സുധാകരന്റെ കാര്യം മാര്‍ച്ചില്‍ അറിയാം

  കോണ്‍ഗ്രസ് വര്‍ക്കിങ്ങ് പ്രസിഡന്റായി എങ്കിലും അത്ര സംതൃപ്തനല്ല കണ്ണൂരിന്റെ സ്വന്തം നേതാവ് കെ സുധാകരന്‍. ലോകസഭാ തിരഞ്ഞെടുപ്പില്‍ ഇതുവരെ അവകാശ വാദം ഉന്നയിച്ചിട്ടില്ലെങ്കിലും കണ്ണൂര്‍ കയ്യില്‍ നിന്ന് പോയാല്‍ കളിമാറുമെന്നാണ് അദ്ദേഹത്തിന്റെ അനുയായികള്‍ പറയുന്നത്. കോണ്‍ഗ്രസ് സ്ഥാനാര്‍ഥികളുടെ ആദ്യ പട്ടിക ഈ മാസം 25ന് പുറത്തിറക്കും. ഹൈക്കമാന്‍ഡിന്റെ ആദ്യപട്ടികയില്‍ തന്നെ ചിലപ്പോള്‍ കേരളത്തിലെ കോണ്‍ഗ്രസ് സ്ഥാനാര്‍ഥികളുടെ പേരുകളും ഇടം പിടിച്ചേക്കും. ഇതില്‍ പേരുവന്നില്ലങ്കില്‍ കളിതുടങ്ങുമെന്നാണ് സൂചന. കാര്യമായ പരാതികളും വിവാദങ്ങളുമൊന്നുമുണ്ടാകാത്ത രീതിയില്‍ കേരളത്തിലെ സ്ഥാനാര്‍ഥികളുടെ പട്ടിക തയ്യാറാക്കി കൈമാറാന്‍ നേരത്തെ ദേശീയ നേതൃത്വം നിര്‍ദേശിച്ചിരുന്നതിന്റെ അടിസ്ഥാനത്തില്‍ സ്ഥാനാര്‍ഥികള്‍ക്കായുള്ള അനൗദ്യോഗിക ചര്‍ച്ചകള്‍ പല തലത്തിലായി നടന്നു കഴിഞ്ഞിരുന്നു. ഇതിന്റെ അടിസ്ഥാനത്തില്‍ തയ്യാറാക്കിയ വിവരങ്ങള്‍ മുല്ലപ്പള്ളി ദേശീയനേതൃത്വത്തെ അറിയിക്കുകയും ചെയ്തിട്ടുണ്ട്. കെപിസിസി പ്രസിഡന്റ് മുല്ലപ്പള്ളി രാമചന്ദ്രന്‍ നയിക്കുന്ന ജനമഹായാത്ര 28ന് സമാപിക്കുമ്പോഴേക്കും തിരഞ്ഞെടുപ്പിന് ഒരുങ്ങാന്‍ കോണ്‍ഗ്രസ് സര്‍വസജ്ജമാകണമെന്നാണ് നിര്‍ദേശം. അതേസമയം കോണ്‍ഗ്രസ് മത്സരിക്കുന്ന സീറ്റുകളില്‍ സീറ്റിംഗ് എം പിമാരുടെ സീറ്റുകള്‍ ഏതാണ്ട് ഉറപ്പിച്ചിട്ടുണ്ട്. പുതുമുഖങ്ങള്‍ വന്നാല്‍ വിജയസാധ്യത കുറയുമെന്നും ഇപ്പോഴത്തെ സാഹചര്യത്തില്‍ ജയമാണ് പ്രധാനമെന്നും തോല്‍ക്കുന്നത് ലോക്സഭയില്‍ കോണ്‍ഗ്രസിന് ഗുണം ചെയ്യില്ലെന്നും നേതൃത്വം വ്യക്തമാക്കുന്നുണ്ട്. എന്നാല്‍ കഴിഞ്ഞ തവണ പരാജയപ്പെട്ട മണ്ഡലങ്ങളില്‍ പലതിലും പുതുമുഖങ്ങളെ നിര്‍ത്താനും ഏകദേശ ധാരണയായിട്ടുണ്ട്. ഇടുക്കി,തൃശ്ശൂര്‍,ചാലക്കുടി, കണ്ണൂര്‍ സീറ്റുകള്‍ ഇക്കുറി എന്തായാലും പിടിച്ചെടുക്കാന്‍ മുതിര്‍ന്ന കോണ്‍ഗ്രസ് നേതാക്കളെ മത്സരിപ്പിക്കാനും തീരുമാനമായിട്ടുണ്ട്. കണ്ണൂരില്‍ കെ സുധാകരനെകൂടാതെ എ പി അബ്ദ്ുള്ളകുട്ടിയെയും ഇടുക്കിയില്‍ ഉമ്മന്‍ചാണ്ടിയെയും തൃശ്ശൂരില്‍ വി എം സുധീരനെയും ചാലക്കുടിയില്‍ കെ പി ധനപാലനെയും മത്സരിപ്പിക്കണമെന്നാണ് കോണ്‍ഗ്രസ്സ് നേതാക്കളുടെ മനസിലിരിപ്പ്. ഇതില്‍ താന്‍ മല്‍സരിക്കാന്‍ ഇല്ലെന്ന് ഉമ്മന്‍ചാണ്ടി പറഞ്ഞു കഴിഞ്ഞു. തിരുവനന്തപുരം ശശി തരൂര്‍, ആലപ്പുഴ കെ സി വേണുഗോപാല്‍, പത്തനംതിട്ട ആന്റോ ആന്റണി, മാവേലിക്കര കൊടിക്കുന്നില്‍ സുരേഷ്, എറണാകുളം കെ വി തോമസ്, എന്നിവര്‍ തന്നെ സ്ഥാനാര്‍ത്ഥികളായേക്കും. ആലപ്പുഴയില്‍ കെ സി വേണുഗോപാല്‍ മത്സരിക്കുന്നില്ലെങ്കില്‍ മറ്റൊരു മുതിര്‍ന്ന നേതാവിന് ഇവിടെ നറുക്കുവീഴും. ജയസാധ്യ ഉറപ്പുള്ള വയനാട്ടിലും വടകരയിലും പുതിയ സ്ഥാനാര്‍ഥികളുണ്ടാകും. സുധാകരനെ ഒപ്പം കിട്ടാന്‍ അമിത്ഷാ ഇപ്പോഴും ശ്രമം തുടരുന്നുണ്ട്. കേരളത്തില്‍ നിലവിലുള്ള ബി ജെ പി നേതാക്കളില്‍ കെ സുരേന്ദ്ര, കുമ്മനം രാജശേഖരന്‍ എന്നിവര്‍ക്ക് മാത്രമാണ് നേരിയ വിജയ പ്രതീക്ഷ ആര്‍ എസ് എസ് നല്‍കുന്നത്. ഇതില്‍ കുമ്മനം മല്‍സരിക്കാന്‍ എത്താനുള്ള സാധ്യത കുറവാണ്. അതിനാല്‍ സാംസ്‌കാരിക മുഖം, മറുകണ്ടം ചാടാന്‍ സാധ്യതയുള്ള പ്രധാന നേതാക്കള്‍ എന്നിവരെയാണ് ബി ജെ പി ലക്ഷ്യം വയ്ക്കുന്നത്. അതില്‍ ഒന്നാമനാണ് ഇപ്പോഴും സുധാകരന്‍.