വയനാടിന് ഇനി കനത്ത സുരക്ഷ

  കല്‍പറ്റ : രാഹുല്‍ ഗാന്ധി തിരഞ്ഞെടുപ്പ് പ്രചരണത്തിന് ഇറങ്ങുന്നതോടെ വയനാടിന് കനത്ത സുരക്ഷ നല്‍കാന്‍ തീരുമാനം. ഇതിനായി സംസ്ഥാന പൊലീസിന് പുറമെ സപെഷ്യ ടീമുകളും അവിടെ എത്തും. മാവോയിസ്റ്റ് ഭീഷണിയുള്ള 6 പൊലീസ് സ്റ്റേഷനുകളില്‍ മുന്‍പേ തന്നെ സുരക്ഷ ശക്തമാക്കിയിരുന്നു. ഇവിടെ 24 മണിക്കൂറും സായുധ പൊലീസ് കാവലുണ്ട്. ജില്ലയിലേക്കു കൂടുതല്‍ സേനയെ എത്തിക്കുന്ന കാര്യവും പരിഗണനയിലാണ്. രാഹുല്‍ സ്ഥാനാര്‍ഥിയായെത്തുമ്പോള്‍ മാവോയിസ്റ്റുകളുടെ തിരിച്ചടിയുണ്ടായാല്‍ നേരിടാനുള്ള ഒരുക്കങ്ങളും പൊലീസ് നടത്തുന്നുണ്ട്. ആഴ്ചകള്‍ക്കു മുന്‍പ് കേരളത്തിലെത്തിയ രാഹുല്‍ വീരമൃത്യു വരിച്ച സിആര്‍പിഎഫ് ജവാന്‍ വി.വി. വസന്തകുമാറിന്റെ വയനാട്ടലെ വീട് സന്ദര്‍ശിക്കാനിരുന്നുവെങ്കിലും സുരക്ഷാ കാരണങ്ങളാല്‍ മാറ്റിവച്ചതാണ്. വയനാട് മണ്ഡലത്തിലും കര്‍ണാടക, തമിഴ്‌നാട് അതിര്‍ത്തിയിലും ലോക്‌സഭാ തിരഞ്ഞെടുപ്പ് കാലത്ത് സുരക്ഷ ശക്തമാക്കാന്‍ ഉന്നതതല യോഗത്തില്‍ തീരുമാനമെടുത്തിരുന്നു. 14 ന് വൈത്തിരിയിലെ റിസോര്‍ട്ടില്‍ ചേര്‍ന്ന യോഗത്തില്‍ കേരളത്തിനു പുറമേ കര്‍ണാടക, തമിഴ്‌നാട് സംസ്ഥാനങ്ങളിലെ ഉയര്‍ന്ന ഉദ്യോഗസ്ഥരാണു പങ്കെടുത്തത്. ബൂത്തുകളിലേക്കു പോകുന്ന സുരക്ഷാ ഉദ്യോഗസ്ഥരുടെ വാഹനം ആക്രമിക്കപ്പെടാനിടയുണ്ടെന്നതു കണക്കിലെടുത്താണു പൊലീസ് ഒരുക്കങ്ങള്‍. സംശയമുള്ള സാഹചര്യങ്ങളില്‍ പരസ്പരം വിവരം കൈമാറാന്‍ 3 സംസ്ഥാനങ്ങളിലും നോഡല്‍ ഓഫിസര്‍മാരെ ചുമതലപ്പെടുത്തി. ജനങ്ങള്‍ക്കിടയില്‍ പ്രചാരണം നടത്താന്‍ സംസ്ഥാനാന്തര നദീജല തര്‍ക്കങ്ങള്‍ മാവോയിസ്റ്റുകള്‍ ഉപയോഗിക്കുമെന്നതു കണക്കിലെടുത്ത് അതിര്‍ത്തി മേഖലകളിലെ എന്‍ജിഒകളുടെ നീക്കങ്ങള്‍ നിരീക്ഷിക്കാനും തീരുമാനമുണ്ട്. അതിര്‍ത്തി കടന്നുള്ള പണത്തിന്റെ ഒഴുക്കിനു തടയിടാന്‍ തോല്‍പ്പെട്ടിക്കു സമീപം പുതിയ ചെക്‌പോസ്റ്റ് തുടങ്ങിയിട്ടുണ്ട്. ക്രിമിനല്‍ പട്ടികയിലുള്ളവരുടെ പേരുവിവരങ്ങള്‍ സംസ്ഥാനങ്ങള്‍ തമ്മില്‍ കൈമാറും.