അംജദ്അലിവമ്പന്‍ അന്വേഷണം വടക്കോട്

സ്വര്‍ണ കള്ളക്കടത്തില്‍ കസ്റ്റംസിന്റെ പിടിയിലായ അംജദ് അലിക്ക് വന്‍ ഇടപാട്. പാലക്കാട് സ്വകാര്യകമ്പനി രൂപീകരിച്ചതില്‍ ദുരൂഹതയേറുന്നു. സ്വര്‍ണക്കടത്തിന് ഉപയോഗിച്ചത് കമ്പനിയുടെ പാലക്കാട്ടെ മേല്‍വിലാസത്തിലുളള ബെന്‍സ് കാറായിരുന്നു. കാര്‍ കസ്റ്റംസിന്റെ കസ്റ്റഡിയിലാണ്. മലപ്പുറത്തുകാരന്‍ അംജദ് അലി സ്വര്‍ണക്കടത്തിന് ഉപയോഗിച്ചത് പാലക്കാട് റജിസ്‌ട്രേഷനിലുളള കാറാണെന്ന് കസ്റ്റംസ് വ്യക്തമാക്കിയിരുന്നു. KL09AR 9669. മാനേജിങ് ഡയറക്ടര്‍, അവോറ വെഞ്ച്വേഴ്‌സ് പ്രൈവറ്റ് ലിമിറ്റഡ്, 39/744, നൂറണി, മൈത്രിനഗര്‍, പാലക്കാട്. ഇതാണ് മേല്‍വിലാസം. കമ്പനിക്കുവേണ്ടി വീട് വാടകയ്‌ക്കെടുത്ത് ജിഎസ്ടി റജിസ്‌ട്രേഷന്‍ ഉള്‍പ്പെടെ നടത്തിയിരുന്നു. കമ്പനിയെ മറയാക്കിയും അലി സ്വര്‍ണകളളക്കടത്ത് നടത്തിയോയെന്ന് കസ്റ്റംസ് അന്വേഷിക്കുന്നത്. വീടുകളുടെ ഇന്റീരിയര്‍ ജോലിയുമായി ബന്ധപ്പെട്ടായിരുന്നു പാലക്കാട്ടെ കമ്പനി രൂപീകരണം. ഇതിനിടെ ജി എസ് ടി വിഭാഗം നടത്തിയ പരിശോധനയില്‍ രേഖകളില്ലാത്ത സ്വര്‍ണ്ണം പിടിച്ചെടുത്തു.കരുനാഗപ്പള്ളി ജിഎസ്ടി മൊബൈല്‍ സ്‌ക്വാഡ് (നമ്പര്‍-3) നടത്തിയ പരിശോധനയിലാണ് 4.35 കിലോ സ്വര്‍ണം പിടിച്ചത്. രണ്ട് കേസുകളിലായാണ് സ്വര്‍ണം പിടിച്ചെടുത്തത്.കുറ്റിവട്ടത്തിനു സമീപം നടത്തിയ വാഹന പരിശോധനയ്ക്കിടെ സംശയാസ്പദമായി കണ്ട് വാഹനത്തെ പിന്തുടര്‍ന്നുള്ള അന്വേഷണത്തില്‍ 3285 ഗ്രാം സ്വര്‍ണാഭരണങ്ങള്‍ പിടികൂടി. തൃശൂരില്‍ നിന്നും വര്‍ക്കലയിലേക്ക് കൊണ്ടുപോകുകയായിരുന്ന 1.56 കോടി രൂപാ വിലവരുന്ന സ്വര്‍ണാഭരണങ്ങള്‍ക്ക് 9.11 ലക്ഷം രൂപാ പിഴയായി ഈടാക്കി. കരുനാഗപ്പള്ളി മാര്‍ക്കറ്റിന് സമീപം നടന്ന റെയ്ഡിലാണ് 1065 ഗ്രാം തൂക്കം വരുന്ന സ്വര്‍ണം പിടികൂടിയത്. ഉരുക്കിയ നിലയിലായിലുള്ള സ്വര്‍ണ്ണം വിവിധ ജില്ലകളിലെ കടകളിലേക്ക് കൊണ്ടുപോകുകയായിരുന്നു.53 ലക്ഷം രൂപാ വിലവരുന്ന സ്വര്‍ണത്തിന് 3.18 ലക്ഷം