കാവേരി ജലം കേരളത്തിലേക്ക് എത്തുന്നു

ആറ് പതിറ്റാണ്ടിലേറെയായി ഫയല്‍ക്കെട്ടില്‍ കുരുങ്ങിക്കിടക്കുന്ന പദ്ധതി, തമിഴ്‌നാടുമായി സമവായമുണ്ടാക്കി നടപ്പാക്കുന്നു. സുപ്രീംകോടതി ഉത്തരവിലൂടെ കേരളത്തിന് ലഭ്യമായ 2.87ടി.എം.സി കാവേരിജലം ഉപയോഗപ്പെടുത്തുകയാണ് ഇതിലൂടെ 4255 ഹെക്ടര്‍ തരിശുഭൂമിയില്‍ ജലസേചനത്തിനും ആദിവാസികള്‍ക്ക് കുടിവെള്ളമെത്തിക്കാനും വ്യവസായങ്ങള്‍ക്കും സൗകര്യപ്രദമാവുന്നഅട്ടപ്പാടി വാലി ഇറിഗേഷന്‍ പദ്ധതിയാണ് സര്‍ക്കാര്‍ നടപ്പിലാക്കുന്നത് . ശിരുവാണി നദിക്ക് കുറുകെ 450മീറ്റര്‍ നീളവും 52മീറ്റര്‍ ഉയരവുമുള്ള ഡാം പണിയും. 74.27ഹെക്ടര്‍ വനഭൂമി ഏറ്റെടുക്കുന്നതിന് പകരം ഭൂമി നല്‍കും. 294ഹെക്ടര്‍ സ്വകാര്യഭൂമി ഏറ്റെടുത്തിട്ടുണ്ട്. ഇതോടെ, കാവേരിയില്‍ നിന്ന് കേരളത്തിന് ഭവാനിപ്പുഴയില്‍ ലഭിക്കേണ്ട ജലം പൂര്‍ണമായി വിനിയോഗിക്കാനാവും. പറമ്പിക്കുളം-ആളിയാര്‍ കരാറുണ്ടെങ്കിലും തമിഴ്‌നാട് വെള്ളം വിട്ടുനല്‍കാത്തതിനാല്‍ ചിറ്റൂര്‍ പുഴയിലേക്ക് വെള്ളമെത്താതെ കൃഷിനാശവും കുടിവെള്ളക്ഷാമവും പതിവാണ്. പറമ്പിക്കുളം, തൂണക്കടവ്, പരിവാരിപ്പള്ളം ഡാമുകളില്‍ 16.5ടി.എം.സി ജലമെത്തിയാലേ ,കേരളത്തിന് 2.5 ടി.എം.സി ജലം തമിഴ്‌നാട് നല്‍കൂ. ഇത് കിട്ടാറേയില്ല. ആനമലയാറില്‍ നിന്ന് കേരളം നല്‍കാമെന്നേറ്റ 2.5ടി.എം.സി വെള്ളം വിട്ടുനല്‍കണമെന്ന തമിഴ്‌നാടിന്റെ ആവശ്യം അംഗീകരിച്ചാണ് അട്ടപ്പാടി പദ്ധതിയില്‍ സമവായം. 2018ല്‍ കേരളം തയ്യാറാക്കിയ വിശദപദ്ധതി രേഖയില്‍ (ഡി.പി.ആര്‍) തമിഴ്‌നാട് തടസവാദം ഉന്നയിച്ചിരുന്നു. തുടര്‍ന്ന്, കാവേരി കേസില്‍ സുപ്രീംകോടതി ഉത്തരവും കേന്ദ്ര മാര്‍ഗ്ഗനിര്‍ദ്ദേശങ്ങളും പാലിച്ച് പുതിയ ഡി.പി.ആര്‍ കേന്ദ്ര ജലക്കമ്മിഷന് സമര്‍പ്പിച്ചതിനാല്‍, തമിഴ്‌നാടിന്റെ തടസവാദങ്ങള്‍ നിലനില്‍ക്കില്ല. പദ്ധതിക്ക് അന്തിമാനുമതി പരിഗണനയിലാണെന്ന് കേന്ദ്ര പരിസ്ഥിതി മന്ത്രാലയം അറിയിച്ചിട്ടുണ്ട്.പരിസ്ഥിതി ആഘാത പഠനം ആഗസ്റ്റില്‍ പൂര്‍ത്തിയാക്കും.