ലെസ്റ്ററില്‍ കോവിഡ് രോഗം വീണ്ടും കൂടുന്നു

നിരവധി മലയാളികള്‍ ഇന്ത്യക്കാര്‍ പാര്‍ക്കുന്ന ബ്രിട്ടീഷ് നഗരമായ ലെസ്റ്ററില്‍ കോവിഡ് രോഗം വീണ്ടും വ്യാപകമായതോടെ നഗരം അടച്ചു. ഇന്നുമുതല്‍ രണ്ടാഴ്ചത്തേക്ക് സമ്പൂര്‍ണ ലോക്ക്ഡൗണാണ് ലെസ്റ്ററില്‍ പ്രഖ്യാപിച്ചിരിക്കുന്നത്. കഴിഞ്ഞയാഴ്ച ബ്രിട്ടനില്‍ റിപ്പോര്‍ട്ട് ചെയ്യപ്പെട്ട മൊത്തം കോവിഡ് കേസുകളില്‍ പത്തു ശതമാനവും ഇവിടെ നിന്നായതോടെയാണ് കടുത്ത നടപടികളിലേക്കു നീങ്ങാന്‍ സര്‍ക്കാര്‍ തീരുമാനിച്ചത്. 944 പോസിറ്റീവ് കേസുകളാണ് ഇവിടെ രണ്ടാഴ്ചയ്ക്കുള്ളില്‍ റിപ്പോര്‍ട്ട് ചെയ്യപ്പെട്ടത്. രാജ്യത്തെ പകുതിയോളം എന്‍എച്ച്എസ് ആശുപത്രികളില്‍ ഒരു കോവിഡ് രോഗിപോലും ഇല്ലാത്ത സ്ഥിതിയിലേക്ക് കാര്യങ്ങള്‍ എത്തുമ്പോഴാണ് ലെസ്റ്ററിലെ ഈ കൊറോണയുടെ രണ്ടാംവരവ്. ബ്രിട്ടനിലെ ''മിനി ഇന്ത്യ'' എന്നറിയപ്പെടുന്ന പ്രദേശമാണ് ഈസ്റ്റ് മിഡ്ലാന്‍സിലെ ലെസ്റ്റര്‍ സിറ്റി. ഇവിടുത്തെ ജനസംഖ്യയില്‍ 45 ശതമാനത്തിലേറെയും ഏഷ്യന്‍- ആഫ്രിക്കന്‍ വംശജരാണ്. ലെസ്റ്ററിലെ ആശുപത്രികളെല്ലാം വീണ്ടും കോവിഡ് രോഗികളെക്കൊണ്ട് നിറയുകയാണ്. ഒരുലക്ഷം പേരില്‍ 135 പേര്‍ക്ക് എന്ന നിലയിലാണ് രോഗവ്യാപന നിരക്ക്. മറ്റു പ്രദേശങ്ങളേക്കാള്‍ മൂന്നിരിട്ടി കൂടുതലാണിത്.