രൂപാ പിഴ ഈടാക്കി വിട്ടു നല്‍കി. ഈ കേസുകളിലെ വിവരങ്ങള്‍ എന്‍ ഐ എ തേടിയേക്കും ഇതിനിടെ സ്വര്‍ണക്കടത്ത് കേസില്‍ അവസാനം പിടിയിലായ രണ്ടുപേരും മുസ്ലിംലീഗ് പ്രാദേശിക നേതാക്കള്‍. ഈ കേസില്‍ പാര്‍ടിയുമായി അടുപ്പമില്ലെന്ന് നേതാക്കള്‍ ആവര്‍ത്തിക്കുമ്പോഴാണ് കൂടുതല്‍ അറസ്റ്റ്. ഇനി ആരെന്നത് ലീഗിന്റെ നെഞ്ചിടിപ്പേറ്റുന്നു. കുറുവ പഞ്ചായത്തിലെ പഴമള്ളൂരില്‍ ലീഗ് നേതാവായ അബൂബക്കര്‍ പഴയേടത്ത് (മലബാര്‍ അബു-- 60), കൂട്ടിലങ്ങാടി നെച്ചിക്കുറ്റിയിലെ ലീഗ് പ്രവര്‍ത്തകന്‍ പടിക്കമണ്ണില്‍ അബ്ദുള്‍ ഹമീദ് (54) എന്നിവരാണ് വെള്ളിയാഴ്ച കസ്റ്റംസിന്റെ പിടിയിലായത്. അബൂബക്കര്‍ മലപ്പുറം കോട്ടപ്പടിയിലെ മലബാര്‍ ജ്വല്ലറി ഉടമയും ഹമീദ് കൂട്ടിലങ്ങാടിയിലെ അമീന്‍ ഗോള്‍ഡ് ജ്വല്ലറി ഉടമയുമാണ്. അബൂബക്കര്‍ കുറുവയില്‍ ലീഗിന്റെ മുഖ്യ സാമ്പത്തിക ഉറവിടമാണ്. ലീഗ് പരിപാടികളുടെ നിയന്ത്രണമെല്ലാം അബൂബക്കറിനാണ്. മുന്‍ മന്ത്രി മഞ്ഞളാംകുഴി അലിയുടെ അടുപ്പക്കാരനും. അലിയുടെ ഉടമസ്ഥതയിലുള്ള സ്ഥാപനത്തിലെ ജീവനക്കാരനുമായിരുന്ന അബൂബക്കറിന്റെ വളര്‍ച്ച പെട്ടെന്നായിരുന്നു. ഹമീദിന്റെ സാമ്പത്തിക വളര്‍ച്ചയും ദുരൂഹമാണ്. മുഖ്യ കണ്ണി പെരിന്തല്‍മണ്ണ വെട്ടത്തൂര്‍കവല കെ ടി റമീസ് അറസ്റ്റിലായതോടെയാണ് സ്വര്‍ണക്കടത്തിലെ ലീഗ് ബന്ധം പുറത്തുവന്നത്. റമീസ് ബന്ധുവല്ലെന്നാണ് ലീഗ് അഖിലേന്ത്യാ ജനറല്‍ സെക്രട്ടറി പി കെ കുഞ്ഞാലിക്കുട്ടി പറയുന്നത്. ലീഗിന്റെ സ്ഥാപക നേതാക്കളിലൊരാളും സ്പീക്കറുമായിരുന്ന ചാക്കീരി അഹമ്മദ്കുട്ടിയുടെ ചെറുമകനാണ് റമീസ്. ചാക്കീരിയുടെ മകന്‍ ജബ്ബാറിന്റെ മകള്‍ റസിയയാണ് റമീസിന്റെ ഉമ്മ. ഇവര്‍ കുഞ്ഞാലിക്കുട്ടിയുടെയും ബന്ധുവാണ്. കുടുംബ ബന്ധമില്ലെന്ന് കുഞ്ഞാലിക്കുട്ടിക്ക് സ്വന്തം മണ്ഡലത്തിലുള്ളവരെപ്പോലും വിശ്വസിപ്പിക്കാനാവില്ല. റമീസിനെ ചോദ്യംചെയ്തതിലൂടെയാണ് കൂടുതല്‍ പേര്‍ കുടുങ്ങിയത്. കഴിഞ്ഞ ദിവസം അറസ്റ്റിലായ ഐക്കരപ്പടി പന്നിക്കോട്ടില്‍ മുഹമ്മദ് ഷാഫിയും ലീഗിന്റെ സജീവ പ്രവര്‍ത്തകനാണ്. ഇയാളുടെ ഉപ്പ പ്രാദേശിക ലീഗ് നേതാവായിരുന്നു. മുന്‍ ജില്ലാ പഞ്ചായത്ത് പ്രസിഡന്റായ ലീഗ് നേതാവുമായും കുടുംബബന്ധമുണ്ട്. വ്യാഴാഴ്ച അറസ്റ്റിലായ മഞ്ചേരിയിലെ ടി എം മുഹമ്മദ് അന്‍വറിനും ലീഗ് ബന്ധമുണ്ട്. കഴിഞ്ഞദിവസം കസ്റ്റംസ് പിടിയിലായ കോഴിക്കോട് എരഞ്ഞിക്കല്‍ നെടിയാറമ്പത്ത് ടി എം സംജുവിന്റെ കോഴിക്കോട്ടെ സാമ്പത്തിക ഇടപാടുകള്‍ക്ക് ചുക്കാന്‍ പിടിക്കുന്നത് മുന്‍ പഞ്ചായത്ത് അംഗമായ ഒരു യൂത്ത്ലീഗ് നേതാവാണെന്നാണ് കസ്റ്റംസ് പറയുന്നത്. ഇയാളുടെയും പഞ്ചായത്ത് അംഗമായ ഭാര്യയുടെയും വിദേശയാത്രകളെക്കുറിച്ചും കസ്റ്റംസ് അന്വേഷണംതുടങ്ങി. കോഴിക്കോട്ടെ ഒരു പ്രമുഖ കണ്‍വെന്‍ഷന്‍ സെന്ററിന്റെ ഡയറക്ടര്‍ കൂടിയാണ് സംജു. ഇതില്‍ ജീവനക്കാരനോ നിക്ഷേപകനോ അല്ലെങ്കിലും ഇവിടുത്തെ എല്ലാ പ്രവര്‍ത്തനങ്ങളുടെയും മുന്‍നിരയില്‍ മുന്‍ ജനപ്രതിനിധി കൂടിയായ യൂത്ത് നേതാവുണ്ടാകാറുണ്ട്. ഗള്‍ഫ് കേന്ദ്രീകരിച്ച് പ്രവര്‍ത്തിക്കുന്ന സംജു നാട്ടില്‍ പല ബിസിനസുകളിലും പങ്കാളിയാണ്. ഇവയുടെ മേല്‍നോട്ടവും ഈ നേതാവിന്റെ ചുമതലയിലാണ്. അഞ്ചുവര്‍ഷം പഞ്ചായത്ത് അംഗമായിരുന്ന ശേഷം വാര്‍ഡ് വനിതാ സംവരണമായപ്പോഴാണ് നേതാവ് ഭാര്യയെ രംഗത്തിറക്കിയത്. ഇവരുടെ വിദേശയാത്രകള്‍ നേരത്തെ നാട്ടില്‍ ചര്‍ച്ചയായിരുന്നു. വിനോദയാത്രയെന്നാണ് സുഹൃത്തുക്കളോടും സഹപ്രവര്‍ത്തകരോടും പറഞ്ഞത്. ഈ യാത്രകള്‍ക്കു പിന്നില്‍ സാമ്പത്തിക താല്‍പ്പര്യങ്ങള്‍ ഉണ്ടോയെന്നാണ് കസ്റ്റംസ് അന്വേഷിക്കുന്നുന്നത്. തിരുവനന്തപുരത്ത് നിന്ന് കള്ളക്കടത്ത് സ്വര്‍ണം സംജു വഴി കോഴിക്കോട്ടേക്ക് എത്തിയതായി കസ്റ്റംസിന് വിവരം ലഭിച്ചിട്ടുണ്ട്. ഇദ്ദേഹത്തിന്റെ ഭാര്യാപിതാവിന് നഗരത്തില്‍ ജ്വല്ലറിയുണ്ട്. ഇത് വഴി സ്വര്‍ണം ഇടപാട് നടന്നിട്ടുണ്ടോയെന്നും അന്വേഷിക്കും. ഇക്കാര്യങ്ങളില്‍ യൂത്ത്ലീഗ് നേതാവടക്കം ആര്‍ക്കെങ്കിലും പങ്കുണ്ടോയെന്നും കസ്റ്റംസ് തിരക്കുന്നുണ്ട്.