ചെന്നിത്തലേ കഴമ്പുള്ളതു വല്ലതുമുണ്ടോ

 

എല്‍ഡിഎഫ് സര്‍ക്കാരിനെതിരെ കഴമ്പുള്ള ഒരാക്ഷേപം പോലും ഉന്നയിക്കാന്‍ പ്രതിപക്ഷനേതാവ് ചെന്നിത്തലയ്ക്ക് കഴിയുന്നില്ലെന്ന് എല്‍ഡിഎഫ് കണ്‍വീനര്‍ എ വിജയരാഘവന്‍. പ്രതിപക്ഷനേതാവിന്റെ വിലകുറഞ്ഞ ആരോപണങ്ങള്‍ ബിജെപിയും ഏറ്റുപിടിക്കുന്ന വിചിത്ര നീക്കമാണ് കാണുന്നതെന്നും അദ്ദേഹം വാര്‍ത്താസമ്മേളനത്തില്‍ പറഞ്ഞു. നല്ലനിലയില്‍ മുന്നോട്ടുപോകുന്ന സര്‍ക്കാരിനെ ഇകഴ്ത്തിക്കാണിക്കാനുള്ള ബോധപൂര്‍വമായ ശ്രമമാണിത്. കോവിഡ് പ്രതിരോധത്തിലുള്‍പ്പെടെ രാജ്യത്തിനകത്തും പുറത്തുനിന്നുമായി സംസ്ഥാന സര്‍ക്കാരിന് വലിയ അംഗീകാരമാണ് ലഭിക്കുന്നത്. ഇത് വരാനിരിക്കുന്ന തെരഞ്ഞെടുപ്പുകളില്‍ യുഡിഎഫിന് കനത്ത തിരിച്ചടിയാകുമെന്ന തിരിച്ചറിവാണ് ചെന്നിത്തലയുടേയും കൂട്ടരുടേയും അസത്യപ്രചാരണത്തിന് പിന്നില്‍. മാഹാമാരി പടരുന്ന സമയത്ത് ഹൈക്കോടതിയുടെ ഉത്തരവ് ലംഘിച്ചും സമരനാടകങ്ങള്‍ നടത്തി. ഇതുപോലൊരു സാഹചര്യത്തില്‍ ഇന്ത്യയില്‍ മറ്റൊരിടത്തും ഇത്തരത്തില്‍ സമരം നടത്താന്‍ ഒരു പ്രതിപക്ഷകക്ഷികളും തയ്യാറായിട്ടില്ല. 1.33 ലക്ഷംപേര്‍ക്ക് പിഎസ്സിവഴി നിയമനം നല്‍കിയപ്പോള്‍, മുന്‍ യുഡിഎഫ് സര്‍ക്കാര്‍ ആകെ നല്‍കിയത് 1.29 ലക്ഷം മാത്രം. യുഡിഎഫ് കാലത്തെ താല്‍ക്കാലിക നിയമനം 39,898, ഇപ്പോള്‍ 11,674. എന്നിട്ടും ചെന്നിത്തല നിയമനത്തെക്കുറിച്ച് കള്ളക്കഥകള്‍ ചമയ്ക്കുന്നു. സമീപകാലത്ത് തെളിയിക്കപ്പെട്ട ടൈറ്റാനിയം അഴിമതി നടന്നത് കോണ്‍ഗ്രസ് നേതൃത്വം നല്‍കിയ ഭരണകാലത്താണ്. 108 കോടി രൂപയുടെ ഉപകരണങ്ങള്‍ വാങ്ങിയിട്ട് 256 കോടിയുടെ കണക്കുണ്ടാക്കിയായിരുന്നു തട്ടിപ്പ്. ജമാഅത്തെ ഇസ്ലാമിയുള്‍പ്പെടെയുള്ള വര്‍ഗീയവാദികള്‍ക്കൊപ്പം കൂട്ടുകെട്ടിന് ഒരുങ്ങുകയും സംഘപരിവാറിന് സഹായകമായ നിലപാട് സ്വീകരിക്കുകയും ചെയ്യുന്നു. ഇതു മറച്ചുപിടിക്കാനാണ് മുഖ്യമന്ത്രിക്കും കോടിയേരിക്കുമെതിരെ കള്ളപ്രചാരവേലയെന്നും അദ്ദേഹം പറഞ്ഞു.