വെള്ളാപ്പള്ളിക്കെതിരെ കുറ്റപത്രം കോടതിയിലേക്ക്

  കൊല്ലം എസ്എന്‍ കോളേജ് സുവര്‍ണ ജൂബിലി ഫണ്ട് ക്രമക്കേടില്‍ എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശനെതിരായ കുറ്റപത്രം അന്വേഷകസംഘം ക്രൈംബ്രാഞ്ച് എഡിജിപി ടോമിന്‍ ജെ തച്ചങ്കരിക്ക് കൈമാറി. വിജിലന്‍സ് (സ്പെഷ്യല്‍ യൂണിറ്റ്) എസ്പി ഷാജി സുഗുണന്റെ നേതൃത്വത്തിലാണ് കേസ് അന്വേഷിച്ചത്. അഡ്വക്കേറ്റ് ജനറലിന്റെ നിയമോപദേശം ലഭിച്ചാലുടന്‍ കുറ്റപത്രം കോടതിയില്‍ സമര്‍പ്പിക്കും. പരാതിയിലെ കാര്യങ്ങളുമായി ബന്ധപ്പെട്ട് ചൊവ്വാഴ്ച കൊല്ലം ക്രൈംബ്രാഞ്ചില്‍ വെള്ളാപ്പള്ളി അനുബന്ധരേഖകള്‍ ഹാജരാക്കിയെങ്കിലും അപൂര്‍ണമായതിനാല്‍ അംഗീകരിച്ചില്ല. ഇതിനിടെ അന്വേഷക ഉദ്യോഗസ്ഥനെ മാറ്റണമെന്ന് ആവശ്യപ്പെട്ട് വെള്ളാപ്പള്ളി ഹൈക്കോടതിയില്‍ സമര്‍പ്പിച്ച ഹര്‍ജി ബുധനാഴ്ച തള്ളി. ക്രൈംബ്രാഞ്ചിലിരിക്കെ കേസ് അന്വേഷിച്ച ഷാജി സുഗുണന്‍ ഇപ്പോള്‍ വിജിലന്‍സ് എസ്പിയാണ്. അതിനാല്‍ അദ്ദേഹം കുറ്റപത്രം സമര്‍പ്പിക്കുന്നതിന്റെ നിയമസാധുത ചോദ്യംചെയ്തായിരുന്നു ഹര്‍ജി. 1997ല്‍ എസ്എന്‍ കോളേജ് സുവര്‍ണ ജൂബിലി ആഘോഷങ്ങള്‍ക്കായി പിരിച്ചതില്‍ 55 ലക്ഷം രൂപ വെള്ളാപ്പള്ളി സ്വന്തം അക്കൗണ്ടിലേക്കു മാറ്റിയെന്നാണ് കേസ്. ആഘോഷ കമ്മിറ്റി എക്സിക്യൂട്ടീവ് അംഗമായിരുന്ന കടപ്പാക്കട ചൈതന്യയില്‍ പി സുരേന്ദ്രബാബുവാണ് പരാതിക്കാരന്‍. ഇതിനിടെ കൊല്ലം എസ്എന്‍ കോളേജ് സുവര്‍ണ ജൂബിലി ഫണ്ട് തട്ടിപ്പുകേസില്‍ അന്വേഷണ ഉദ്യോഗസ്ഥനെ മാറ്റണമെന്ന് ആവശ്യപ്പെട്ട് സമര്‍പ്പിച്ച ഹര്‍ജി വെള്ളാപ്പള്ളി നടേശന്‍ പിന്‍വലിച്ചു. കേസില്‍ ഹൈക്കോടതിയുടെ ഉത്തരവുകള്‍ പരിശോധിച്ച കോടതി ഹര്‍ജി പിന്‍വലിക്കുന്നതാകും ഉചിതമെന്നും പിഴചുമത്തുമെന്നും വ്യക്തമാക്കിയതോടെയാണ് ഹര്‍ജി പിന്‍വലിച്ചത്. പുതിയ ഉദ്യോഗസ്ഥനെ നിയോഗിക്കണമെന്നും അന്വേഷണം പൂര്‍ത്തിയാക്കുംവരെ കുറ്റപത്രം സമര്‍പ്പിക്കുന്നത് തടയണമെന്നും ആവശ്യപ്പെട്ടാണ് വെള്ളാപ്പള്ളി ഹര്‍ജി നല്‍കിയിരുന്നത്. തന്റെ പരാതി കേള്‍ക്കാന്‍ കോടതി നിര്‍ദേശിച്ചിരുന്നുവെന്നും എന്നാല്‍, അന്വേഷണ ഉദ്യോഗസ്ഥന്‍ തന്റെ ഭാഗം കേള്‍ക്കാന്‍ തയ്യാറാകുന്നില്ലെന്നും പക്ഷപാതപരമായി പ്രവര്‍ത്തിക്കുകയാണെന്നുമാണ് വെള്ളാപ്പള്ളിയുടെ ആരോപണം. സുവര്‍ണ ജൂബിലി ആഘോഷനടത്തിപ്പിനായി വെള്ളാപ്പള്ളി ജനറല്‍ കണ്‍വീനറായി പിരിച്ച തുകയില്‍ 48 ലക്ഷം രൂപ വെട്ടിച്ചെന്നാണ് കേസ്.