തരംഗം ഉമ്മന്‍ചാണ്ടിയുടെ മനക്കോട്ട

  രാഹുല്‍ ഗാന്ധിയെ കാണിച്ച് കേരളത്തില്‍ തരംഗം സൃഷ്ടിക്കാമെന്ന് കോണ്‍ഗ്രസ് മനക്കോട്ട കെട്ടുകയാണെന്ന് സിപിഐ എം പൊളിറ്റ്ബ്യൂറോ അംഗം എം എ ബേബി പറഞ്ഞു. ഉമ്മന്‍ചാണ്ടി കോണ്‍ഗ്രസ് നേതാക്കളെ വെട്ടിലാക്കുകയായിരുന്നു. രാഹുല്‍ 2014ല്‍ ഉത്തര്‍പ്രദേശില്‍ സൃഷ്ടിച്ച തരംഗത്തില്‍ കോണ്‍ഗ്രസിന് കിട്ടിയത് രണ്ട് സീറ്റാണെന്ന് കേരളത്തിലെ കോണ്‍ഗ്രസ് മറക്കരുത്. യുപിഎ സര്‍ക്കാരിന്റെ അഴിമതിക്കെതിരെ പൊള്ളവാഗ്ദാനം നല്‍കി അധികാരത്തിലെത്തിയ ബിജെപി ഒന്നും നടപ്പാക്കിയില്ല. രാജ്യത്തെ വര്‍ഗീയതയിലൂടെ ഭീതിയിലാഴ്ത്തിയ അഞ്ച് വര്‍ഷമാണ് കടന്നുപോയത്. സാംസ്‌കാരിക പ്രവര്‍ത്തകര്‍ക്കും സാഹിത്യകാരന്‍മാര്‍ക്കും വധശിക്ഷ വിധിച്ച സംഘപരിവാര്‍ ഭീകരതയുടെ അഴിഞ്ഞാട്ടമാണ് രാജ്യത്ത് നടമാടിയത്. അഭയാര്‍ഥികള്‍ക്ക് ജാതി നോക്കി പൗരത്വം നല്‍കുന്ന ഭയാനകമായ സാഹചര്യമാണ് മോഡി രാജ്യത്ത് സൃഷ്ടിച്ചത്. ബിജെപി തീവ്ര വര്‍ഗീയത നടപ്പാക്കുമ്പോള്‍ കോണ്‍ഗ്രസ് മൃദു വര്‍ഗീയനിലപാടാണ് സ്വീകരിക്കുന്നത്. ലോകസഭയില്‍ ഇടതുപക്ഷം നിര്‍ണായക സ്വാധീനമാകുന്ന തെരഞ്ഞെടുപ്പാണിതെന്നും എം എ ബേബി പറഞ്ഞു.