ഇനി അഫിലിയേറ്റഡ് കോളേജുകളില്ല എല്ലാം സ്വയംഭരണം

കേന്ദ്ര സര്‍ക്കാരിന്റെ വിദ്യാഭ്യാസനയം ഉന്നതവിദ്യാഭ്യാസമേഖലയെ താളം തെറ്റിക്കും . അഫിലിയേറ്റഡ് കോളേജ് സംവിധാനം അവസാനിപ്പിക്കുന്നതോടെ കോളേജുകള്‍ സ്വതന്ത്രമായ നിലനില്‍പ്പിനുള്ള വഴി കണ്ടെത്തേണ്ടിവരും. രാജ്യത്ത് നിലവില്‍ 700 സര്‍വകലാശാലയിലായി 35,000ല്‍പരം അഫിലിയേറ്റഡ് കോളേജുകളുണ്ട്. ഇവയ്ക്ക് സംസ്ഥാനസര്‍ക്കാരുകളുടെയും യുജിസിയുടെയും സാമ്പത്തികസഹായം ലഭിക്കുന്നു. പുതിയ സംവിധാനത്തില്‍ യുജിസി ഇല്ലാതാകും. പൊതു, സ്വകാര്യ കോളേജുകള്‍ അടക്കം എല്ലാം സ്വയംഭരണ സ്ഥാപനങ്ങളായി മാറും. നിലനില്‍പ്പിനായി ഇവയ്ക്ക് വിദ്യാര്‍ഥികളില്‍നിന്ന് ഉയര്‍ന്ന ഫീസ് വാങ്ങേണ്ടിവരും. ഇതോടെ സാധാരണക്കാരും ദരിദ്രജനവിഭാഗങ്ങളും ബുദ്ധിമുട്ടിലാകും. വിദൂരഗ്രാമങ്ങളില്‍ പ്രവര്‍ത്തിക്കുന്ന കോളേജുകള്‍ അടക്കം സ്വയംഭരണസ്ഥാപനമെന്ന നിലയില്‍ പ്രവര്‍ത്തിക്കേണ്ടിവരുന്നത് പ്രായോഗികമല്ലെന്ന് ഈ മേഖലയിലെ വിദഗ്ധര്‍ ചൂണ്ടിക്കാട്ടിയിരുന്നു.ഐഐടി, ഐഐഎം പോലുള്ള സ്ഥാപനങ്ങളായി ഓരോ കോളേജിനെയും ഉയര്‍ത്തുമെന്നാണ് സര്‍ക്കാര്‍ അവകാശപ്പെടുന്നത്. ഐഐടികളും ഐഐഎമ്മുകളും മതിയായ ഫണ്ട് കിട്ടാതെ ഫീസുകള്‍ കുത്തനെ ഉയര്‍ത്തുകയാണ്. കോളേജുകള്‍ക്ക് ഫണ്ട് ലഭ്യമാക്കാന്‍ സംസ്ഥാനതലത്തില്‍ സംവിധാനം ആവിഷ്‌കരിക്കും. ഇതോടെ കേന്ദ്രസര്‍ക്കാരിനു ഫണ്ടിന്റെ ഉത്തരവാദിത്തത്തില്‍നിന്ന് ഒഴിയാം. വിദ്യാഭ്യാസനയം മാറുന്നത് 34 വര്‍ഷത്തിനുശേഷം രാജ്യത്ത് വിദ്യാഭ്യാസനയം പരിഷ്‌കരിക്കുന്നത് 34 വര്‍ഷത്തിനുശേഷം. രാജീവ്ഗാന്ധി സര്‍ക്കാര്‍ 1986ല്‍ നടപ്പാക്കിയ വിദ്യാഭ്യാസനയമാണ് നിലനിന്നത്. ദീര്‍ഘകാലത്തിനുശേഷം വിദ്യാഭ്യാസനയം മാറ്റുന്ന ചരിത്രസന്ദര്‍ഭത്തിലാണ് രാജ്യമെന്ന് മന്ത്രി പ്രകാശ് ജാവദേക്കര്‍ പറഞ്ഞു. മാനവവിഭവശേഷിമന്ത്രി രമേശ് പൊഖ്റിയാലും ജാവദേക്കറും ചേര്‍ന്നാണ് പുതിയ നയം പ്രഖ്യാപിച്ചത്.