പഞ്ചായത്ത് തിരഞ്ഞെടുപ്പ് നടത്തും പ്രചരണത്തിന് സോഷ്യല്‍ മീഡിയ

കൊവഡ് സ്ഥിതി ഇതേ രീതിയില്‍ തുടര്‍ന്നാലും കേരളം പഞ്ചാത്ത് തിരഞ്ഞെടുപ്പിലേക്ക് നീങ്ങും. അതിന്റെ നടപടികള്‍ വേഗത്തിലാക്കുകയാണ് സംസ്ഥാന തിരഞ്ഞെടുപ്പ് കമ്മീഷന്‍ കലാശക്കൊട്ട് ഉള്‍പ്പെടെ ആള്‍ക്കൂട്ടമുണ്ടാകുന്ന പ്രചാരണപരിപാടികള്‍ കര്‍ശനമായി വിലക്കും. ഓരോ സ്ഥലത്തും സാഹചര്യത്തിന് അനുസരിച്ച് സ്ഥാനാര്‍ഥികളുടെ വീട് സന്ദര്‍ശനത്തിന് നിയന്ത്രണങ്ങളുണ്ടാകും. ഇതടക്കം കര്‍ശന മാനദണ്ഡം പെരുമാറ്റച്ചട്ടത്തില്‍ ഉള്‍പ്പെടുത്തും. ആരോഗ്യമാനദണ്ഡം കൃത്യമായി പാലിച്ച് തെരഞ്ഞെടുപ്പ് നടത്താമെന്നാണ് സംസ്ഥാന തെരഞ്ഞെടുപ്പ് കമീഷന്റെ വിലയിരുത്തല്‍. ഇതിനായി വിശദപദ്ധതി തയ്യാറാക്കും. ഒന്നേകാല്‍ ലക്ഷത്തോളം ഉദ്യോഗസ്ഥര്‍ക്ക് മാസ്‌കും കൈയുറയും നല്‍കേണ്ടിവരും. ഇതടക്കം അധികചെലവ് കണക്കാക്കി സര്‍ക്കാരിന്റെ ശ്രദ്ധയില്‍പ്പെടുത്തും. സാധാരണനിലയില്‍ ഏകദേശം 150 കോടി രൂപയാണ് ചെലവ്. ആരോഗ്യവിദഗ്ധരുമായി കൂടിയാലോചിച്ചശേഷം രാഷ്ട്രീയ പാര്‍ടികളുടെ യോഗം വിളിച്ച് കമീഷന്‍ വിശദമായി ചര്‍ച്ചചെയ്യും. വിശദമായ മാര്‍ഗനിര്‍ദേശം തയ്യാറാക്കി സര്‍ക്കാരിന് സമര്‍പ്പിക്കും. കോവിഡ് ബാധിതര്‍ക്കും ക്വാറന്റൈനിലുള്ളവര്‍ക്കും 65 വയസ്സ് കഴിഞ്ഞവര്‍ക്കും ആവശ്യാനുസരണം തപാല്‍വോട്ടും പ്രോക്സിവോട്ടും അനുവദിക്കും. ഇതിനായി ഓര്‍ഡിനന്‍സ് പുറപ്പെടുവിക്കാന്‍ ഈ മാസംതന്നെ സര്‍ക്കാരിന് ശുപാര്‍ശ നല്‍കും. കോവിഡ് പ്രതിരോധത്തിനൊപ്പം തെരഞ്ഞെടുപ്പ് പൂര്‍ത്തിയാക്കലാണ് ലക്ഷ്യമെന്ന് സംസ്ഥാന തെരഞ്ഞെടുപ്പ് കമീഷണര്‍ വി ഭാസ്‌കരന്‍ പറഞ്ഞു.