ചാനലിന്റെ ചര്‍ച്ച പരിപാടിയില്‍ പാര്‍ട്ടി പ്രതിനിധികള്‍ക്ക് സമയം നല്‍കുന്നില്ലെന്ന് ആരോപിച്ച് സിപിഎം ഏഷ്യനെറ്റിനെതിരെ നടത്തുന്ന പ്രചാരണം ശക്തമാക്കുന്നു. ഇന്നലെ മുഖപ്രസംഗത്തിലൂടെ ചാനലിനെതിരെ തിരിഞ്ഞ ദേശാഭിമാനി ഇന്ന് പാര്‍ട്ടി സംസ്ഥാന സെക്രട്ടറിയുടെ ലേഖനത്തിലുടെയാണ് വിമർശനം കര്‍ശനമാക്കിയിട്ടുള്ളത്. എല്ലാവരെയും യോജിപ്പിച്ച് നിര്‍ത്തേണ്ട ഈ കാലത്ത് അതിന് നേതൃത്വം നല്‍കുന്നതിന് പകരം ഇഞ്ചി തിന്ന കുരങ്ങന് കള്ള് കൊടുക്കുന്ന പണിയാണ് ഏഷ്യാനെറ്റ് മനോരമാദി മാധ്യമങ്ങള്‍ ചെയ്യുന്നതെന്ന് പറഞ്ഞുകൊണ്ടാണ് കോടിയേരി ബാലകൃഷ്ണന്‍ തന്റെ മാധ്യമ-ഏഷ്യാനെറ്റ് വിമര്‍ശനത്തിന് തുടക്കം കുറിച്ചത്. മാധ്യമ സ്വാതന്ത്ര്യത്തിനുവേണ്ടി നിലകൊള്ളുന്ന പ്രസ്ഥാനമാണ് സിപിഎം. തുറന്ന സംവാദങ്ങള്‍ നടക്കേണ്ട പൊതുയിടങ്ങളെ അടഞ്ഞ ജാലിയാന്‍വാലാ ബാഗുകളാക്കാന്‍ ചാനലുകള്‍ ശ്രമിക്കുകയാണെന്ന് അദ്ദേഹം ആരോപിച്ചു. രാത്രി ചര്‍ച്ചകളെ യുഡിഎഫ് ബിജെപി അജണ്ട നടപ്പിലാക്കാനുള്ള ആസുത്രിത വേദിയാക്കി ഏഷ്യനെറ്റ് മാറ്റിയെന്ന് കോടിയേരി ബാലകൃഷ്ണന്‍ ലേഖനത്തില്‍ ആരോപിച്ചു. സിപിഎമ്മിന്റെ ബഹിഷ്‌ക്കരണം പ്രാകൃതമാണെന്ന് പറഞ്ഞ ഏഷ്യനെറ്റ് എഡിറ്ററുടെ നടപടിയെ അദ്ദേഹം പരിഹസിച്ചു.ചോദ്യങ്ങള്‍ ചോദിക്കുകയും ഉത്തരം പറയാന്‍ അവസരം നല്‍കാതിരിക്കുകയും ചെയ്യുന്നത് കാട്ടളത്തമാണെന്ന് കോടിയേരി ബാലകൃഷ്ണന്‍ പറഞ്ഞു. ചര്‍ച്ചകളില്‍ അവതരാകര്‍ക്ക് ഒരര്‍ത്ഥത്തില്‍ റഫറിയുടെ റോളാണ്. എന്നാല്‍ റഫറി ഗോളടിക്കുക എന്നത് ഇത്തരം ചാനലുകള്‍ ഒരു നയമാക്കി മാറ്റിയിരിക്കയാണ്. ബിജെപിയുടെ പാര്‍ലമെന്റംഗത്തിന്റെ ഉടമസ്ഥതയിലുള്ള ചാനല്‍ എല്‍ഡിഎഫ് വിരുദ്ധത രാഷ്ട്രീയ നയമായി സ്വീകരിച്ചിരിക്കുന്നത് അത്ഭുതകരമല്ല. അങ്ങനെ സ്വീകരിക്കാനുള്ള സ്വാതന്ത്ര്യം അവര്‍ക്കുണ്ട്. എന്നിട്ടും നിഷ്പക്ഷതയുടെ മുഖംമൂടി അണിയുന്നത് കപടതയാണെന്നും ലേഖനത്തില്‍ കോടിയേരി ബാലകൃഷ്ണന്‍ വിമര്‍ശിക്കുന്നു. ചര്‍ച്ചകളില്‍ സിപിഎം പ്രതിനിധികളുടെ നാവിന് കത്രികപ്പൂട്ട് ഇടാന്‍ നോക്കുന്നു. ഇക്കാര്യങ്ങളില്‍ സ്വയം വിമര്‍ശനം നടത്തുന്നതിന് പകരം സിപിഎമ്മിനെതിരായ കലിതുള്ളലായി ഏഷ്യനെറ്റ് പത്രാധിപര്‍ ഇറങ്ങിയത് അപക്വമായ നടപടിയാണെന്നും ലേഖനം വിമര്‍ശിക്കുന്നു. എല്‍ഡിഎഫും യുഡിഎഫും ഒന്നാണെന്ന് വരുത്തി തീര്‍ക്കാനുള്ള നീക്കം കാഞ്ഞിരവും ചന്ദനവും ഒന്നാണെന്ന് പറയുന്നത് പോലെയാണൈന്ന് പാര്‍ട്ടി സെക്രട്ടറി പരിഹസിച്ചു. പത്തുമാസത്തിന് ശേഷം നടക്കാന്‍ പോകുന്ന നിയമസഭ തെരഞ്ഞെടുപ്പ് ലാക്കാക്കി യുഡിഎഫിനും ബിജെപിയ്ക്കുവേണ്ടി തറയൊരുക്കല്‍ നടത്തുന്നതല്ല നിഷ്പക്ഷ മാധ്യമ പ്രവര്‍ത്തനമെന്നും കോടിയേരി ബാലകൃഷ്ണന്‍ വിമര്‍ശിച്ചു.