ഒടുവില്‍ കുടുങ്ങി ഇനി ചുരുളഴിയണം

  സ്വര്‍ണം കടത്താന്‍ ശ്രമിച്ച കേസിലെ രണ്ടാംപ്രതി സ്വപ്ന സുരേഷും നാലാംപ്രതി സന്ദീപ് നായരും എന്‍ഐഎ കസ്റ്റഡിയില്‍. ഹൈദരാബാദ് യൂണിറ്റിന് കീഴിലുള്ള ബംഗളൂരു സംഘമാണ് ബംഗളൂരു കോറമംഗല ഒക്ടേവ് ഹോട്ടലില്‍നിന്ന് ശനിയാഴ്ച രാത്രി ഏഴോടെ ഇരുവരെയും കസ്റ്റഡിയിലെടുത്തത്. ഞായറാഴ്ച ബംഗളൂരു കോടതിയില്‍ ഹാജരാക്കും. തുടര്‍ന്ന് കൊച്ചിയിലെ എന്‍ഐഎ ഓഫീസില്‍ എത്തിക്കും. സന്ദീപിന്റെ കാറും കസ്റ്റഡിയില്‍ എടുത്തു. വെള്ളിയാഴ്ചയാണ് സ്വപ്നയും സന്ദീപും ബംഗളൂരുവില്‍ എത്തിയതെന്നാണ് വിവരം. ആറുദിവസത്തെ ഒളിവ് ജീവിതത്തിന്ശേഷമാണ് പിടിയിലാകുന്നത്. കുടുംബത്തോടൊപ്പം ഒളിവിലായിരുന്ന സ്വപ്നയുടെ മകളുടെ ഫോണ്‍ ശനിയാഴ്ച ഉച്ചയോടെ ഓണായതാണ് നിര്‍ണായകമായത്. ഇതിനിടെ അറസ്റ്റിലായ ഒന്നാം പ്രതി സരിത്തിനെ എന്‍ഐഎ ഉദ്യോഗസ്ഥര്‍ കൊച്ചി കസ്റ്റംസ് ഓഫീസിലെത്തി അഞ്ച് മണിക്കൂര്‍ ചോദ്യം ചെയ്തു. സ്വര്‍ണം രാജ്യദ്രോഹ പ്രവര്‍ത്തനങ്ങള്‍ക്കായി വിനിയോഗിച്ചിട്ടുണ്ടോ, വിദേശ തീവ്രവാദ സംഘടനകള്‍ക്ക് പങ്കുണ്ടോ എന്നൊക്കെയാണ് അന്വേഷിക്കുന്നത്. കേസിന്റെ അന്വേഷണ ചുമതല എന്‍ഐഎ കൊച്ചി യൂണിറ്റ് ഡിവൈഎസ്പി സി രാധാകൃഷ്ണപിള്ളയ്ക്കാണ്. കളിയിക്കാവിള എഎസ്‌ഐ വധക്കേസില്‍ കുറ്റപത്രം സമര്‍പ്പിക്കുന്നതിനായി ചെന്നൈയിലുള്ള അദ്ദേഹം ഉടന്‍ നേതൃത്വം ഏറ്റെടുക്കും. സരിത്തിന്റെ ഭാര്യ അപര്‍ണ, നാലാംപ്രതി സന്ദീപിന്റെ ഭാര്യ സൗമ്യ എന്നിവരുടെ രഹസ്യമൊഴി രേഖപ്പെടുത്തും. മൊഴിയെടുക്കാന്‍ കസ്റ്റംസ് കോടതിയുടെ അനുവാദം തേടും. സ്വര്‍ണം കടത്താന്‍ ഉപയോഗിച്ച അഞ്ച് ക്യാരി ബാഗുകള്‍ കസ്റ്റംസ് കണ്ടെടുത്തു. സ്വര്‍ണക്കടത്തുമായി ബന്ധമുള്ള അഞ്ചു പേരുടെ വിവരങ്ങള്‍ കൂടി അന്വേഷണ സംഘത്തിന് കിട്ടി. ഇതില്‍ ചിലര്‍ക്ക് തീവ്രവാദ സംഘങ്ങളുമായി ബന്ധമുള്ളതായാണ് സൂചന. കാര്‍ഗോ കോംപ്ലക്സിലെ 23 സിസിടിവി കാമറ ദൃശ്യങ്ങള്‍ കസ്റ്റംസ് ഏറ്റുവാങ്ങി. ബഗേജ് ഏറ്റുവാങ്ങാനായി അഞ്ച് തവണ സരിത് വന്നതിന്റെ ദൃശ്യങ്ങള്‍ കിട്ടിയിട്ടുണ്ട്. മുന്‍ ഐടി സെക്രട്ടറി എം ശിവശങ്കര്‍ താമസിച്ചിരുന്ന ഫ്ളാറ്റില്‍ കസ്റ്റംസ് എത്തി സന്ദര്‍ശക രജിസ്റ്ററും സിസിടിവി ദൃശ്യങ്ങളും എടുത്തു. സന്ദീപ് നായരുടെ തിരുവനന്തപുരത്തെ വീട്ടിലും റെയ്ഡ് നടത്തി.