ബോളിവുഡ് നടന്‍ ശശി കപൂര്‍ അന്തരിച്ചു

ബോളിവുഡ് നടന്‍ ശശി കപൂര്‍ (79) അന്തരിച്ചു. പ്രായാധിക്യത്തെ തുടര്‍ന്ന് മുംബൈയിലെ കോകിലബെന്‍ ആശുപത്രിയില്‍ ചികിത്സയിലായിരുന്ന അദ്ദേഹം തിങ്കളാഴ്ച വൈകുന്നേരമാണ് അന്തരിച്ചത്. നൂറിലധികം ചിത്രങ്ങളില്‍ അഭിനയിച്ചിട്ടുണ്ട്. നിര്‍മ്മാതാവ്, സംവിധായകന്‍ എന്നീ നിലകളിലും അദ്ദേഹം പ്രശസ്തനായിരുന്നു.

1940കളില്‍ ബാലതാരമായാണ് അദ്ദേഹം അഭിനയ രംഗത്ത് എത്തുന്നത്. 1961ല്‍ യഷ്‌ചോപ്ര സംവിധാനം ചെയ്ത ധര്‍മ്മപുത്ര എന്ന ചിത്രത്തിലൂടെയാണ് നായകനിരയിലേക്ക് എത്തുന്നത്. 1986ല്‍ ന്യൂഡല്‍ഹി ടൈംസ് എന്ന ചിത്രത്തിലൂടെ മികച്ച നടനുള്ള ദേശീയ പുരസ്‌കാരം ലഭിച്ചു. 1994ല്‍ മുഹാഫിസ് എന്ന ചിത്രത്തിലൂടെ ദേശീയ പുരസ്‌കാരത്തില്‍ പ്രത്യേക പരാമര്‍ശവും 1979ല്‍ ജുനൂണ്‍ എന്ന ചിത്രത്തിന്റെ നിര്‍മ്മാതാവ് എന്ന നിലയിലും ദേശീയ പുരസ്‌കാരം ലഭിച്ചിട്ടുണ്.

ആദ്യകാല ബോളിവുഡ് നടന്‍ പൃഥ്വിരാജ് കപൂറിന്റെ മകനായി 1938 മാര്‍ച്ച് 18നാണ് ശശികപൂര്‍ ജനിച്ചത്. അഭിനേതാക്കളായ രാജ്കപൂര്‍, ഷമ്മി കപൂര്‍ എന്നിവര്‍ സഹോദരന്‍മാരാണ്. സിനിമാ മേഖലയ്ക്ക് നല്‍കിയ സംഭാവനകള്‍ പരിഗണിച്ച് ശശികപൂറിന് 2011ല്‍ പദ്മഭൂഷന്‍ പുരസ്‌കാരം നല്‍കി ആദരിച്ചിട്ടുണ്ട്. 2015ല്‍ സിനിമാ മേഖലയിലെ പരമോന്നത പുരസ്‌കാരമായ ദാദാ സാഹെബ് ഫാല്‍കെ പുരസ്‌കാരവും അദ്ദേഹത്തെ തേടിയെത്തി.