മിന്നുന്നതു പൊന്നുമാത്രം

കോവിഡ് പ്രതിസന്ധി നീളുന്നതിനാല്‍ വന്‍കിട നിക്ഷേപകര്‍ സ്വര്‍ണത്തിലേക്കു മാത്രം തിരിയുന്നതാണു രാജ്യാന്തര വിപണിയില്‍ ഡിമാന്‍ഡ് കുത്തനെ ഉയരാന്‍ കാരണമാകുന്നത്. ഡോളര്‍ ഉള്‍പ്പെടെയുള്ള കറന്‍സികളുടെ തളര്‍ച്ചയും കേന്ദ്രബാങ്കുകള്‍ പലിശ നിരക്കു കുറച്ചതിനാല്‍ പണലഭ്യത ഉയര്‍ന്നതുമെല്ലാം സ്വര്‍ണവില റെക്കോര്‍ഡില്‍ എത്താന്‍ കാരണമായി. അമേരിക്ക-ചൈന സംഘര്‍ഷവും സ്വര്‍ണത്തിലേക്കു തിരിയാന്‍ നിക്ഷേപകരെ പ്രേരിപ്പിക്കുന്നു. കഴിഞ്ഞ ശനിയാഴ്ച വ്യാപാരം അവസാനിപ്പിക്കുമ്പോള്‍ 1900 നിലവാരത്തിലായിരുന്നു വില. ഇന്നലെ വ്യാപാരത്തിനിടെ 42 ഡോളര്‍ വരെ ഉയര്‍ന്നു. സാമ്പത്തികമാന്ദ്യവും പണപ്പെരുപ്പവും തുടരുന്നതിനാല്‍ വരും ദിവസങ്ങളിലും വില ഉയര്‍ന്നേക്കും. രാജ്യാന്തരവിപണിയില്‍ സ്വര്‍ണവില കുതിക്കുന്നതിനാല്‍, കേരളത്തില്‍ വരുന്ന ദിവസങ്ങളിലും വില കൂടിയേക്കും. ഇപ്പോഴത്തെ അവസ്ഥ തുടര്‍ന്നാല്‍ ഒരാഴ്ചയ്ക്കുള്ളില്‍ പവന്‍ വില 40,000 രൂപ കടന്നേക്കുമെന്ന് ഓള്‍ കേരള ഗോള്‍ഡ് ആന്‍ഡ് സില്‍വര്‍ മര്‍ച്ചന്റ്‌സ് അസോസിയേഷന്‍ സംസ്ഥാന ട്രഷററും ജെം ആന്‍ഡ് ജ്വല്ലറി ഡൊമസ്റ്റിക് കൗണ്‍സില്‍ ദേശീയ ഡയറക്ടറുമായ എസ്. അബ്ദുല്‍ നാസര്‍ പറഞ്ഞു. വില ഉയരുന്നതോടെ കേരളത്തില്‍ അഡ്വാന്‍സ് ബുക്കിങ് ഉയര്‍ന്നിട്ടുണ്ട്. ധനപ്രതിസന്ധി ഉണ്ടാകുമ്പോഴും ബോണ്ടുകളുടെയും ഓഹരികളുടെയും വിലയിടിയുമ്പോഴും ഏറ്റവും സുരക്ഷിതമായ സമ്പാദ്യമാര്‍ഗമാണ് സ്വര്‍ണം. സാമ്പത്തികപ്രതിസന്ധി വേളയില്‍ ചില നിക്ഷേപകര്‍ക്കെങ്കിലും ബാങ്ക് നിക്ഷേപവും സര്‍ക്കാര്‍ ബോണ്ടുകളുംപോലും വിഷമകരമാകാറുണ്ട്. യഥാര്‍ഥ പലിശനിരക്ക് ഇടിയുമ്പോഴാണ്് സ്വര്‍ണവില കുത്തനെ ഉയരുന്നത്. ക്യൂ ഇ (ക്വാണ്ടിറ്റേറ്റീവ് ഈസിങ്-പലിശനിരക്ക് നിയന്ത്രിക്കുന്നതിനും സാമ്പത്തിക പ്രവര്‍ത്തനം ത്വരിതപ്പെടുത്തുന്നതിനുമായി കേന്ദ്ര ബാങ്കുകള്‍ കടപ്പത്രങ്ങള്‍ വാങ്ങുന്ന പ്രവണത) കൂടിയിട്ടുണ്ട്. ഈ സാഹചര്യത്തില്‍ സ്വര്‍ണമാണ് ആപേക്ഷികമായി സുരക്ഷിതമെന്ന് വന്നു. സ്വാഭാവികമായും ധന ആസ്തിയില്‍നിന്ന് സ്വര്‍ണം ഉള്‍പ്പെടെയുള്ള വിലപിടിപ്പുള്ള വസ്തുക്കളും ചരക്കുകളും വാങ്ങിക്കൂട്ടാന്‍ തുടങ്ങി. അതാണ് ഇപ്പോള്‍ നടക്കുന്നത്. പണപ്പെരുപ്പകാലത്തെ എറ്റവും നല്ല ശേഖരം എന്ന നിലയിലാണ് സ്വര്‍ണം ജനകീയമാകുന്നത്. സ്വര്‍ണവില 2011ല്‍ 1900 ഡോളറായി ഉയര്‍ന്നപ്പോള്‍ പല നിക്ഷേപകരും സ്വര്‍ണം വാങ്ങിക്കൂട്ടി. ഇടിഎഫ് (എക്‌സേഞ്ച് ട്രേഡഡ് ഫണ്ട്‌സ്) വഴിയും സ്വര്‍ണം സംഭരിക്കുന്നു.