ടീമുകളെത്തി; നാളെ ആവേശപ്പോരാട്ടം

കൊച്ചി: ഇന്ത്യ-വെസ്റ്റിന്‍ഡീസ് ഏകദിന പരമ്പരയിലെ ആദ്യ പോരാട്ടത്തിന് ഒരുദിനം മാത്രം ശേഷിക്കെ, കൊച്ചി ക്രിക്കറ്റ് ആവേശത്തിലാഴ്ന്നുകഴിഞ്ഞു. മത്സരത്തിനായി ടീമുകള്‍ ചൊവ്വാഴ്ച ഉച്ചയോടെ കൊച്ചിയിലെത്തി. മുംബൈയില്‍ നിന്ന് സ്‌പൈസ് ജെറ്റിന്റെ പ്രത്യേക വിമാനത്തില്‍ ഉച്ചയ്ക്ക് 1.10-ന് നെടുമ്പാശ്ശേരി വിമാനത്താവളത്തിലെത്തിയ ടീമുകള്‍ക്ക് ഊഷ്മള വരവേല്പാണ് കേരള ക്രിക്കറ്റ് അസോസിയേഷന്റെ നേതൃത്വത്തിലൊരുക്കിയത്. കഥകളിയും പഞ്ചവാദ്യവുമുള്‍പ്പെടെ തനത് കേരളീയ ശൈലിയിലായിരുന്നു സ്വീകരണം. ബെന്നി ബെഹനാന്‍ എം.എല്‍.എ, സ്വാഗതസംഘം കണ്‍വീനര്‍ അജിത്ത് പട്ടത്ത് തുടങ്ങിയവര്‍ വിമാനത്താവളത്തില്‍ താരങ്ങളെ സ്വീകരിച്ചു. മുംബൈയില്‍ ടെസ്റ്റ് ടീമില്‍ കളിച്ച ഇന്ത്യന്‍ താരങ്ങളാണ് ഉച്ചയോടെ എത്തിയ ആദ്യസംഘത്തിലുണ്ടായിരുന്നത്. യുവ്‌രാജ് സിങ്, സുരേഷ് റെയ്‌ന, അമ്പാട്ടി റായിഡു, മോഹിത് ശര്‍മ തുടങ്ങിയവര്‍ രാത്രിയോടെയും കൊച്ചിയിലെത്തി ടീമിനൊപ്പം ചേര്‍ന്നു. കോച്ച് ഡങ്കന്‍ ഫ്ലച്ചര്‍ ഉള്‍പ്പെടെ പത്തംഗ ഒഫീഷ്യല്‍ സംഘവും ഇന്ത്യന്‍ ടീമിനൊപ്പമുണ്ട്. ബുധനാഴ്ച ഇരുടീമുകളും കലൂര്‍ ജവാഹര്‍ലാല്‍ നെഹ്രു സ്റ്റേഡിയത്തില്‍ പരിശീലനത്തിനിറങ്ങും. ഇന്ത്യന്‍ ടീം രാവിലെ 10 മുതല്‍ ഒരുമണിവരെയും വെസ്റ്റിന്‍ഡീസ് ടീം ഉച്ചയ്ക്ക് രണ്ടു മുതല്‍ അഞ്ചു മണി വരെയുമാണ് പരിശീലനം തീരുമാനിച്ചിരിക്കുന്നത്. വ്യാഴാഴ്ച ഉച്ചയ്ക്ക് 1.30 മുതലാണ് മത്സരം. വിരമിച്ച ക്രിക്കറ്റ് ഇതിഹാസം സച്ചിന്‍ തെണ്ടുല്‍ക്കര്‍ക്കുള്ള ആദരസൂചകമായി കൊച്ചി ജവാഹര്‍ലാല്‍ നെഹ്രു സ്റ്റേഡിയത്തില്‍ തയ്യാറാക്കിയിരിക്കുന്ന സച്ചിന്‍ പവലിയന്റെ ഉദ്ഘാടനം ബുധനാഴ്ച നടക്കും. രാവിലെ 10-ന് നടക്കുന്ന ചടങ്ങില്‍ ഇന്ത്യന്‍ ക്യാപ്റ്റന്‍ മഹേന്ദ്രസിങ് ധോനിയാണ് സച്ചിന്‍ പവലിയന്റെ പ്രഖ്യാപനം നിര്‍വഹിക്കുക. ഇന്ത്യ, വെസ്റ്റിന്‍ഡീസ് ടീമംഗങ്ങളും ചടങ്ങിന് സാക്ഷ്യം വഹിക്കും. പവലിയനില്‍ സജ്ജമാക്കിയിരിക്കുന്ന ആറടി നീളമുള്ള രണ്ട് ബാറ്റുകളിലായി ഇരു ടീമംഗങ്ങളും കൈയൊപ്പ് ചാര്‍ത്തും. സിനിമാതാരങ്ങളായ മോഹന്‍ലാല്‍, ജയറാം, സുരേഷ് ഗോപി എന്നിവരും ചടങ്ങില്‍ പങ്കെടുക്കുന്നുണ്ട്. സ്റ്റാര്‍ ടൂര്‍ണമെന്റിന്റെ ട്രോഫി അനാച്ഛാദനം ചൊവ്വാഴ്ച രാത്രി താജ് ഗേറ്റ് വേ ഹോട്ടലില്‍ നടന്ന ചടങ്ങില്‍ ഇന്ത്യന്‍ നായകന്‍ ധോനിയും വിന്‍ഡീസ് ക്യാപ്റ്റന്‍ ഡ്വെയിന്‍ ബ്രാവോയും ചേര്‍ന്ന് നിര്‍വഹിച്ചു. അതേസമയം മഴ കളിയെ ചതിക്കുമോയെന്ന ആശങ്ക തുടരുകയാണ്. കഴിഞ്ഞ ദിവസങ്ങളില്‍ മൂടിക്കെട്ടിയ നിലയിലായിരുന്നു കൊച്ചിയുടെ ആകാശം. രാത്രിയും മഴ തുടരുന്നുണ്ട്. എന്നാല്‍ തലേന്ന് രാത്രി പോലും മഴ പെയ്താലും പിറ്റേന്ന് ഉച്ചയോടെ കളി നടത്താനാകുമെന്നാണ് കെ.സി.എ.യുടെ പ്രതീക്ഷ. മഴകാരണം ഒരു പന്തുപോലും എറിയാനാകാതെ മത്സരം ഉപേക്ഷിക്കേണ്ടിവന്നാല്‍ പതിനഞ്ച് ദിവസത്തിനുള്ളില്‍ ഫെഡറല്‍ ബാങ്ക് ശാഖകള്‍ വഴി പണം മടക്കി നല്കുമെന്ന് കെ.സി.എ. പ്രസിഡന്റ് ടി.സി. മാത്യു വ്യക്തമാക്കുകയും ചെയ്തു. മത്സരത്തിനുള്ള ടിക്കറ്റുകളുടെ വില്പന ബുധനാഴ്ച അവസാനിക്കും. മത്സരദിനം ടിക്കറ്റ് വില്പന ഉണ്ടായിരിക്കില്ലെന്ന് സംഘാടകര്‍ അറിയിച്ചിട്ടുണ്ട്.