ഓഖി : 11 മത്സ്യത്തൊഴിലാളികളെ കൂടി ഇന്ന് രക്ഷപ്പെടുത്തി ; ഇപ്പോള്‍ വിവാദങ്ങള്‍ക്കുള്ള സാഹചര്യമല്ലെന്ന് കേന്ദ്രമന്ത്രി

കടല്‍ക്ഷോഭത്തില്‍പെട്ട 11 മത്സ്യത്തൊഴിലാളികളെ കൂടി ഇന്ന് രക്ഷപ്പെടുത്തി. തിരുവനന്തപുരം പൊഴിയൂര്‍ സ്വദേശികളെയാണ് കണ്ടെത്തിയതെന്ന് നാവികസേന കൊച്ചിയില്‍ അറിയിച്ചു. ഇവരെ ഉച്ചയോടെ കൊച്ചിയില്‍ എത്തിക്കും. പൊഴിയൂരില്‍ നിന്ന് 16 പേരെയാണ് കാണാതായിരിക്കുന്നത്.

അതേസമയം, കേന്ദ്രപ്രതിരോധമന്ത്രി നിര്‍മ്മല സീതാരാമന്‍ മത്സ്യത്തൊഴിലാളികളെ നേരിട്ട് കണ്ട് ആശങ്കകള്‍ പരിഹരിക്കുകയാണ്. തീരമേഖലകളില്‍ സന്ദര്‍ശനം നടത്തിയ ശേഷം അവര്‍ നാവിക, വ്യോമ, കോസ്റ്റല്‍ ഗാര്‍ഡ് അധികൃതരുമായി കൂടിക്കാഴ്ചയ്ക്കായി ടെക്‌നിക്കല്‍ മേഖലയില്‍ എത്തും. തുടര്‍ന്ന് മാധ്യമങ്ങളെ കാണുമെന്നും അറിയിച്ചു.

വിഴിഞ്ഞത്താണ് കേന്ദ്രമന്ത്രിയുടെ സന്ദര്‍ശനം ആരംഭിച്ചത്. വിഴിഞ്ഞത്ത് മത്സ്യത്തൊഴിലാളികളെ കണ്ട നിര്‍മ്മല സീതാരാമന്‍ അവസാന ആളെ കണ്ടെത്തുംവരെ തിരച്ചില്‍ തുടരുമെന്ന് വ്യക്തമാക്കി. സര്‍ക്കാര്‍ സാധ്യമായതെല്ലാം ചെയ്യും. സുനായി കാലത്തുപോലും ഇത്ര കാര്യക്ഷമമായി രക്ഷാപ്രവര്‍ത്തനം നടന്നിട്ടില്ലെന്നും കേന്ദ്രമന്ത്രി ചൂണ്ടിക്കാട്ടി. വൈകാരിക പ്രകടനങ്ങള്‍ ഒഴിവാക്കണമെന്നും ആവശ്യമായത് എന്തും നല്‍കുമെന്നും കേന്ദ്രമന്ത്രി അറിയിച്ചു. ഇത് സംബന്ധിച്ച് കലക്ടര്‍ക്കും പള്ളി അധികൃതര്‍ക്കും ഉറപ്പ് നല്‍കിയിട്ടുണ്ടെന്നും കേന്ദ്രമന്ത്രി വ്യക്തമാക്കി.