നാളികേര വില കുതിക്കുന്നു

നാളികേര വില കുതിക്കുന്നു. ഒരുകിലോ നാളികേരത്തിന്‌ പതിനഞ്ച്‌ രൂപായോളം വര്‍ധിച്ച്‌ 47 മുതല്‍ 50 രൂപായില്‍വരെ എത്തിയതാണ്‌ ഇടനിലക്കാര്‍ക്ക്‌ നേട്ടമായത്‌. കഴിഞ്ഞ ഒരുമാസത്തിനിടയിലാണ്‌ നാളികേരത്തിന്റെ വില കുതിച്ചുകയറിയത്‌. മൊത്തവില്‍പനക്കാര്‍ നാളികേരത്തിന്‌ വിലയിടുമ്പോള്‍ ചെറുകിട കേരകര്‍ഷകര്‍ക്ക്‌ പാതി വില മാത്രമാണ്‌ ലഭിക്കുന്നത്‌. കുട്ടനാട്ടില്‍ 20-നും 30-നും ഇടയിലാണ്‌ ചെറുകിട കര്‍ഷകരില്‍ നിന്ന്‌ മൊത്തവ്യാപാരികള്‍ നാളികേരം സംഭരിക്കുന്നത്‌.

കഴിഞ്ഞ സീസണില്‍ 30 രൂപയില്‍ വില എത്തിയെങ്കിലും കര്‍ഷകര്‍ക്ക്‌ വേണ്ടത്ര പ്രയോജനം ലഭിച്ചിരുന്നില്ല. ഇക്കുറിയും ഇടത്തട്ടുകാരാണ്‌ ലാഭം കൊയ്യുന്നതെന്ന്‌ കര്‍ഷകര്‍ പറയുന്നു. ഉത്‌പാദനത്തിലെ കുറവാണ്‌ തേങ്ങായുടെ വില വര്‍ധനയ്‌ക്ക്‌ കാരണമായത്‌. കീടബാധയും കടുത്ത വരള്‍ച്ചയും ഉത്‌പാദനത്തെ ബാധിച്ചു. തേങ്ങായുടെ വില വര്‍ധിച്ചതോടെ വെളിച്ചെണ്ണ വിലയും കുതിക്കുകയാണ്‌. വരവ്‌ വെളിച്ചെണ്ണയ്‌ക്ക്‌ പോലും 190 മുതല്‍ 210 രൂപവരെ എത്തി.