സുരക്ഷിത കേരളത്തിന് പുതിയ പദ്ധതി

• റിപ്പോര്‍ട്ടിങ്ങ് ശക്തമാക്കുന്നു

കേരളത്തില്‍ ആരോഗ്യ വകുപ്പിന്റെ പ്രതിരോധപ്രവര്‍ത്തനങ്ങള്‍ നീങ്ങുന്നതിനൊപ്പം മുഖ്യമന്ത്രിയുടെ നേതൃത്വത്തില്‍ ഗ്രാമീണ മേഖലയുടെ നിരീക്ഷണത്തിനായി പുതിയ സംവിധാനം ഒരുങ്ങുന്നു. മെഡിക്കല്‍ ഡിപ്പാര്‍ട്ടിമെന്റിന്റെ സഹായത്തോടെ തന്നെയാണ് ഈ റിപ്പോര്‍ട്ടിങ്ങ് രീതിയും നടപ്പില്‍ വരുന്നത്. കോവിഡ് പ്രതിരോധ പ്രവര്‍ത്തനങ്ങളില്‍ താഴെത്തട്ടിലുള്ള ഉദ്യോഗസ്ഥരുടെ നിര്‍ദേശങ്ങള്‍ മുഖവിലയ്‌ക്കെടുത്ത് വിവരശേഖരണം നടത്തി അത് ഐഎഎസ് ഓഫിസര്‍മാര്‍ വഴി തീരുമാനങ്ങളാക്കാനാണ് മുഖ്യമന്ത്രി പിണറായി വിജയന്‍ തീരുമാനിച്ചിരിക്കുന്നത്. വകുപ്പ് സെക്രട്ടറിമാര്‍ തമ്മിലുള്ള ഏകോപനം കാര്യക്ഷമാക്കാനും നിര്‍ദേശം നല്‍കി കഴിഞ്ഞു ഉന്നതതല യോഗത്തിലാണു മുഖ്യമന്ത്രി തീരുമാനങ്ങള്‍ എടുത്തത്. തീരുമാനങ്ങള്‍ എടുക്കുമ്പോള്‍ പരസ്പരം ആലോചിക്കണം. സമിതി എടുക്കുന്ന തീരുമാനങ്ങള്‍ നടപ്പാക്കുന്നതില്‍ വീഴ്ചയുണ്ടാകരുത്. താഴെത്തട്ടിലുള്ള പ്രശ്‌നങ്ങള്‍ മനസ്സിലാക്കി തീരുമാനമെടുക്കണം. ഡോക്ടര്‍മാരും ജീവനക്കാരും തുടര്‍ച്ചയായി ജോലി ചെയ്തു ക്ഷീണിച്ചതു രോഗപ്രതിരോധത്തെ ബാധിക്കാത്ത രീതിയില്‍ അവര്‍ക്ക് സാവകാശം നല്‍കണം, തുടര്‍പ്രവര്‍ത്തനങ്ങളില്‍ മാന്ദ്യം ഉണ്ടാകാതിരിക്കാന്‍ ഉന്നത ഉദ്യോഗസ്ഥര്‍ ജാഗ്രത പുലര്‍ത്തണമെന്നും അവര്‍ക്ക് നിര്‍ദേശം നല്‍കിയിട്ടുണ്ട്. ആരോഗ്യ വകുപ്പ് ഡയറക്ടറേറ്റിനും ഗ്രാമീണ റിപ്പോര്‍ട്ടിങ്ങ് രീതികകുമിടയില്‍ കോവിഡ് വിദഗ്ധ സമിതിയാണ് പ്രവര്‍ത്തിക്കുക. സമൂഹവ്യാപനം ഇനി സംഭവിച്ചിരിക്കാമെന്ന കാഴ്ചപ്പാടാണു വിദഗ്ധ സമിതിക്കുള്ളത്. അതിനുവേണ്ടിയാണ് കണക്കെടുപ്പ്. പ്രതിരോധപ്രവര്‍ത്തനങ്ങള്‍ ആ രീതിയില്‍ മാറ്റാനാണ് നീക്കം. ഒാരോ വാര്‍ഡുകളിലെയും വിവരങ്ങള്‍ ശേഖരിച്ച് അവിടെ വേണ്ട മെഡിക്കല്‍ മോണിട്ടറിങ്ങ് ഉറപ്പാക്കുകയാണ പുതിയ രീതിയിലൂടെ സര്‍ക്കാര്‍ ലക്ഷ്യമിടുന്നത്.