക്കത്തതുമാണ് വീഴ്ചക്ക് കാരണമെന്ന് ജില്ലാ ഭരണക്കുടം വിലയിരുത്തി.

മലപ്പുറം

മലപ്പുറംജില്ലയില്‍ ഇന്നലെ ഒരാള്‍ കൂടി കോവിഡ് ബാധിതനായി മഞ്ചേരി ഗവണ്‍മെന്റ് മെഡിക്കല്‍ കോളജ് ആശുപത്രിയില്‍ ചികിത്സയിലിരിക്കെ മരിച്ചു. പെരുവള്ളൂര്‍ സ്വദേശി കോയാമു (82) ആണ് മരിച്ചത്. ഇതോടെ ജില്ലയില്‍ കോവിഡ് ബാധിച്ച് മരിച്ചവരുടെ എണ്ണം പതിമൂന്നായി. ഇവരെ കൂടാതെ ഒരാള്‍ രോഗം ഭേദമായി ആശുപത്രിയില്‍ തുടര്‍ നിരീക്ഷണത്തിലിരിക്കെ മരിച്ചിരുന്നു. ജില്ലയില്‍ 141 പേര്‍ക്കു കൂടി ഇന്നലെ കോവിഡ് 19 സ്ഥിരീകരിച്ചതായി ജില്ലാ കളക്ടര്‍ കെ. ഗോപാലകൃഷ്ണന്‍ അറിയിച്ചു. ഇവരില്‍ 84 പേര്‍ക്കും സന്പര്‍ക്കത്തിലൂടെയാണ് രോഗബാധ. ഇതില്‍ 10 പേര്‍ക്ക് രോഗബാധയുണ്ടായതിന്റെ ഉറവിടം കണ്ടെത്തിയിട്ടില്ല. 74 പേര്‍ക്ക് നേരത്തെ രോഗബാധയുണ്ടായവരുമായുള്ള നേരിട്ടുള്ള ബന്ധത്തിലൂടെയാണ് രോഗബാധ സ്ഥിരീകരിച്ചിരിക്കുന്നത്. ഇന്നലെ രോഗം സ്ഥിരീകരിച്ചവരില്‍ 29 പേര്‍ ഇതര സംസ്ഥാനങ്ങളില്‍ നിന്നെത്തിയവരും ശേഷിക്കുന്ന 28 പേര്‍ വിവിധ വിദേശ രാജ്യങ്ങളില്‍ നിന്നെത്തിയവരാണ്. ഇന്നലെ 36 പേര്‍ ജില്ലയില്‍ രോഗമുക്തരായി. വിദഗ്ധ ചികിത്സക്കു ശേഷം ഇതുവരെ 1,368 പേരാണ് രോഗമുക്തരായി വീടുകളിലേക്ക് മടങ്ങിയത്.32,547 പേരാണ് ഇപ്പോള്‍ ജില്ലയില്‍ നിരീക്ഷണത്തിലുള്ളത്. 817 പേര്‍ വിവിധ ആശുപത്രികളില്‍ നിരീക്ഷണത്തിലുണ്ട്.