ജോലി രാഷ്ട്രീയം , 20 വര്‍ഷം കൊണ്ട് കോടീശ്വരന്‍

 

  ഇരുപത് വര്‍ഷം മുന്‍പ് ഒരാള്‍ നല്‍കുന്ന സത്യ പ്രസ്താവനയില്‍ സാധാരണക്കാരന്‍. രണ്ടു പതിറ്റാണ്ടുകൊണ്ട് കോടീശ്വരന്‍. ബിസിനസ് രംഗത്തെ വളര്‍ച്ചയല്ല ഇത്. കേരളത്തിലെ ഒരു യു ഡി എഫ് നേതാവിനെക്കുറിച്ച് ഹൈക്കോടതിയില്‍ എത്തിയിരിക്കുന്ന വിവരങ്ങളിലാണ് ഇക്കാര്യമുള്ളത്. ലീഗ് നേതാവും മുന്‍ മന്ത്രിയുമായ ഇബ്രാഹിം കുഞ്ഞാണ് കഥയിലെ നായകന്‍. സാധാരണ രാഷ്ട്രീയപ്രവര്‍ത്തകന്‍മാത്രമായിരുന്ന വി കെ ഇബ്രാഹിംകുഞ്ഞ് 2001ലാണ് ആദ്യമായി നിയമസഭയിലേക്ക് മത്സരിച്ചത്. അപ്പോള്‍ തെരഞ്ഞെടുപ്പ് കമീഷന് സമര്‍പ്പിച്ച സത്യവാങ്മൂലത്തില്‍ തന്റെ പേരില്‍ സ്വത്തുക്കളില്ലെന്ന് രേഖപ്പെടുത്തിയിരുന്നതായി ഹര്‍ജിയില്‍ പറയുന്നു. പിന്നീട് നാലുതവണ എംഎല്‍എയും രണ്ടുവട്ടം മന്ത്രിയുമായ ഇബ്രാഹിംകുഞ്ഞ്, തന്റെയും കുടുംബാംഗങ്ങളുടെയും പേരില്‍ ശതകോടികളുടെ സ്വത്താണ് സമ്പാദിച്ചത്. സ്വത്തുവിവരം സ്‌കൈ ഫോം മാട്രെസസ് ഉല്‍പ്പാദിപ്പിക്കുന്ന പെരിയാര്‍ പോളിമേഴ്സിന്റെ മാനേജിങ് ഡയറക്ടര്‍മാര്‍ ഇബ്രാഹിംകുഞ്ഞും മകനുമാണ്. 25 കോടി രൂപ വാര്‍ഷിക ആദായമുള്ള കമ്പനിയാണിത്. പൊള്ളാച്ചിയിലെ പെരിയാര്‍ കയര്‍ പ്രോഡക്ട്സും ഇദ്ദേഹത്തിന്റെ ഉടമസ്ഥതയിലാണ്. പാലാരിവട്ടം ജനത റോഡിലെ യുണൈറ്റഡ് പ്ലാസ ഷോപ്പിങ് കോംപ്ലക്സ് ഭാര്യയുടെകൂടി പേരില്‍. ഇടപ്പള്ളി ബൈപാസില്‍ പാടിവട്ടത്തെ ഹൈവേ സ്‌ക്വയര്‍ ഷോപ്പിങ് കോംപ്ലക്‌സ് മകന്റെ കൂടി പേരില്‍. ആലുവ മണപ്പുറത്തിനുസമീപമുള്ള ഭൂമിയും കെട്ടിടവും മകന്റെകൂടി പേരില്‍. ആലങ്ങാട് പഞ്ചായത്തിലെ കൊങ്ങോര്‍പ്പിള്ളിയില്‍ രണ്ട് ഏക്കര്‍ ഭൂമിയും കെട്ടിടവും. നെടുമ്പാശേരി വിമാനത്താവളപരിസരത്തെ ഹോട്ടല്‍ ഗേറ്റ്വേ ഇന്നിന്റെ ഭൂമി, ജിദ്ദയിലെ ഹനാന്‍ ട്രേഡിങ്ങില്‍ 500 കോടി വിദേശപണവും നിക്ഷേപം. പനമ്പിള്ളി നഗറിലെ (നിലവില്‍ പ്രവര്‍ത്തിക്കുന്നില്ല) ഐഒസി പെട്രോള്‍ പമ്പിന്റെയും സ്ഥലത്തിന്റെയും ഉടമസ്ഥത. പാലാരിവട്ടം പാലം നിര്‍മാണ അഴിമതിയിലും അനധികൃത സ്വത്തുസമ്പാദനത്തിലും ഇബ്രാഹിംകുഞ്ഞിനെതിരെ നടക്കുന്ന അന്വേഷണത്തില്‍ ഈ വിവരങ്ങളും പരിഗണിക്കണമെന്ന് ആവശ്യപ്പെട്ടാണ് ഹര്‍ജി. കളമശേരി സ്വദേശി ജി ഗിരീഷ്ബാബുവാണ് ഹര്‍ജിക്കാരന്‍. പാലാരിവട്ടം അഴിമതിക്കേസില്‍ അഞ്ചാംപ്രതിയായ ഇബ്രാഹിംകുഞ്ഞിനെതിരെ വിജിലന്‍സും അനധികൃത സ്വത്തുസമ്പാദന കേസില്‍ എന്‍ഫോഴ്സ്മെന്റുമാണ് അന്വേഷണം നടത്തുന്നത്.